Bakı, 25 dekabr, AZƏRTAC

Prezident İlham Əliyevin rəhbərliyi ilə ölkəmizdə həyata keçirilən sosial-iqtisadi islahatlar, aparılan çoxtərəfli və balanslaşdırılmış xarici siyasət nəticəsində Azərbaycan regionda ən güclü və suveren ölkəyə çevrilməkdədir. Ölkəmiz artıq yüksək beynəlxalq nüfuza malik dövlətə çevrilib. Həyata keçirilən praqmatik strategiya ölkəmizə beynəlxalq münasibətlər sistemində müstəqil xarici siyasət həyata keçirən milli dövlət kimi etibarlı tərəfdaş imici qazandırıb. Regional təşəbbüslər Azərbaycanın möhkəmlənməsinə, bölgədəki əməkdaşlığın dərinləşməsinə xidmət edib. Milli mənafelərlə bağlı problemlərin həllinə həssas, fəal yanaşma uzaq və yaxın xaricin də diqqətindən yayınmadı. Azərbaycan Prezidentinin yürütdüyü uğurlu xarici siyasət nəticəsində ölkəmiz BMT Təhlükəsizlik Şurasının qeyri-daimi üzvü seçildi, dünyada beynəlxalq təşkilatlar Ermənistanı işğalçı dövlət kimi tanıdı. Azərbaycan Prezidentinin bu məsələdəki birmənalı mövqeyi təsdiqlədi ki, Qarabağın Azərbaycandan ayrılma mexanizmi yoxdur. Azərbaycanın 155 dövlətin dəstəyi ilə BMT Təhlükəsizlik Şurasına qeyri-daimi üzv seçilməsi, həmçinin 120 dövlətin təmsil olunduğu Qoşulmama Hərəkatına 2019-2022-ci illərdə sədrlik etməsi müasir Azərbaycanın beynəlxalq miqyasda nüfuzunu və qüdrətini göstərdi. Azərbaycanın ən böyük Qələbəsi, tarixi Zəfəri Prezident, Müzəffər Ali Baş Komandan İlham Əliyevin rəhbərliyi ilə şanlı Azərbaycan Ordusunun 44 gün davam edən Vətən müharibəsində torpaqlarımızın düşmən işğalından azad edilməsidir.

AZƏRTAC xəbər verir ki, bu fikirlər Milli Məclisin deputatı Rauf Əliyevin “Azərbaycan dünyaya günəş kimi doğmuşdur” sərlövhəli məqaləsində yer alıb.

Bu gün müstəqil Azərbaycan dövləti özünün ən şanlı dövrünü yaşayır. Azərbaycan tarixdə heç vaxt bu qədər güclü olmayıb. Prezident İlham Əliyevin rəhbərliyi ilə ölkəmizdə sosial sahədə də böyük uğurlar qazanılıb. Dövlətimizin başçısı Azərbaycanın sosial sahəyə çox böyük önəm verən ölkə olduğunu qeyd edərək deyib: “Biz ölkəmizdə bazar iqtisadiyyatı prinsiplərini sosial ədalət prinsipləri ilə birləşdirə bildik və hesab edirəm ki, Azərbaycanın uğurlu inkişafı məhz buna söykənir”. Nəticədə dövlətimiz bu gün güclü iqtisadiyyata, orduya, dünya birliyində yüksək mövqeyə sahib olmaqla yanaşı, faydalı sosial siyasətə malik bir ölkədir. Azərbaycan Respublikasının 2022-ci il üçün təsdiq edilmiş dövlət büdcəsində sosial ödənişlər üzrə nəzərdə tutulan xərclərinin həcmi buna bariz nümunədir. Gələn ilin büdcəsində nəzərdə tutulan sosial ödənişlərin ümumi büdcə xərclərində xüsusi çəkisi 46,5 faiz nəzərdə tutulub. Dövlətimizin başçısının həyata keçirtdiyi siyasətin mərkəzində Azərbaycan vətəndaşı, əhalinin sosial müdafiəsinin gücləndirilməsi ilə bağlı məsələlər dayanıb. 2003-cü ildən ötən dövr ərzində ölkəmizdə minimum əməkhaqqı 10 dəfə, orta aylıq əməkhaqqı 7 dəfə, əhalinin nominal gəlirləri 6,9 dəfə, real gəlirləri 7,6 dəfə, pensiyalar 9 dəfə artıb.

2018-ci ildən başlayaraq sosial sahədə aparılan islahatların yeni mərhələsi başlanıb və bu proses davam edir. Bu günlərdə Prezident İlham Əliyevin imzaladığı fərman və sərəncamlara əsasən minimum əməkhaqqı 2022-ci ilin yanvarın 1-dən etibarən 250 manatdan 300 manata çatdırılıb, müəllimlərin, idarəetmə və təlim fəaliyyəti ilə məşğul olan işçilərin maaşlarının orta hesabla 20 faiz artırılması nəzərdə tutulur. Dövlətimizin başçısının digər Sərəncamı ilə sosial müavinətlərin və təqaüdlərin artırılması nəzərdə tutulub. Ümumilikdə qeyd olunan fərman və sərəncamlarla maaş artımı 2,1 milyondan çox əhalini, sosial müavinətləri və təqaüdlərin artımı isə 732 min şəxsi əhatə edəcək. Bu məqsədlər üçün illik əlavə olaraq 1,7 milyard manat vəsaitin ayrılması da nəzərdə tutulub.

Son 18 ildə Azərbaycan iqtisadiyyatı sürətlə inkişaf etmiş, ümumdaxili məhsul üç dəfədən çox artaraq yoxsulluq səviyyəsi 49 faizdən 6 faizə enib. Ölkədə işsizlik səviyyəsi də 6 faizə enib.

Dövlətimizin inkişafını istəməyən, bu uğurları heç cürə qəbul edə bilməyən xaricidəki antiazərbaycan kampaniyası aparan qüvvələr, onların maliyyələşdirdikləri blogerlər bütün vasitələrdən istifadə edərək ölkəmizin əldə etdiyi bu uğurlara kölgə salmaq istəyirlər. Həmçinin ölkəmizdə özlərini əbədi müxalifət sayan AXC-Müsavat cütlüyü də heç cürə indiki iqtidarın əldə etdiyi tarixi nailiyyətləri qəbul edə bilmirlər, çünki özləri vaxtilə hakimiyyətdə olublar və Azərbaycanı dərin böhran vəziyyətinə gətiriblər. Ölkə artıq vətəndaş müharibəsi astanasında idi. O vaxt xalqın tələbi və istəyi ilə ümummilli lider Heydər Əliyev hakimiyyətə gəlməsəydi Azərbaycan adlı ölkə olmayacaqdı. Azərbaycanın uğurları artıq bütün dünya tərəfindən artıq qəbul edilib. Bu uğurlar dünyanın nüfuzlu beynəlxalq təşkilatları tərəfindən də qeydə alınıb. Dünya Bankının “Doinng Business” hesabatının reytinqinə görə, dövlətimiz 190 ölkə arasında 28-ci yerdədir. Həmçinin Azərbaycan 10 ən islahatçı ölkə sırasında da qərarlaşıb. Davos Ümumdünya İqtisadi Forumunun hesabatının bəzi parametrlərinə görə Azərbaycan dünyanın 74 inkişaf etmiş ölkəsi arasında ilk sıraladardı. Əhalinin elektrik enerjisi təchizatı səviyyəsinə görə dünya miqyasında Azərbaycan ikinci yerdədir. Hökumətin dəyişməyə cavabdehliyi, yəni islahatçı obrazı əmsalına görə Azərbaycan dünya miqyasında beşinci sıradadır. Dövlətimizin uzunmüddətli strategiyası üzrə 10-cu yerdə, hökumətin siyasi sabitliyi təmin etməsi üzrə isə 11-ci yerdədir. Azərbaycan infrastruktur layihələri ilə bağlı göstəricilərdə də yüksək yerlərdə qərarlaşıb. Azərbaycan dəmir yol xidmətlərinin səmərəliliyi üzrə 11-ci yerdə, hava yolları xidmətlərinin səmərəliliyi üzrə 12-ci yerdə, avtomobil yollarının keyfiyyəti üzrə isə 24-27-ci yerdədir.

Ulu öndər Heydər Əliyevin layiqli siyasi varisi və davamçısı Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi ilə müəyyənləşdirilən və həyata keçirilən hərtərəfli düşünülmüş, balanslaşdırılmış xarici siyasət, 44 gün davam edən Vətən müharibəsində şanlı Ordumuzun parlaq Qələbəsi nəticəsində torpaqlarımızın işğaldan azad edilməsi, 18 il ərzində ölkəmizdə həyata keçirilən siyasi və iqtisadi islahatlar, sosial-iqtisadi sahədə, eyni zamanda, beynəlxalq əməkdaşlıq sahəsində əldə olunan uğurlar nəticəsində, Azərbaycan dünyaya günəş kimi doğdu. Bir vaxtlar ulu öndər Heydər Əliyev demişdi: “Vaxt gələcək Azərbaycan dünyaya günəş kimi doğacaq”. Bu gün həmin gündür. Azərbaycan dünyaya günəş kimi doğmuşdur.