Azərbaycan Prezidenti, Silahlı Qüvvələrin Ali baş komandanı İlham Əliyev mərasimdə iştirak etmişdir.

Dövlət Sərhəd Xidmətinin rəisi, general-leytenant Elçin Quliyev Ali baş komandana raport verdi.

Son illərdə Dövlət Sərhəd Xidmətinin maddi-texniki bazasının gücləndirilməsi, yeni sərhəd dəstələri və zastavalarında müasir şəraitin yaradılması sərhəd qoşunlarının inkişafına göstərilən diqqət və qayğının təzahürüdür. Prezident, Ali baş komandan İlham Əliyev ölkədə sərhəd xidmətinin təkmilləşdirilməsinə dair kompleks tədbirlərin həyata keçirilməsini və sərhəd dəstələrinin fəaliyyətinin ən müasir tələblər səviyyəsində qurulmasını daim diqqətdə saxlayır. Havada, suda və quruda sərhədlərin etibarlı şəkildə qorunmasını təşkil etmək üçün bütün zəruri tədbirlər görülür. DSX-nin yeni hərbi hissəsi də Prezidentin Sərəncamına əsasən yaradılmışdır.

Hərbi hissənin ərazisi ilə tanış olan Prezident İlham Əliyevə məlumat verildi ki, buradakı şəxsi heyəti relyefdən asılı olmayaraq, hər yerdə, habelə dənizdə bütün əməliyyatlarda iştirak etməyə həmişə hazırdır. Dövlət Sərhəd Xidmətinin keçirdiyi bütün əməliyyatlarda bu hərbi hissənin şəxsi heyətindən istifadə olunur.

Prezident İlham Əliyev hərbi hissənin idman salonuna baxdı. Burada sərhədçilər üçün xüsusi əhəmiyyəti olan fiziki hazırlıqdan ötrü hər cür şərait yaradılmışdır. Dövlət başçısı akt salonunda da oldu, burada hərbi hissənin həyatı ilə bağlı tədbirlər keçirilir.

Sonra təlim zalına gələn Ali baş komandana məlumat verildi ki, burada şəxsi heyət müxtəlif silah növlərindən istifadə qaydalarını öyrənir.

Ali baş komandan Dövlət Sərhəd Xidmətinin fəaliyyəti ilə bağlı fotoşəkillərə baxdı. Burada müxtəlif vaxtlarda Prezidentin iştirakı ilə sərhəd dəstələrinin açılışlarını, Azərbaycan sərhədçilərinin orden və medallarla təltif olunmasını, onların sosial şəraitinin yaxşılaşdırılmasını əks etdirən fotoşəkillər toplanmışdır.

Prezident İlham Əliyev pnevmatik atıcılıq otağında pnevmatik tapançadan hədəfə atəş açdı. İnteraktiv atıcılıq otağında isə sərhədçilər müasir silahlardan istifadə vərdişlərini təkmilləşdirirlər.

Sonra dövlətimizin başçısı əsgərlərlə görüşdü.

Dövlət Sərhəd Xidmətinin rəisi, general-leytenant Elçin Quliyev Ali baş komandan İlham Əliyevə məruzə edərək dedi ki, Sizin şəxsi heyətə gündəlik qayğınız dövlət sərhədlərinin mühafizəsində yüksək etibarlılığın təmin edilməsinə, bu sahədə ən müasir texnikaların tətbiqinə şərait yaratmışdır. Hər bir Azərbaycan sərhədçisi Vətəninə və Prezidentinə sədaqətlə, qürurla xidmət edir. Bu gün açılışında olduğunuz bu hərbi hissə sərhədlərimizin etibarlı qorunmasına öz töhfəsini verməkdədir. Burada şəxsi heyətin peşəkar səviyyədə formalaşması, Vətənə sədaqətlə xidmət etməsi üçün bütün şərait var. Qürurla bildirmək istəyirəm ki, bu hərbi hissə dünya standartlarına cavab verir. Cənab Prezident, biz də çalışırıq ki, qarşımıza qoyulmuş bütün tapşırıqları şərəflə yerinə yetirək. Sizə bütün Azərbaycan sərhədçiləri adından dərin minnətdarlığımızı bildiririk.

Azərbaycan Prezidenti, Ali baş komandan İLHAM ƏLİYEV sərhədçilərə müraciətlə dedi:

- Sağ olun, mən bütün sərhədçiləri bu gözəl hərbi hissənin açılışı münasibətilə təbrik edirəm, sizə Vətən uğrunda xidmətinizdə uğurlar arzulayıram.

Son illər ərzində sərhəd xidmətinin təşkil olunması, infrastrukturun yaradılması istiqamətində çox böyük işlər görülübdür. Bu hərbi hissənin yaradılması son illər ərzində görülmüş işlərin bariz nümunəsidir. Sərhədlərimizdə müasir zastavalar, hərbi hissələr yaradılır, eyni zamanda, ölkəmizin müxtəlif yerlərində ən müasir standartlara cavab verən hərbi hissələr yaradılır və müasir avadanlıqla təchiz edilir.

Hər bir ölkənin təhlükəsizliyi onun sərhədlərindən başlayır. Xüsusilə Azərbaycan kimi daxili sabitliyi ilə fərqlənən ölkələrin təhlükəsizliyi, ilk növbədə, sərhədin möhkəm olmasından asılıdır. Azərbaycanda ictimai-siyasi sabitlik, təhlükəsizlik, əmin-amanlıq ölkəmizin inkişafı üçün əsas şərtdir. Biz elə etməliyik ki, sərhədlərimiz tam şəkildə qorunsun. Dostlarımız üçün qapılar açıq, düşmənlər üçün bağlı olmalıdır. Sərhəd mühafizəsinin təşkili nəticəsində Azərbaycanda daxili təhlükəsizliyin təmin ediıməsi daha da yüksək səviyyədə təşkil olunur.

Azərbaycan dünyada sabitlik məkanı kimi tanınır. Həm də son aylar ərzində qonşuluqda yaşanan siyasi və hərbi böhranlar, həm də bu gün dünyada yaşanan iqtisadi və maliyyə böhranları Azərbaycandan yan keçibdir. Nəyə görə? Ona görə ki, bizim məqsədyönlü siyasətimiz, düşünülmüş siyasətimiz, görülən tədbirlər, vaxtında atılmış addımlar Azərbaycanı hərtərəfli qoruyur. Biz dövlət müstəqilliyimizi qorumalıyıq, möhkəmləndirməliyik, dönməz etməliyik. Elə etməliyik ki, Azərbaycan həmişə çiçəklənsin, inkişaf etsin.

Bu baxımdan sərhəd xidməti əməkdaşlarının fəaliyyəti çox önəmli, çox vacibdir. Məhz bu məqsədlə sərhəd xidmətinin, sərhəd infrastrukturunun möhkəmlənməsi üçün son illər ərzində böyük vəsait ayrılıb, bundan səmərəli istifadə olunubdur. Mən Azərbaycanın müxtəlif bölgələrində yerləşən sərhəd hərbi hissələrində olarkən bunu öz gözümlə görmüşəm. Bu gözəl hərbi hissənin yaradılması da görülən tədbirlərin, işlərin nəticəsidir. Burada xidmət etmək üçün bütün şərait var, şəxsi heyətin öz peşəkarlığını artırması üçün bütün şərait yaradılıbdır. Mən şübhə etmirəm ki, sərhədçilər bütün bu gözəl şəraitdən səmərəli istifadə edəcək və həmişə olduğu kimi, Vətənin keşiyində möhkəm dayanacaqlar.

Sizə bütün işlərinizdə uğurlar arzulayıram. Sağ olun!

Sonra atıcılıq poliqonu ilə tanış olan Ali baş komandana məlumat verildi ki, burada müxtəlif məsafələrə  - 10, 25, 75 və 100 metr məsafələrə atəş açmaq üçün ən yüksək standartlara uyğun şərait yaradılmışdır.

Prezident İlham Əliyev hərbi hissədəki yeni texnikalara da baxdı. Bildirildi ki, digərləri kimi, yeni hərbi hissə də müasir tipli texnikalarla təchiz olunmuşdur.

Dövlətimizin başçısı şəxsi heyətin hərbi təlimlərini də izlədi, qərargah binasında yaradılan şəraitlə, yeməkxana ilə tanış oldu. Hərbi hissədə bütün tələblər nəzərə alınmaqla, komandir və zabit heyətinin fəaliyyəti üçün lazımi şərait yaradılmışdır. Yeməkxanada isə əsgər və zabit heyətinin qidalanması üçün yüksək standartlar tətbiq edilir.

Ali baş komandan hərbi hissənin muzeyində də oldu. Burada ümummilli lider Heydər Əliyevin və Prezident İlham Əliyevin sərhəd qoşunlarının inkişafına göstərdiyi diqqət və qayğını əks etdirən fotoşəkillər və kitablar toplanmışdır.

Dövlətimizin başçısı gizir və zabitlər üçün yataqxana ilə də tanış oldu, hərbi hissənin təchiz olunduğu müasir silah növlərinə baxdı. Müxtəlif əməliyyatların keçirilməsi üçün nəzərdə tutulan bu silahlar dünya standartlarına cavab verir.

Azərbaycan Prezidenti, Ali baş komandan İlham Əliyev Dövlət Sərhəd Xidmətinin yeni hərbi hissəsinin yüksək tələblərə cavab verməsi üçün görülmüş işlərdən razılığını bildirdi, müvafiq tövsiyə və tapşırıqlarını verdi.