AZƏRBAYCAN PREZİDENTİ İLHAM ƏLİYEV “AZSTANDARTSERVİS” LABORATORİYASININ AÇILIŞINDA İŞTİRAK ETMİŞDİR
Dövlətimizin başçısını laboratoriya binasının önündə Britaniya Standartlar İnstitutunun “British Standart” bölməsinin direktoru Mayk Lou, institutun digər əməkdaşları böyük səmimiyyətlə və mehribanlıqla qarşıladılar.
Prezident İlham Əliyev laboratoriyanın açılışını bildirən lenti kəsdi və girişdəki lövhənin üzərindən örtüyü götürdü.
Sonra Azərbaycan Prezidenti İlham Əliyevə Bakıda açılan bu laboratoriyanın fəaliyyəti barədə geniş məlumat verildi. Bildirildi ki, Qafqaz və Orta Asiya regionunda bu ilk və ən boyük laboratoriya istər respublikamızda, istərsə də regionda istehlak bazarlarının saxta, keyfiyyətsiz, təhlükəli və kontrafakt məhsullardan qorunmasında, ixrac potensiallı məhsulların rəqabətə davamlılığının artırılmasında mühüm rol oynayacaqdır. Eyni zamanda, istehlakçıların hüquqlarının qorunması da təmin olunacaqdır.
Laboratoriya ABŞ, Böyük Britaniya, Almaniya, Yaponiya, İsveçrə və digər inkişaf etmiş ölkələrin ən qabaqcıl şirkətlərinin istehsalı olan və yüksək beynəlxalq standartlara cavab verən müxtəlif tipli və funksiyalı avadanlıqla təmin edilmişdir. Bu avadanlıq neftin, suyun, spirtli içkilərin, qida məhsullarının, metalın və digər məmulatların operativ və yüksək keyfiyyətli sınaqlarını həyata keçirməyə imkan verməklə, ölkəmizdə beynəlxalq standartlara cavab verən və təhlükəsiz məhsul istehsalına əlverişli şərait yaradır. Ölkəmizdə sahibkarlığın inkişaf etdiyi bir dövrdə yerli istehsal məhsullarının Britaniya Standartlar İnstitutunun sertifikatları ilə təmin olunması həmin məhsulların dünya bazarlarına maneəsiz ixrac edilməsinə əlverişli şərait yaradacaqdır. Bu isə respublikamızda beynəlxalq standartların bütün istehsal sahələrində tətbiqinə və iqtisadiyyatın ən müasir təcrübə zəminində inkişafına təkan verəcəkdir.
Azərbaycan Prezidenti İlham Əliyev laboratoriyanın ayrı-ayrı bölmələri ilə tanış oldu. İlk olaraq, ərzaq məhsullarının keyfiyyətini və tərkibini yoxlayan cihazlar barədə dövlətimizin başçısına məlumat verildi. Bildirildi ki, laboratoriyada quraşdırılmış avadanlıq 90 dəqiqə ərzində müxtəlif ərzaq məhsullarının tərkibindəki proteinin və digər maddələrin müəyyən edilməsinə imkan verir.
Sonra Prezident İlham Əliyev Almaniyada istehsal olunmuş avadanlıqla təchiz edilmiş və metalların ilkin emalını sınaqdan keçirməyə imkan verən, Belçikadan gətirilmiş avadanlıq hesabına ət və süd məhsullarının tərkibindəki yağların miqdarını müəyyən edən bölmələrlə yaxından tanış oldu. Dövlətimizin başçısına məlumat verildi ki, avadanlığın quraşdırılması zamanı texniki təhlükəsizlik, əməyin və ətraf mühitin mühafizəsi məsələləri yüksək beynəlxalq standartlar səviyyəsində həll olunmuş və laboratoriya ixtisaslı mütəxəssislərlə tam təmin edilmişdir.
Prezident İlham Əliyev neft məhsullarının keyfiyyət göstəricilərinin müəyyən edilməsi ilə də tanış oldu.
Britaniya Standartlar İnstitutunun dünyanın 110-dan çox ölkəsində 170-ə yaxın nümayəndəliyi, 80-ə yaxın sınaq laboratoriyası və 4500-dən çox işçisi vardır. 1903-cü ildə Böyük Britaniya kraliçasının birbaşa dəstəyi ilə təsis olunmuş bu institut dünyada ilk dəfə olaraq təhlükəsizlik standartlarını yaratmışdır. Bakıda açılan və 4 mərtəbəli binada yerləşən, 2,5 min kvadratmetr sahəsi olan laboratoriyada 50-dək Azərbaycan vətəndaşı çalışır və yüksək əmək haqqı alır. Dövlətimizin başçısı Britaniya Standartlar İnstitutunun Bakıda bu mühüm laboratoriyanın yaradılması ilə bağlı səylərini yüksək qiymətləndirdi.
Laboratoriya binası ilə tanışlıqdan sonra Prezident İlham Əliyev jurnalistlərlə öz təəssüratını bölüşdü.
SUAL: Cənab Prezident, Azərbaycanda belə bir müasir və dünya standartlarına cavab verən laboratoriyanın açılması həm ölkəmizdə iqtisadiyyatın inkişafı ilə, həm də xarici şirkətlərin qeyri-neft sektoruna sərmayə qoyması ilə əlaqədardır. Siz bunu necə qiymətləndirirsiniz?
CAVAB: Mən bunu yüksək qiymətləndirirəm. Laboratoriya xoşuma gəldi, burada çox gözəl avadanlıq quraşdırılıbdır. Mütəxəssislər də çox biliklidirlər. Çox şadam ki, Azərbaycanda belə gözəl, yüksək standartlara cavab verən laboratoriya yaradılıbdır. Mənə verilən məlumata görə, bu, bölgədə ən yüksək dünya standartlarına cavab verən ilk belə laboratoriyadır. Bu gün Azərbaycanda hər bir sahə inkişaf edir. Şübhəsiz ki, keyfiyyət nəzarəti də çox güclü olmalıdır. Azərbaycana daxil olan malların, xüsusilə yeyinti məhsullarının keyfiyyəti bəzi hallarda yüksək səviyyədə olmur. Bu cür laboratoriyanın fəaliyyət göstərməsi insanlarımızın sağlamlığına da xidmət edəcəkdir. Eyni zamanda, Azərbaycandan çıxarılan mallar, ixrac məhsulları da burada nəzərdən keçiriləcək ki, bu da məhsullarımızın dünya bazarlarında özünə daha geniş yer tapmasına imkan verəcəkdir. Laboratoriyanın yaranması hər cəhətdən çox müsbət haldır və yenə də qeyd etmək istəyirəm ki, bu, Azərbaycanda son illərdə gedən ümumi inkişafın bir əlamətidir. Çox şadam ki, buraya belə böyük miqdarda sərmayə qoyulubdur. Çox məmnunam ki, burada işləyən gənc mütəxəssislər peşəkardırlar. Onların mənə verdiyi izahatlar göstərdi ki, bu mütəxəssislərin biliyi, savadı çox yüksək səviyyədədir. Bu, həm də bizim xarici tərəfdaşlarımızla əməkdaşlığımızın bariz nümunəsidir. Azərbaycanda qeyri-neft sektoruna sərmayələrin gətirilməsi prosesi davam edir, yeni sahələr açılır. Elə bu laboratoriya da yeni bir sahədir. Mən çox şadam ki, Bakıda, Azərbaycanda belə gözəl müəssisə yaradılmışdır. Uğurlar arzulayıram.
X X X
Sonda Britaniya Standartlar İnstitutunun “British Standart” bölməsinin direktoru Mayk Lou təmsil etdiyi qurum adından Azərbaycan Prezidenti İlham Əliyevə hədiyyə təqdim etdi.
Bölmənin digər xəbərləri
