Azərbaycan atletləri aerobika gimnastikası üzrə Avropa çempionatında uğurla çıxış ediblər
Bakı, 10 noyabr, AZƏRTAC
Portuqaliyanın Elvas şəhərində aerobika gimnastikası üzrə Avropa çempionatı başa çatıb.
Azərbaycan Gimnastika Federasiyasından AZƏRTAC-a bildiriblər ki, ölkəmiz qitə çempionatında idmanın bu növü üzrə ilk dəfə təmsil olunub.
İdmançılarımızdan mübarizəyə ilk qoşulan Vladimir Dolmatov kişilərin fərdi yarışlarında 20,150 xalla 20 iştirakçı arasında 13-cü yeri tutub. Sonra yarışlara Aynur Cabbarlı, Vladimir Dolmatov, Vera Bosıx, Elçin Məmmədov və Timur Ələkbərovdan ibarət qrup qatılıb. Finala vəsiqə qazanan komanda ümumi hesabda altıncı sırada qərarlaşıb. Hakimlər təmsilçilərimizin çıxışlarını 19,269 xalla qiymətləndiriblər.
Xatırladaq ki, komandamız “Bakı-2015” birinci Avropa Oyunlarının aerobika yarışlarının qrup təsnifat mərhələsində 17,383 xalla 10-cu yeri tutmuşdu.
Bölmənin digər xəbərləri
