Azərbaycan enerji sektorunda regionun əsas mərkəzlərindən birinə çevrilib ŞƏRH
Bakı, 5 iyun, AZƏRTAC
“Bakı Enerji Həftəsi” beynəlxalq əməkdaşlığın inkişafına xidmət edən mühüm platformalardan biri kimi diqqət çəkir. Tədbir dünyanın müxtəlif ölkələrindən enerji şirkətlərinin nümayəndələrini, investorları və ekspertləri bir araya gətirərək enerji təhlükəsizliyi, yeni texnologiyalar, dayanıqlı inkişaf və yaşıl enerji istiqamətində fikir mübadiləsi üçün əlverişli imkan yaradır.
Bu sözləri AZƏRTAC-a açıqlamasında Bakı Dövlət Universitetinin kafedra müdiri, professor Kamilə Əliyeva söyləyib.
O bildirib ki, bu il keçirilən “Bakı Enerji Həftəsi” Xəzər Neft və Qaz Sərgisinin 30 illiyi ilə üst-üstə düşməsi baxımından xüsusi əhəmiyyət kəsb edir. Həmin sərgi Azərbaycanın beynəlxalq enerji əməkdaşlığının genişlənməsində və sonrakı dövrdə reallaşdırılan iri enerji layihələrinin formalaşmasında mühüm rol oynayıb.
“Azərbaycan son onilliklər ərzində enerji sektorunda həyata keçirdiyi layihələr nəticəsində regionun əsas enerji mərkəzlərindən birinə çevrilib. Neft və qaz ehtiyatlarının səmərəli idarəolunması, beynəlxalq tərəfdaşlıqların qurulması və ixrac marşrutlarının şaxələndirilməsi ölkənin iqtisadi inkişafına mühüm təsir göstərib. Enerji təhlükəsizliyi müasir dövrdə qlobal iqtisadiyyatın əsas məsələlərindən biri olaraq qalır. Enerji resurslarının etibarlı və davamlı şəkildə təmin edilməsi həm sənayenin, həm nəqliyyatın, həm də sosial rifahın vacib şərtlərindən hesab olunur. Bu baxımdan, enerji istehsalçısı və ixracatçısı olan ölkələrin beynəlxalq əməkdaşlıqda rolu daha da artır”, - deyə K.Əliyeva vurğulayıb.
Professor qeyd edib ki, Azərbaycanın iqtisadi göstəriciləri ölkənin maliyyə dayanıqlığını nümayiş etdirir. Strateji valyuta ehtiyatlarının yüksək səviyyədə olması və xarici borcun nisbətən aşağı qalması iqtisadi sabitliyin vacib göstəricilərindən hesab olunur. Enerji sektorundan əldə edilən gəlirlər, eyni zamanda, qeyri-neft sahələrinin inkişafına, sənayeləşməyə və iqtisadi şaxələndirməyə yönəldilib. Ölkənin Avropanın enerji təhlükəsizliyində rolu da son illərdə daha da artıb. Azərbaycan qazının bir sıra Avropa ölkələrinə ixracı enerji mənbələrinin şaxələndirilməsi baxımından əhəmiyyətli hesab olunur. Bu prosesdə Cənub Qaz Dəhlizi xüsusi yer tutur və regional əməkdaşlığın genişlənməsinə töhfə verir.
“Azərbaycan yalnız enerji sahəsində deyil, həm də nəqliyyat və logistika istiqamətində strateji mövqeyə malikdir. Şərq-Qərb nəqliyyat marşrutu Avropa ilə Asiya arasında yükdaşımaların artmasına imkan yaradır və regionlararası iqtisadi əlaqələrin inkişafına xidmət edir. Eyni zamanda, yeni nəqliyyat layihələrinin həyata keçirilməsi ölkənin tranzit potensialının daha da güclənməsinə şərait yaradır. Ümumilikdə isə “Bakı Enerji Həftəsi”ndə müzakirə olunan məsələlər Azərbaycanın enerji sektorunda əldə etdiyi nailiyyətləri, beynəlxalq əməkdaşlıq imkanlarını və gələcək inkişaf perspektivlərini əks etdirir. Enerji və nəqliyyat sahələrində həyata keçirilən layihələr ölkənin regional və qlobal əhəmiyyətinin artmasına töhfə verməkdə davam edir”, - deyə o əlavə edib.
Bölmənin digər xəbərləri
