Azərbaycan əleyhinə qətnamə layihəsinin müəllifi islamofobiya xəstəliyinə yoluxmuş Fransadır
Bakı, 16 mart, AZƏRTAC
Avropa Parlamenti Azərbaycana qarşı növbəti qərəzli qətnamə qəbul etməyə hazırlaşır. İlkin məlumata görə, AP “Azərbaycanın Ermənistana hərbi təcavüzü”, “Laçın yolunun blokadası”, “Minsk qrupu”, “Dağlıq Qarabağın statusu” kimi sərsəm, reallıqdan uzaq və qərəzli məsələləri müzakirəyə çıxaracaq. Bu mövzular Azərbaycan cəmiyyəti üçün heç bir sürpriz, şok effekti yarada bilməz. Otuz ildən yuxarıdır ki, ermənilərin himayəçiləri belə ürəkbulandırıcı mövzularla Qarabağ münaqişəsinin ədalətli həllinə mane olurdular.
Özlərini demokratik dəyərlərin qoruyucusu elan edən Avropa ölkələri Avropa Parlamentində 732 kresloya sahibdirlər. Onların siyahısına nəzər saldıqda aydın olur ki, əksəriyyəti həm Azərbaycana, həm də Türkiyəyə qarşı qısqanc, ədalətsiz siyasi mövqe sərgiləyirlər. Qırx dörd günlük Vətən müharibəsində biz onların iç üzlərini gördük. Bu baxımdan qəbul olunan və olunacaq qərarlarda qərəz açıq-aydın görünür. Heç kəsdə şübhə doğurmur ki, Azərbaycan əleyhinə qətnamə layihəsinin əsas müəllifi islamofobiya və türkofobiya xəstəliyinə yoluxmuş Fransa siyasətçiləridir.
Bunu Milli Məclisin deputatı İltizam Yusifov AZƏRTAC-a açıqlamasında söyləyib.
Onun sözlərinə görə, Fransa özünün neomüstəmləkəçilik siyasətini Cənubi Qafqazda yürütmək istəyir. Rusiyanın Ukraynada apardığı hərbi əməliyyatlardan istifadə edən Paris bölgəyə nüfuz etmək, ölkələri özündən asılı duruma salmaq istəyir. Amma görəndə ki, Azərbaycan dövləti və onun rəhbərliyi müstəqil xarici siyasət yürüdür və heç bir kənar qüvvələrin məkrli planlarında yer almaq istəmir, o zaman siyasi təzyiq rıçaqları işə düşür. Fransa və onun kimi ölkələr Avropa Parlamentindən onlara tabe olmayan dövlətlərə qarşı silah kimi istifadə edirlər.
Avropanın enerji təhlükəsizliyində mühüm rol oynayan Azərbaycan Ermənistandan fərqli olaraq Rusiyanın forpostu deyil. Ermənistan Rusiyanın təşəbbüsü ilə yaradılan KTMT-nin, Avrasiya İttifaqının, Gömrük İttifaqının üzvüdür. Ermənistanın sərhədlərini Rusiya ordusu qoruyur. Belə olan halda Avropa Parlamentinin İrəvana hamilik etməsi, Azərbaycana qarşı qərəzli qətnaməni müzakirəyə çıxarması heç cür başadüşülən deyil.
Deputat qeyd edib ki, son dövrlər Avropa Parlamenti daha çox korrupsiya cinayətləri və Azərbaycana qarşı qərəzli addımları ilə gündəmə gəlir. Bu xüsusda, Yunanıstandan olan vitse-prezident Eva Kailinin milyonlarla dollar korrupsiya cinayətində ittiham edilməsi nə birinci, nə də sonuncu haldır. Bu kimi halların qarşısını almaq üçün Azərbaycan xarici media platformaları və xarici siyasi arenalarda həyata keçirdiyi işlərin əhatə dairəsini genişləndirməlidir. Azərbaycanın xarici siyasəti ilə bağlı istər Avropada istərsə də qurumun üzv olduğu ölkələrin medialarından davamlı yazılar dərc olunmalıdır. Avropa Parlamenti üzv ölkələrin diaspor təşkilatları ilə sıx münasibət qurulmalıdır. Görünən odur ki, erməni lobbisinin bu istiqamətdə həyata keçirdiyi işlər indiki məqamda belə qərarların qəbul olmasına səbəb olub. Ancaq biz də boş dayanmalı deyilik.
“Azərbaycanın ərazi bütövlüyü məsələsi artıq öz həllini tapıb. Bu rəsmi sənədlərdə kifayət qədər açıq və aydın şəkildə izah olunur. Maraqlıdır ki, Avropa Parlamentinin yanaşmasında ərazi bütövlüyü anlayışı ancaq Ermənistan kontekstində keçərlidir. Azərbaycana gəldikdə ərazi bütövlüyü yada düşmür. Belə olan halda Avropa Parlamentinin demokratik dəyərlərə nə dərəcədə hörmətlə yanaşması və nəinki Azərbaycanla bağlı, eyni zamanda, qəbul etdiyi bütün qərarlara şübhə ilə yanaşmalı olursan.
Avropa ölkələri ekofəalların Laçın yolunda aksiya keçirməsini tez-tez gündəmə gətirirlər. Ancaq qeyd olunmur ki, bu yol vasitəsilə Azərbaycanın təbii sərvətləri xaricə, elə Avropaya daşınırdı. Bəli bu onlara sərf edirdi ki, bu təbii sərvətlərdən əldə olunan gəlirlərdən Avropa Parlamentinin nümayəndələri, ermənilər və onların havadarları külli miqdarda gəlir əldə etsinlər. Artıq bu qapı onlar üçün bağlanıb. Azərbaycan dövləti atdığı addımları beynəlxalq hüququn normaları çərçivəsində həyata keçirilir. Bütün bunların fonunda qəbul olunacaq sənəd daha çox Avropa Parlamentinin nüfuzuna xələl gətirəcək və gələcəyini sual altına qoyacaq”, - deyə İltizam Yusifov vurğulayıb.
Bölmənin digər xəbərləri
