-Hörmətli cənab Prezident!

Hörmətli xanımlar və cənablar!

Cənab Prezident, ilk növbədə mənə və nümayəndə heyətinə göstərdiyiniz qonaqpərvərliyə görə Sizə öz dərin təşəkkürümü bildirmək istəyirəm.

Mən bu gün çox məmnunam ki, biz Sizinlə çox səmərəli danışıqlar apardıq, geniş fikir mübadiləsi etdik. Mən böyük məmnuniyyətlə Polşaya yenidən səfər edirəm və Polşa dövlətinin ali ordenini mənə təqdim etdiyinizə görə, məni bu ordenlə təltif etdiyinizə görə Sizə bir daha öz dərin minnətdarlığımı bildirmək istəyirəm. Sizi əmin etmək istəyirəm ki, mən bundan sonra da öz fəaliyyətimdə Polşa-Azərbaycan münasibətlərinin inkişafında fəal rol oynayacağam. Çalışacağam ki, bu münasibətlər daha da möhkəmlənsin, dərinləşsin və xalqlarımız bir-birinə daha da yaxın olsunlar.

Biz haqlı olaraq bu münasibətləri strateji tərəfdaşlıq münasibətləri kimi qiymətləndiririk. Bizim aramızda çox güclü siyasi dialoq aparılır. Cənab Prezident, bizim Sizinlə görüşlərimiz mütəmadi xarakter daşıyır. Bakıda, Varşavada, digər şəhərlərdə biz mütəmadi qaydada görüşürük, ikitərəfli və regional məsələləri müzakirə edirik. Müzakirə olunan məsələlərdə bizim mövqeyimiz üst-üstə düşür.

Bizim iqtisadi əlaqələrimizin inkişafı üçün də çox gözəl perspektivlər var. Mən əminəm ki, bu səfər və səfərin nəticələri bu sahədə də əməkdaşlığın dərinləşməsinə gətirib çıxaracaqdır.

Hörmətli cənab Prezident, bu gün biz sizinlə iki ölkə arasında siyasi Bəyannaməni imzaladıq. Bu Bəyannamədə ikitərəfli münasibətlərin bütün aspektləri öz əksini tapıbdır. Bəyannamə gələcək əməkdaşlıq üçün çox gözəl sənəddir. Xüsusilə Bəyannamədə və Sizin bugünkü çıxışlarınızda səslənən və Azərbaycanın ərazi bütövlüyünə aid olan məsələlər bizdə xüsusi məmnunluq hissi oyadır.

Polşa bütün dövrlərdə Ermənistan-Azərbaycan, Dağlıq Qarabağ münaqişəsinin beynəlxalq hüquq normalarına uyğun şəkildə, ölkələrin ərazi bütövlüyü çərçivəsində həll olunmasının tərəfdarı olmuşdur. Siz bu mövqeyi bu gün də təkrarladınız. Bu, münaqişənin həlli üçün çox əhəmiyyətlidir. Azərbaycanın ərazi bütövlüyü toxunulmazdır, danışıqlar predmeti olmayıb və olmayacaqdır. Məsələ Azərbaycanın ərazi bütövlüyü çərçivəsində həll olunmalıdır və beynəlxalq dəstək, dünyanın aparıcı ölkələrinin bu barədəki mövqeləri, əlbəttə, məsələnin həlli üçün gözəl şərait yaradır.

Azərbaycanlılar münaqişə zamanı etnik təmizləmə siyasətinə məruz qalmışdır. Bir milyondan artıq azərbaycanlı öz doğma torpaqlarından zorla çıxarılmışdır. Onu da deyə bilərəm ki, düz 16 il bundan əvvəl - 1992-ci il fevralın 26-da Ermənistanın Azərbaycana qarşı etnik təmizləmə siyasəti aparması qeydə alınmışdır. Məhz o gün Azərbaycan şəhəri Xocalı Ermənistanın təcavüzünə məruz qalmışdır və azərbaycanlılara qarşı soyqırımı törədilmişdir. O gecə 600-dən çox dinc insan qətlə yetirilmişdir. Onlardan 63-ü uşaq, 106-sı isə qadın olmuşdur. Bu, çox böyük cinayətdir. Biz, əlbəttə, danışıqlar zamanı öz prinsipial mövqeyimizdən dönməyəcəyik və çalışacağıq ki, məsələ öz həllini tapsın. Bayaq qeyd etdiyim kimi, ölkələrin ərazi bütövlüyü çərçivəsində.

Hazırda bizim aramızda çox geniş enerji dialoqu aparılır. Sizin təşəbbüsünüzlə keçən ilin may ayında Krakovda keçirilən birinci enerji sammitinin nəticələri çox ümidverici olmuşdur. Ondan sonra biz Litvada görüşdük. Bu il yenə də görüşəcəyik və enerji sahəsində əməkdaşlıq, əlbəttə, həm iki ölkə arasında münasibətlərə çox gözəl təsir göstərir, həm də regional əməkdaşlıq məsələlərində öz müsbət rolunu oynayır.

Biz indi Xəzər dənizi-Qara dəniz-Baltik dənizi əməkdaşlıq çərçivələrini müəyyən edirik və bu istiqamətdə enerji amili, əlbəttə, mühüm rol oynayır. Azərbaycan həm neft, həm də qaz hasil və ixrac edən ölkəyə çevrilmişdir. Bizim zəngin yataqlarımızdakı neft-qaz artıq dünya bazarlarına, o cümlədən Avropa İttifaqı bazarına çatdırılmışdır. Gələcəkdə biz öz hasilatımızı daha da artıracağıq. Bu il Azərbaycanda neftin hasilatı 53 milyon ton olacaqdır. Qazın təhvil verilməsi təxminən 18 milyard kubmetr olacaqdır. Amma, əlbəttə, potensial daha da böyükdür və bu sahədə, xüsusilə qaz sahəsində əməkdaşlıqda həm istehsalçılar, həm də istehlakçılar fəal iştirak etməlidir və iki tərəfin maraqları maksimum dərəcədə müəyyən olunmalıdır. Bu sahədə çox güclü koordinasiya işləri aparılmalıdır. Deyə bilərəm ki, cənab Prezident, sizin təşəbbüsünüzlə Krakov sammitinin əsas mahiyyəti, əsas müsbət cəhətləri məhz onda idi ki, biz, bir neçə ölkənin prezidentləri bir araya gəldik və beləliklə, gələcək inkişaf parametrlərini müəyyən etdik. Növbəti mərhələdə biz artıq praktiki işlərə keçməliyik və mən şübhə etmirəm ki, bu sahədə də əldə ediləcək uğurlar müsbət olacaq və regional əməkdaşlığa çox gözəl təkan verəcəkdir.

Bizim aramızda olan münasibətlər çoxşaxəlidir. Həm iqtisadi, həm energetika, həm siyasi, həm də humanitar sahədə çox gözəl perspektivlərimiz var. Biz dost ölkələrik, strateji tərəfdaşlıq çərçivəsində öz münasibətlərimizi qururuq və bundan sonra da çalışacağıq ki, bu münasibətləri yüksək səviyyədə saxlayaq.

Mən aparılan danışıqlardan çox razıyam. Onlar çox uğurlu olmuşdur. Əminəm ki, bu danışıqlar və gələcək görüşlərimiz ikitərəfli münasibətlərin inkişafı üçün çox mühüm vasitə olacaq və Polşa-Azərbaycan dostluğu davam edəcəkdir.

Cənab Prezident, bizə göstərdiyiniz bu qonaqpərvərliyə görə, məni Polşanın yüksək dövlət mükafatı ilə təltif etdiyinizə görə sizə bir daha minnətdaram.

######