Azərbaycan gəncliyi ölkənin iqtisadi və intellektual gücünün aparıcı qüvvəsidir - Tahir Mirkişili
Bakı, 2 fevral, AZƏRTAC
2 Fevral – Azərbaycan Gəncləri Günü müstəqil Azərbaycan dövlətinin gənclərə verdiyi strateji əhəmiyyətin, uzunmüddətli və ardıcıl dövlət siyasətinin təcəssümüdür. Bu tarix Ümummilli Lider Heydər Əliyevin siyasi iradəsi ilə təsis edilib və gəncliyin cəmiyyətin aparıcı qüvvəsi kimi formalaşdırılmasına xidmət edən konseptual yanaşmanın nəticəsi olub. Ulu Öndər Heydər Əliyev gəncləri Azərbaycanın gələcəyinin əsas təminatçısı, milli inkişafın əsas insan kapitalı kimi qiymətləndirirdi.
Bu fikirləri AZƏRTAC-a müsahibəsində Milli Məclisin deputatı Tahir Mirkişili deyib. O bildirib ki, Ulu Öndərin gənclər siyasəti təkcə sosial yanaşma deyil, eyni zamanda, iqtisadi inkişaf, dövlət təhlükəsizliyi və milli ideologiya ilə sıx bağlı strateji xətt idi: “1994-cü il 26 iyul tarixli Fərmanla Gənclər və İdman Nazirliyinin yaradılması gənclərlə bağlı dövlət siyasətinin institusional əsaslarını formalaşdırdı. Azərbaycan gənclərinin forumlarının keçirilməsi, istedadlı gənclərin “Qızıl kitab”a daxil edilməsi, gənclər siyasətinin mahiyyətini əks etdirən qanunvericilik təşəbbüsləri gənclərin intellektual və peşəkar potensialının inkişafına yönəldi. Bu siyasət gənclərin vətənpərvər ruhda formalaşması ilə yanaşı, onların müasir iqtisadi münasibətlər sistemində fəal iştirakına zəmin yaratdı. Ulu Öndərin müəyyənləşdirdiyi siyasi xətt Prezident İlham Əliyev tərəfindən müasir dövrün tələblərinə uyğun şəkildə uğurla davam etdirilir. Dövlət başçısı gəncləri ölkənin innovativ inkişafının və iqtisadi dayanıqlılığının əsas aparıcı qüvvəsi kimi qiymətləndirir. 2007-ci ilin “Gənclər ili” elan olunması, Bakı və regionlarda fəaliyyət göstərən “Gənclər evləri”, 2011-ci ildə Prezident yanında Gənclər Fondunun yaradılması gənclərin sosial, iqtisadi və innovativ fəallığını stimullaşdıran əsas mexanizmlərdir. “Yüksəliş” müsabiqəsi gənc kadrların irəli çəkilməsi siyasətinin uğurlu nümunəsinə çevrilib, Gənclərin İnkişaf və Karyera Mərkəzi isə gənclərin peşəkar bacarıqlarının artırılmasında mühüm rol oynayıb. Könüllülər hərəkatı gənclərdə sosial məsuliyyət və vətəndaş mövqeyinin möhkəmlənməsinə xidmət edir. Dördüncü Sənaye İnqilabı dövründə Azərbaycan gəncliyi rəqəmsal texnologiyalar, startap ekosistemi, innovativ sahibkarlıq və İKT sahəsində mühüm uğurlar əldə edir. Gənclərin xaricdə təhsil proqramları, 2026-2027-ci tədris ili üzrə təsdiqlənmiş universitet və ixtisas siyahıları bilikəsaslı iqtisadiyyatın formalaşmasına yönəlmiş dövlət siyasətinin tərkib hissəsidir”.
Tahir Mirkişili qeyd edib ki, Azərbaycan gəncliyinin formalaşmasında vətənpərvərlik əsas ideoloji xətt kimi qalmaqdadır: “44 günlük Vətən müharibəsində rəşadətli Azərbaycan Ordusunun sıralarında vuruşan gənclər ölkəmizin suverenliyi və ərazi bütövlüyü uğrunda misilsiz qəhrəmanlıq nümunəsi göstərdilər. Onlar həm döyüş meydanında, həm də informasiya müharibəsində Azərbaycanın milli maraqlarını qətiyyətlə müdafiə etdilər. Bu gün Vətən müharibəsində iştirak etmiş hər bir gənc Azərbaycan xalqının qürur mənbəyidir və onların qəhrəmanlığı gənc nəsil üçün əsl vətənpərvərlik məktəbidir”.
Deputat əlavə edib ki, Azərbaycanın “idman ölkəsi” kimi tanınması gənclər siyasətinin mühüm istiqamətlərindən biridir. Bakıda keçirilmiş Birinci Avropa Oyunları, “Bakı Eurovision-2012”, Avropa Gənclər Paytaxtı layihələri gənclərin beynəlxalq səviyyədə təmsilçiliyini gücləndirib. Azərbaycan idmançılarının beynəlxalq arenadakı uğurları dövlət başçısının gənclərə göstərdiyi diqqətin real nəticəsidir. Bu gün Azərbaycan gəncliyi ölkənin iqtisadi inkişafının, innovativ potensialının və milli təhlükəsizliyinin əsas aparıcı qüvvəsidir. Ümummilli Lider Heydər Əliyevin əsasını qoyduğu və Prezident İlham Əliyev tərəfindən müasir dövrün çağırışlarına uyğun şəkildə inkişaf etdirilən dövlət gənclər siyasəti müasir, bilikli, texnoloji savadlı və vətənpərvər gənclik formalaşdırıb.
Bölmənin digər xəbərləri
