SİYASƏT
Azərbaycan hər kəsin hesablaşdığı güc mərkəzinə çevrilib - Ekspert rəyi
Bakı, 19 fevral, AZƏRTAC
Prezident İlham Əliyevin Münxen Təhlükəsizlik Konfransı çərçivəsində keçirdiyi görüşlər beynəlxalq rezonans yaradıb. Bu, beynəlxalq ictimai rəyin formalaşmasında rol almış transmilli media subyektlərinin səhifələrindən daha aydın görünür. Azərbaycan Prezidentinin ABŞ-ın Dövlət katibi Antoni Blinken, Ermənistanın baş naziri Nikol Paşinyan, ATƏT-in fəaliyyətdə olan sədri İan Borqun və digər şəxslərlə keçirdiyi görüşlər barədə xarici mediada çoxsaylı məqalələr dərc olunub. İnternet axtarış sistemləri göstərir ki, bu məqalələrin sayı 100-lərlədir. Bu kontekstdə diqqət çəkən məqam təkcə dövlətimizin başçısının keçirdiyi görüşlər barədə informasiya yayan media subyektlərinin kəmiyyəti ilə bağlı deyil. Ənənəvi yanaşmadan fərqli olaraq bu dəfə Avropadan yayımlanan transmilli media ilə yanaşı, Asiya və Afrikanın da nüfuzlu qurumları mövzunu gündəmdə saxlayıblar. Çin, Hindistan, Yaponiya, Səudiyyə Ərəbistanı, Qətər və digər 10-larla ölkədə fəaliyyət göstərən media subyektləri də mövzuya diqqət yetiriblər.
Bu sözləri AZƏRTAC-a açıqlamasında Mətbuat Şurasının İdarə Heyətinin üzvü, media eksperti Müşfiq Ələsgərli söyləyib.
Ekspert bildirib ki, konfransın açılışından 2 gün əvvəl - fevralın 14-də Azərbaycan Prezidenti İlham Əliyevin inauqurasiya mərasimi keçirilmişdi və xarici media subyektləri də həmin mövzuya da eyni həssaslıqla yanaşmışdılar. Növbədənkənar prezident seçkiləri günü və 14 fevral andiçmə mərasimi barədə də 100-lərlə məqalələr dərc edilmişdi. Bütün bunlar onu deməyə əsas verir ki, son dövrlərdə dövlətimizin adının çəkildiyi bütün proseslər ciddi şəkildə beynəlxalq reaksiya doğurur və xarici media subyektləri Azərbaycan mövzusunu diqqətdə saxlayırlar. Bu da təsadüfi deyil.
“Azərbaycan iqtidarının uzun müddət ərzində apardığı müstəqil və balanslı xarici siyasət kursu öz bəhrəsini verməkdədir. Belə ki, Azərbaycan dünyanın bütün qitələrində, fərqli qütblərdə yerləşən ölkələrində eyni dərəcədə diqqətlə izlənilir. Azərbaycanın həmmüəllifi olduğu regional və beynəlxalq layihələr onu dünya üçün əvəzedilməz ölkəyə çevirir. Bundan əlavə, dövlətimiz Qərb ölkələri üçün əhəmiyyətli enerji qaynaqlarından biri, həmçinin Avropa ilə Asiya arasında ən mühüm nəqliyyat qovşağıdır. İki qitəni birləşdirən ən sərfəli nəqliyyat dəhlizləri Azərbaycan ərazisində layihələndirilib. Bu dəhliz Avropa və Asiya ilə yanaşı, bütövlükdə dünya üçün də əhəmiyyət daşıyır”, - deyə Müşfiq Ələsgərli qeyd edib.
O vurğulayıb ki, Azərbaycan adı dünyada təkcə nəqliyyat dəhlizləri və ya enerji layihələri barədə diqqət çəkmir. Son 4 ildə baş verən proseslər Azərbaycanın adını region hüdudlarından kənara çıxan, "orta güc" kateqoriyasına daxil olan ölkə kimi tanıdıb. Xeyli mühüm geopolitik proseslər mövcuddur ki, Azərbaycan orada açar nöqtələrdən biridir. Beynəlxalq güc mərkəzlərinin Cənubi Qafqaz və ətraf regionlar üzrə layihələrinin taleyi həm də Azərbaycanın iradəsindən asılıdır.