Azərbaycan ilə Sankt-Peterburq arasında əlaqələrin perspektivləri müzakirə olunub
Sankt-Peterburq, 21 may, AZƏRTAC
Azərbaycanın Rusiyadakı səfiri Polad Bülbüloğlunun Sankt-Peterburqun qubernatoru Georgi Poltavçenko ilə görüşündə ikitərəfli münasibətlərin hazırkı səviyyəsi və perspektivləri müzakirə olunub.
Görüşdə səfir Polad Bülbüloğlu Azərbaycan Prezidentinin Sərəncamı ilə ölkəmizin Sankt-Peterburq şəhərində yeni təyin olunmuş baş konsulu Sultan Qasımovu qubernatora təqdim edib.
Söhbət zamanı turizm, mədəni-humanitar, kənd təsərrüfatı və digər sahələrdə əməkdaşlığın daha da genişləndirilməsinin vacibliyi vurğulanıb, Sankt-Peterburqda tikilməsi planlaşdırılan logistika mərkəzinin əlaqələrin inkişafında rolu önə çəkilib.
İyunun 16-18-də keçirilməsi nəzərdə tutulan Sankt-Peterburq Beynəlxalq İqtisadi Forumunda ölkəmizin nümayəndə heyətinin iştirakı, Azərbaycan və Sankt-Peterburq hökumətləri arasında iqtisadi və humanitar sahələrdə əməkdaşlıq üzrə hökumətlərarası komissiyanın növbəti iclasının vaxtının müəyyənləşdirilməsi, mövcud müqavilələrə bir daha baxılması məsələləri ətrafında fikir mübadiləsi aparılıb.
Görüşün sonunda Baş konsulluğun işinin daha da canlandırılması və bunun üçün şəhər administrasiyası ilə daha yaxından əməkdaşlığın zəruriliyi qeyd olunub.
Fəridə Abdullayeva
AZƏRTAC-ın xüsusi müxbiri
Sankt-Peterburq
Bölmənin digər xəbərləri
