Azərbaycan-Birləşmiş Ərəb Əmirlikləri münasibətləri hazırda ən yüksək səviyyədədir
Bakı, 17 yanvar, AZƏRTAC
Prezident İlham Əliyevin bu il xarici ölkəyə ilk səfəri Birləşmiş Ərəb Əmirliklərinə (BƏƏ) oldu. Dövlətimizin başçısının bu səfəri Əbu-Dabi Dayanıqlılıq Həftəsi adlı mötəbər tədbirdə iştirak etmək üçün baş tutdu. Azərbaycanla Birləşmiş Ərəb Əmirlikləri arasında münasibətlər hazırda ən yüksək səviyyə mərhələsindədir və getdikcə inkişaf edir. Təbii ki, bu cür yüksək münasibətin bariz nümunəsi kimi BƏƏ-nin ötən ilin dekabrında Fransa və Ermənistanın BMT Təhlükəsizlik Şurasında Azərbaycana qarşı çirkin kompaniyanın növbəti addımı olaraq müzakirəyə çıxardıqları anti-Azərbaycan qətnaməsinə sərt şəkildə etiraz etməsini qeyd etmək olar. Bir sıra dost dövlətlərlə yanaşı, BƏƏ-nin də, bu cür ədalətli mövqedən çıxış etməsi hazırda düşmənə və onun havadarlarına qarşı apardığımız gərgin, amansız siyasi və diplomatik mübarizədə bizim üçün vacib əhəmiyyət kəsb edən məqamlardan biridir. Bu səfər həm də, bir daha Azərbaycanın multikultural dəyərlərə və tolerantlığa önəm verdiyini, xristian Avropası, türk Asiyası ilə yanaşı, ərəb və İslam dünyası ilə də sıx əlaqədə maraqlı olduğundan xəbər verdi.
Bunu AZƏRTAC-a açıqlamasında Siyasi və Hüquqi Araşdırmalar Mərkəzinin rəhbəri, politoloq Xəyal Bəşirov deyib.
Onun sözlərinə görə, BƏƏ kimi dünyada enerji layihələrinin və iqtisadi proseslərin reallaşması prosesində önəmli rola malik olan aktorla münasibətlərimiz təkcə siyasi və diplomatik baxımdan deyil, eyni zamanda, iqtisadi baxımdan Azərbaycan üçün önəm kəsb edir. İşğaldan azad etdiyimiz ərazilər də daxil olmaqla, bütün ölkəmizdə hazırda yaşıl enerjinin, bərpaolunan enerji mənbələrinin istehsalı və mübadiləsi sahəsində həm regionda, həm də hər ikisini birləşdirdiyimiz Avropa və Asiya qitələrində ölkəmizin rolu artmaqdadır. Bunun əsl səbəbi Prezident İlham Əliyevin də BƏƏ-nin Əbu-Dabi şəhərində iştirak etdiyi həmin mötəbər tədbirdə də dediyi kimi Azərbaycanın artıq illər əvvəl özünün enerji təhlükəsizliyini təmin etməsi ilə bağlıdır. Təbii ki, dünyanın və xüsusilə də Avropanın enerji təhlükəsizliyinin təmin edilməsi prosesində rol almaq istəyən dövlət əvvəlcə özünün bu sahədəki təminatını sığortalamalıdır.
“Prezident İlham Əliyev həm də, Azərbaycanın bu illər ərzində çox böyük investisiyalar cəlb etdiyi neft-qaz sektorumuzdan da danışdı. Xüsusilə də, onun rəhbərliyi dönəmində dövlətimiz digər sahələrlə yanaşı, neft və qaz sahəsinə çox böyük diqqət ayırıb. Bu, həm də siyasətimizin doğru istiqamətdə yürüdülməsinin məntiqi nəticəsidir. Azərbaycan regionda yeganə dövlətdir ki, Avropanın etibarlı enerji tərəfdaşına çevrilib. Hazırda formalaşmaqda olan yeni dünyada siyasi, iqtisadi və enerji düzəninin formalaşmasında Azərbaycanın rolu açıq şəkildə hiss olunmaqdadır. Biz artıq qeyri-neft sektorunun müxtəlif istiqamətlərini, o cümlədən də, təbiətin Azərbaycana bəxş etdiyi alternativ bərpaolunan enerji resurslarımızın istehsalı və ixracı sahəsini inkişaf etdirməklə bağlı qətiyyətli və prinsipial mövqe ortaya qoymuşuq. Düşünürəm ki Əbu-Dabidə, xüsusilə də bu sahə ilə bağlı konkret hədəflərimizi diqqətə çatdıran dövlətimizin başçısı təsadüfən Cənub Qaz Dəhlizi kimi meqa layihəni misal gətirmədi. Ən ucqar sərhədlərin arasında 500 kilometrdən də az məsafə olmasına baxmayaraq, 3500 kilometr uzunluğu olan qitələrarası Cənub Qaz Dəhlizi kimi meqa layihələri reallaşdıran, Qara dənizin dibindən elektrik kabelini çəkməklə Asiya ilə Avropanı yaşıl enerji ilə birləşdirəcək nəhəng layihədə əsas rol alan Azərbaycan alternativ enerji resursları ilə bağlı digər layihələrdə də etibarlı tərəfdaş olmaq haqqını artıq çoxdan qazanıb”, - deyə politoloq diqqətə çatdırıb.
Bölmənin digər xəbərləri
