Azərbaycan gərginliyi artan dünyaya öz modelini təklif edir - ŞƏRH
Bakı, 20 dekabr, AZƏRTAC
Prezident İlham Əliyevin bir neçə gün əvvəl “Rossiya Seqodnya” Beynəlxalq İnformasiya Agentliyinin Baş direktoru, “Rossiya-1” televiziya kanalında “Vesti nedeli” proqramının müəllifi və aparıcısı Dmitri Kiselyova verdiyi müsahibədə səsləndirdiyi hər bir fikir dünyaya ciddi mesajdır. Dövlətimizin başçısının müsahibəsi dünyanın aparıcı media vasitələrində geniş işıqlandırılır. Hazırda informasiya resursları dövlətimizin başçısının müxtəlif mövzularla bağlı səsləndirdiyi fikirləri yaymaqda davam edir. Cəmi otuz üç illik müstəqillik tarixi olmasına baxmayaraq, artıq Azərbaycan dünyada söz sahibinə çevrilmiş dövlətdir. Dünyada nüfuz qazanmış beynəlxalq təşkilatların fəal üzvü və bir sıra hallarda həmin qurumların bəzilərinə müəyyən vaxtlarda sədrlik etmiş ölkəmiz bu gün dünyanın inkişaf etmiş dövlətləri ilə bir sıradadır. Uzun illərdir ki, Azərbaycan dünyada sabitlik məkanı kimi tanınır. Elə buna görə də, dünyanın güc mərkəzlərinin səlahiyyətli nümayəndələri bir sıra qlobal məsələlərin müzakirəsini məhz Azərbaycanda aparmağa üstünlük verirlər. Bu, Prezident İlham Əliyevin rəhbərliyi ilə həyata keçirilən xarici siyasətin məntiqi nəticəsidir. Dövlətimizin başçısının “Rossiya Seqodnya” Beynəlxalq İnformasiya Agentliyinə müsahibəsi zamanı səsləndirdiyi fikirlər də bunu təsdiqləyir.
Bu fikirləri AZƏRTAC-a açıqlamasında siyasi şərhçi Əliqismət Bədəlov deyib.
Siyasi şərhçi bildirib ki, dövlət başçımız dünyada ikili siyasət yeridən, demokrat qiyafəsində zühur edən, regionlarda münaqişələri alovlandıran, işğalçı ölkələri öldürücü silahlarla təchiz edən dövlətləri də kəskin tənqid edib və onlara ciddi mesajlar göndərib. Yəni, işğalçılıq meyillərindən əl çəkə bilməyən Ermənistanı silahlandıran Fransa, Hindistan, ABŞ bununla heç nəyə nail ola bilməyəcək. Çünki artıq Azərbaycanın dünyada 50 ordudan biri olan güclü, qüdrətli silahlı qüvvələri var. Dünyanın aparıcı media vasitələri də Azərbaycan Prezidentinin müsahibəsində bu fikirlərə xüsusi önəm verərək yazıblar ki, Prezident İlham Əliyev ABŞ-dakı sorosçuları Ermənistana silah göndərməməyə çağırıb və bu addımın yeni müharibəyə səbəb ola biləcəyinə işarə edib. Dövlətimizin başçısı vurğulayıb ki, “Erməni sponsorlara, şərti olaraq Vaşinqtondakı sorosçulara bunu dayandırmaq lazım olduğunu çatdırırıq və çatdırmağa davam edəcəyik. Bu, belə davam edərsə, sonradan bizə qarşı heç bir irad tutulmasın”. Azərbaycan Prezidenti bəyan edib ki, Ermənistan silahların əksəriyyətini Qərbdən pulsuz və ya kreditlə almasına, onların təbii ki, silinəcəyinə baxmayaraq, bizimlə silah yarışında tab gətirməyəcək. Bununla yanaşı diqqətə çatdırılıb ki, Makron hökumətinin Ermənistana tədarük etdiyi silahlar hücum silahlarıdır, öldürücüdür və Azərbaycan üçün praktiki təhlükə yaradır.
Ə.Bədəlov qeyd edib ki, Ermənistanın öldürücü silahlarla təchiz edilməsi, münaqişəni yenidən alovlandırmağa cəhd edən bir sıra riyakar dövlətlərin çirkin kampaniyaları cavabsız qalmır. Bütün bunların fonunda dövlətimizin başçısı Azərbaycanın adekvat tədbirlər görməyə məcbur olduğunu bildirib: “2025-ci ildə növbəti hərbi büdcəmiz rekord büdcə olacaq. Bu, təxminən beş milyard dollardır. Bu məbləğin ən azı 60 faizini xərcləməyə məcburuq. Təbii ki, belə təhdidlər olmasaydı, həmin xərclər hərbi büdcəyə yox, Qarabağda və Şərqi Zəngəzurda aparılan yenidənqurmaya, tikinti-bərpa işlərinə, mədəni irsimizin bərpasına, sosial ödənişlərə və digər zəruri sahələr üçün istifadə edilərdi. Lakin biz bunu etməyə məcburuq və edəcəyik”. Prezident İlham Əliyev əlavə edib ki, ermənilər İkinci Qarabağ müharibəsinin və 2023-cü ilin sentyabrında keçirilən antiterror əməliyyatının nəticələrini unutmamalıdırlar.
Siyasi şərhçi dövlətimizin başçısının müsahibəsində ciddi mesajlardan birinin də Ermənistana və onun havadarlarına ünvanlandığını bildirib: “Həmçinin, başa düşməlidirlər ki, Makron rejiminin, eləcə də ABŞ Dövlət Departamentinin maksimum dəstəyinə baxmayaraq, burada, bu yerdə bizə qarşı növbəti təxribat planlaşdırsalar, onlara heç kim kömək etməyəcək”.
Ə. Bədəlov deyib ki, müsahibədə diqqət çəkən məqamlardan biri də Ermənistanla Azərbaycan arasında sülh müqaviləsinin hələ də imzalanmamasına aydınlıq gətirilməsidir. Dövlətimizin başçısı bu məsələyə də aydınlıq gətirdi və Nikol Paşinyanın ictimaiyyətdən gizlətdiyi iki bəndi ilk dəfə açıqladı: “İndiyə qədər Ermənistan mütəmadi olaraq bu haqda danışırdı, lakin Paşinyan da daxil olmaqla erməni rəsmilər “razılaşdırılmayan maddələrin” nələri ehtiva etdiyini gizlədirdi. Gizlədilən iki maddə “Tərəflərin bir-birinə qarşı beynəlxalq iddialardan imtinası” və “Üçüncü ölkələrin nümayəndələrinin sərhəddə yerləşdirilməməsi, Avropa İttifaqının müşahidə missiyasının fəaliyyətinin dayandırılması”dır. Əslində, Ermənistan birinci maddə ilə razılaşmaq məcburiyyətindədir. Çünki İrəvanın bundan imtina etməsi Azərbaycana vurulan zərərin – təqribən 150 milyard dollar – ödənilməsi reallığı ilə üzləşməsi deməkdir. Azərbaycan Prezidenti bununla bağlı xəbərdarlıq mesajı göndərdi. İkinci maddə – Aİ-nin müşahidəçilərinin bölgədə olması vəziyyəti daha da çətinləşdirir. Çünki “müşahidəçi” adı altında bölgədə 1500 nümayəndənin olduğu haqda məlumatlar var. Eyni zamanda, sülh variantının reallaşdırılması üçün digər amillərdən biri də Azərbaycana qarşı ərazi iddialarının əks olunduğu Ermənistan Konstitusiyanın dəyişdirilməsidir. Həmçinin ATƏT-in mövcud olmayan Minsk qrupunun ləğv edilməsi üçün Ermənistan Azərbaycanla eyni mövqedən çıxış etməlidir”.
“Prezident İlham Əliyev bu müsahibəsində əsl liderin nələrə qadir olduğunu bəyan etdi və vurğuladı ki, lider problemlərə real, obyektiv yanaşmalı, reallıqları olduğu kimi dərk etməli və buna uyğun qərarlar qəbul etməlidir. Belə olduğu halda qlobal problemlərin həllinə töhfə vermək olar. Bu gün Azərbaycanın dünyada getdikcə artan münaqişələrin, qarşıdurmaların fonunda sabitlik məkanı kimi qəbul edilməsi də əsl Liderin düzgün müəyyənləşdirdiyi strategiyanın məntiqi nəticəsidir. Bütün bunlar Azərbaycanın gərginliyi artan dünyaya öz modelini təklif etməsinə imkan verir” - deyə, Ə.Bədəlov bildirib.
Bölmənin digər xəbərləri
