Güclü qar yağması “Azərbaycan Hava Yolları” Dövlət Konserninin fəaliyyətinə təsir göstərməmişdir, respublikanın bütün hava limanları adi rejimdə işləyir. Konsernin mətbuat xidmətindən AZƏRTAC-ın müxbirinə bu barədə məlumat verərək bildirmişlər ki, havanın dəyişməsi aviatorlar üçün gözlənilməz olmamışdır. Çünki konsernin aviameteorologiya xidmətləri havadakı dəyişikliyi peyk kanalları vasitəsilə izləyirlər. 

Konsernin bütün xidmətləri - istər Binə hava limanı, istərsə də Naxçıvan və Gəncə aeroportları mürəkkəb meteoroloji şəraitdə Beynəlxalq Mülki Aviasiya Təşkilatının (İKAO) tələblərinə və normalarına uyğun işləməyə həmişə hazırdır. Aviatorlar qar yağarkən gecə-gündüz fövqəladə şəraitdə çalışaraq, uçuşların təhlükəsizliyini təmin edirlər.

Hazırda Bakı hava limanından digər ölkələrin mürəkkəb hava şəraitində köməyə ehtiyacı olan təyyarələrinin qəbulu üçün ehtiyat aeroport kimi də istifadə edilə bilər.

Binə hava limanının normal fəaliyyətini təmin etmək üçün istiqamətləndirmə cığırları, texniki dayanacaqlar, uçuş zolaqları müasir aviasiya-perron texnikasının köməyilə çox qısa müddətdə qardan təmizlənmişdir. Təyyarələrin səthinin buz bağlamaması üçün onların üzərinə xüsusi kimyəvi maddələr çəkilir.

Dövlət Konsernindən həmçinin bildirmişlər ki, respublikamızın vətəndaşları onun xidmətlərindən adi günlərdə olduğu kimi istifadə edə bilərlər, çünki bütün hava limanları fəaliyyətini bir an belə dayandırmır, təyyarələri adi rejimdə qəbul edir və yola salırlar.