SİYASƏT
Azərbaycan güclü regional ölkə qismində yeni dövrə qədəm qoyur ŞƏRH
![Azərbaycan güclü regional ölkə qismində yeni dövrə qədəm qoyur ŞƏRH](/files/2024/1/1200x630/17082524915160559463_1200x630.jpg)
Bakı, 18 fevral, N.Məmmədova, AZƏRTAC
Azərbaycan XXI əsrin əvvəlinə Birinci Qarabağ müharibəsinin ağır sosial-iqtisadi nəticələri və geosiyasi fəsadları ilə daxil olmuşdu. O zaman prezident seçilən İlham Əliyev gələcək strateji inkişaf vektorunu müəyyən edən, lakin nəzərdə tutulan məqsədlərə nail olmaq üçün qarşıda hələ çox işin görüləcəyi ölkəyə rəhbərlik etməyə başladı.
Bu fikirləri AZƏRTAC-a siyasi analitik, “Strategic Consulting Group”un direktoru Rafik İsmayılov fevralın 7-də keçirilən seçkilərin yekunlarına görə növbəti yeddi il müddətinə yenidən seçilən Prezident İlham Əliyevin ölkəyə rəhbərliyi dövründə Azərbaycanın əldə etdiyi uğurlardan danışarkən deyib.
“Neft strategiyasının həyata keçirilməsi və Bakı-Tbilisi-Ceyhan boru kəmərinin istismara başlaması təkcə sosial-iqtisadi məsələlərin həlli deyil, həm də xarici siyasət xarakterli məsələlərin həlli üçün geniş imkanlar yaradırdı. Azərbaycan vaxtilə borcu olan ölkədən donor ölkəyə çevrildi. Azərbaycan nəinki Gürcüstan, İran, Rusiya, Serbiya və Ukraynada investisiya layihələri yerinə yetirdi, həm də yumşaq güc alətlərindən istifadə edərək, Avropada və MDB ölkələrində xeyriyyəçilik layihələri həyata keçirdi. Bu illər ərzində Bakı onlarca siyasi, mədəni və idman xarakterli beynəlxalq tədbirlərə ev sahibliyi etdi. Bütün bunlar, şübhəsiz ki, ölkənin həm regional, həm də qlobal geosiyasi miqyasda mövqelərini möhkəmləndirirdi”, - deyə R.İsmayılov qeyd edib.
O xatırladıb ki, ötən illər ərzində Azərbaycan Qoşulmama Hərəkatına rəhbərlik etməyə, BMT Təhlükəsizlik Şurasının qeyri-daimi üzvü olmağa, İslam Əməkdaşlıq Təşkilatında mövqelərini möhkəmlətməyə, onlarca ölkə ilə sıx ikitərəfli münasibətlər qurmağa nail oldu, eyni zamanda, müstəqil xarici siyasətini davam etdirdi.
“Ordu quruculuğuna, qeyri-neft sektorunun və nəqliyyat infrastrukturunun inkişafına böyük investisiyalar yatırıldı. Bu gün Azərbaycan hər hansı regional nəqliyyat-logistika layihəsini həyata keçirmək imkanı verən inkişaf etmiş infrastruktura malik ölkədir. Orta Dəhliz və Şimal-Cənub kimi nəhəng layihələrin icrası gündəlikdədir. Ən iri xarici sərmayələr bərpaolunan enerji mənbələrinin inkişafına cəlb olunub. Bu illər ərzində Azərbaycan sosial xarakterli onlarca layihə həyata keçirib. Məcburi köçkünlər, şəhid ailələri və veteranlar üçün məhəllələr və qəsəbələr tikilib”, - deyə ekspert əlavə edib.
R.İsmayılov vurğulayıb ki, ordu quruculuğunda çox böyük iş görülüb: “Hərbi-sənaye kompleksi yaradıldı. Ölkə döyüş silahlarının istehsalında özünü təmin etməyə nail oldu. Bəzi silah növlərini hətta xarici bazara çıxarmaq mümkün oldu. Bütün bunlar yekun hesabda əsas vəzifəyə - ərazi bütövlüyünün və ədalətin bərpasına xidmət edirdi. Vəzifə yerinə yetirildi. Bu hadisənin əhəmiyyətini hətta geniş geosiyasi kontekstdə dəyərləndirmək çətindir. Qeyd etmək lazımdır ki, müsəlman Şərqi tarixinin son 200 illik dövründə bu, ilk haldır ki, ölkə öz ərazilərini tamamilə geriyə qaytarmağa nail olub. Bu bir faktdır, tarixi əhəmiyyətli hadisədir. Azərbaycan öz ərazi bütövlüyünü bərpa etməklə regionun yeni geosiyasi reallığını yaratdı. Ölkə güclü və özünü təmin edən regional aktor qismində yeni dövrə qədəm qoyur, gələcək üçün narahat olmağa heç bir əsas yoxdur”, - deyə siyasi analitik fikrini yekunlaşdırıb.