AZƏRBAYCAN RESPUBLİKASI BƏDƏN TƏRBİYƏSİ VƏ İDMAN VETERANLARI İTTİFAQI ÜZVLƏRİNİN RESPUBLİKA İDMAN İCTİMAİYYƏTİNƏ MÜRACİƏTİ
-Əziz idmançılar!
Əziz dostlar!
Biz, yaşlı nəslə mənsub olan idman mütəxəssisləri, idman hərəkatının peşəkarları sizə belə bir təşəbbüslə müraciət edirik. İnsanın sağlamlığı təkcə fiziki hərəkətlərlə təmin olunmur. Sağlamlığı yaradan və möhkəmləndirən bir çox təbii amillər var. İnsanın iradəsi ilə tənzimlənən belə amillərdən biri və ən mühümü təbiəti yaşıllaşdırmaqdır.
Müdrik rəhbərimiz cənab Heydər Əliyev Azərbaycana rəhbərlik etdiyi ilk günlərdən yaşıllaşdırma məsələlərinə xüsusi diqqət vermiş, xalqımızı bu xeyirxah işə cəlb etmiş, Bakı şəhərində yaşıllaşdırma daha intensiv aparılmışdır. 1970-ci ildən başlayaraq cənab Heydər Əliyev Bakıda hərəyə iki ağac əkib qulluq etməyi qarşıya vəzifə qoymuşdu. Vaxtilə irəli sürülmüş bu xeyirxah işdən idman təşkilatları da kənarda qalmamış, idman qurğularını abadlaşdırmış və yaşıllaşdırmışlar.
Cənab Heydər Əliyevin “Bakını Gülüstana çevirək!” çağırışına həmin illərdə biz idmançılar da böyük həvəslə qoşulmuşduq. Tarixi günlərə həsr edilmiş iməciliklərdə minlərlə idmançı mütəşəkkil qaydada iştirak edir, ağac əkir, onlara qulluq edirdi. O vaxt hər bir idmançı təbiəti qorumağı, yaşıllıqları artırmağı və ona qulluq etməyi özünə borc bilirdi.
Hazırda Bakıda istirahət və mədəniyyət parkları yaradılmaqdadır və bu iş getdikcə genişlənir.
Ölkəmiz müstəqillik əldə etdikdən, xüsusilə cənab Heydər Əliyevin hakimiyyətə qayıdışından sonra bütün sahələrdə olduğu kimi, Azərbaycanın idman həyatında da böyük dönüş yaranmışdır. Ölkəmizin başçısının idmana, idmançılara qayğısı artmışdır. İdmançıların əməyi layiqincə qiymətləndirilir. Bunun müqabilində idman mütəxəssisləri də daha məhsuldar və fədakar işləməyə çalışır, dünya, Avropa birinciliklərində, olimpiya oyunlarında uğurla çıxış edə biləcək idmançılar hazırlamağa səy göstərirlər.
Biz qocaman idman mütəxəssisləri yaxşı başa düşürük ki, 2003-cü il idman hərəkatının fəalları, xalqımız və 50 milyonluq dünya azərbaycanlıları üçün əlamətdar bir il olacaqdır. Həmin il mayın 10-da dünya şöhrətli bir siyasətçinin, xalqımızın əvəzsiz lideri və pənahı olan cənab Heydər Əlirza oğlu Əliyevin 80 yaşı tamam olur. Biz veteranlar bu tarixi hadisə ilə əlaqədar gənclərimizi idmanda yüksək nəticələr göstərməyə, bütün idman ictimaiyyətini isə bu bayram şərəfinə “İdman+yaşıllıq=sağlamlıq” devizi altında idman qurğularının yaşıllaşdırılması kampaniyasında iştirak etməyə çağırırıq.
Biz, İdman Veteranları İttifaqının üzvləri isə hörmətli rəhbərimiz cənab Heydər Əliyevin 80 illik yubileyi şərəfinə Maştağa Olimpiya Kompleksinin ərazisində 160 ağac əkəcək, bu kampaniyaya övladlarımızı, nəvələrimizi və tələbələrimizi də cəlb edəcəyik.
İdman Veteranları İttifaqının üzvləri adından
Əbdül Sadıqov
İttifaqın sədri, əməkdar bədən tərbiyəsi və idman xadimi
Bölmənin digər xəbərləri
