Azərbaycan milli gücünü artıraraq yeni geosiyasi reallıqların mühüm aktoruna çevrilib - ŞƏRH
Bakı, 9 iyul, AZƏRTAC
Azərbaycan müstəqilliyini bərpa etdiyi ilk illərdə olduqca mürəkkəb siyasi, iqtisadi və təhlükəsizlik problemləri ilə üz-üzə qalmışdı. Bir tərəfdən yeni dövlət quruculuğu prosesinin həyata keçirilməsi, digər tərəfdən isə ərazi bütövlüyünə qarşı yaranmış təhdidlərin aradan qaldırılması zərurəti ölkə qarşısında böyük vəzifələr qoyurdu. Belə bir şəraitdə Azərbaycanın əsas məqsədi müstəqil dövlətçilik ənənələrini möhkəmləndirmək, milli təhlükəsizlik sistemini formalaşdırmaq və beynəlxalq aləmdə öz mövqelərini təmin etmək idi.
Bu fikirləri AZƏRTAC-a açıqlamasında Türk İslam Araşdırmaları Mərkəzinin sədri, siyasi ekspert Telman Nüsrətoğlu bildirib.
Onun sözlərinə görə, Azərbaycan bu məqsədlərə nail olmaq üçün ardıcıl və uzunmüddətli strategiya həyata keçirib: “Dövlət idarəçiliyinin gücləndirilməsi, iqtisadi müstəqilliyin təmin olunması, enerji resurslarından səmərəli istifadə və beynəlxalq tərəfdaşlıqların genişləndirilməsi Azərbaycanın milli inkişaf modelinin əsas istiqamətlərini təşkil edib. Azərbaycanın uğurlarının təməlində ilk növbədə uzaqgörən siyasi yanaşma dayanır. Ölkə rəhbərliyi qlobal və regional prosesləri düzgün qiymətləndirərək Azərbaycanın milli maraqlarına uyğun siyasət həyata keçirib. Bu siyasət nəticəsində Azərbaycan yalnız iqtisadi imkanlarını genişləndirməyib, eyni zamanda, siyasi müstəqilliyini və beynəlxalq təsir imkanlarını da artırıb”.
Ekspertin fikrincə, enerji siyasəti Azərbaycanın müasir tarixində xüsusi yer tutur. “Əsrin müqaviləsi”nin imzalanması ilə başlayan yeni mərhələ ölkənin iqtisadi inkişafına böyük təkan verib. Azərbaycan öz enerji resurslarını dünya bazarlarına çıxarmaqla yanaşı, regional və qlobal enerji təhlükəsizliyinin təmin olunmasında mühüm tərəfdaşa çevrilib. Bakı-Tbilisi-Ceyhan neft kəməri, Bakı-Tbilisi-Ərzurum qaz kəməri, TANAP və digər strateji layihələr Azərbaycanın geoiqtisadi əhəmiyyətini daha da artırıb.
Telman Nüsrətoğlu bildirib ki, Azərbaycan enerji layihələri ilə yanaşı, nəqliyyat və logistika sahəsində də mühüm təşəbbüslər irəli sürüb. Ölkənin yerləşdiyi əlverişli coğrafi mövqe Azərbaycanı Şərq-Qərb və Şimal-Cənub nəqliyyat dəhlizlərinin əsas halqalarından birinə çevirib. Bu gün Azərbaycan Avrasiyanın mühüm kommunikasiya mərkəzlərindən biri kimi çıxış edir və regionlararası əlaqələrin inkişafına mühüm töhfə verir.
Ekspert xüsusi olaraq vurğulayıb ki, iqtisadi inkişafla paralel olaraq Azərbaycanın müdafiə potensialının gücləndirilməsi dövlət siyasətinin əsas prioritetlərindən biri olub. Güclü iqtisadi baza əsasında müasir standartlara cavab verən, yüksəkhazırlıqlı və texnoloji imkanlara malik ordu formalaşdırılıb. Bu proses Azərbaycanın təhlükəsizlik imkanlarını artırmaqla yanaşı, beynəlxalq arenada da mövqelərini möhkəmləndirib.
“44 günlük Vətən müharibəsində əldə olunan tarixi Zəfər Azərbaycanın dövlətçilik tarixində yeni mərhələ açdı. Azərbaycan öz ərazi bütövlüyünü bərpa etməklə yanaşı, regionda yaranmış yeni reallıqların əsas formalaşdırıcılarından birinə çevrildi. Bu Qələbə həm də diplomatiya, iqtisadi güc, hərbi potensial və xalq həmrəyliyinin vəhdətinin nəticəsi kimi qiymətləndirilə bilər. Azərbaycanın uğur hekayəsi postsovet məkanında xüsusi nümunə kimi göstərilə bilər. Çünki ölkə mürəkkəb geosiyasi şəraitə baxmayaraq, öz milli maraqlarını qoruyaraq, dövlət institutlarını gücləndirib, iqtisadi inkişafını təmin edib və qarşıya qoyduğu strateji məqsədlərə nail olub”, - deyə Telman Nüsrətoğlu qeyd edib.
O bildirib ki, hazırda dünya yeni təhlükəsizlik çağırışları ilə üzləşir. Müxtəlif regionlarda baş verən qarşıdurmalar, qlobal güclər arasında artan rəqabət və yeni geosiyasi proseslər fonunda Azərbaycanın yerləşdiyi məkanın əhəmiyyəti daha da artır. Xəzər hövzəsi, Cənubi Qafqaz və türk dünyası arasında yerləşən Azərbaycan strateji baxımdan mühüm mövqeyə malikdir.
Mərkəz sədrinin fikrincə, Türk dünyası ilə əlaqələrin inkişafı Azərbaycanın regional və beynəlxalq rolunu gücləndirən mühüm amillərdən biridir. Türk dövlətləri arasında əməkdaşlığın dərinləşməsi, iqtisadi və nəqliyyat əlaqələrinin genişlənməsi yeni imkanlar yaradır. Azərbaycan bu proseslərdə həm təşəbbüskar, həm də fəal iştirakçı kimi çıxış edir.
Onun sözlərinə görə, qarşıdakı dövrdə Azərbaycanın əsas hədəfləri arasında milli təhlükəsizliyin daha da möhkəmləndirilməsi, iqtisadiyyatın şaxələndirilməsi, yüksək texnologiyaların inkişafı və regional əməkdaşlığın genişləndirilməsi dayanır. Dövlətin gücü, ordunun qüdrəti, iqtisadi potensial və xalqın milli həmrəyliyi Azərbaycanın davamlı inkişafının əsas təminatlarıdır: “Azərbaycan artıq yalnız regional proseslərin iştirakçısı deyil, həm də qlobal əhəmiyyət daşıyan layihələrin və təşəbbüslərin müəllifi olan nüfuzlu dövlətə çevrilib. Ölkənin həyata keçirdiyi müstəqil və balanslaşdırılmış siyasət bundan sonra da Azərbaycanın beynəlxalq mövqelərinin möhkəmlənməsinə xidmət edəcək”.
Bölmənin digər xəbərləri
