AZƏRBAYCAN RESPUBLİKASININ XALQ ARTİSTİ MƏMMƏDBAĞIR BAĞIRZADƏNİN VAXTSIZ VƏFATI İLƏ ƏLAQƏDAR AİLƏSİNƏ BAŞSAĞLIĞI

01.11.2005 [18:41]
Çap et
A⁺ A^-

Xalqımızın sevimli müğənnisi, xalq artisti Məmmədbağır Bağırzadənin vaxtsız vəfatı haqqında xəbər hamı kimi, bizi də sarsıtdı. Uzunmüddətli fəaliyyəti ərzində öz ədəb-ərkanı, yüksək mədəniyyəti, bənzərsiz səsi, gözəl ifaçılıq qabiliyyəti, şux mahnıları ilə minlərlə pərəstişkarının məhəbbətini qazanmış bu istedadlı sənətçi bir çox muğam və xalq təranələrinin, tanınmış bəstəkarların mahnılarının mahir ifaçısı kimi hamının qəlbinə yol tapmış, milli musiqi sənətini xeyli zənginləşdirmiş, Azərbaycan musiqisi tarixində özünəməxsus və layiqli yer tutmuşdur. Onun bəstələdiyi və ilk dəfə ifa etdiyi bir çox mahnılar sonralar dillər əzbəri olmuş, xalqımızı yaşamağa, yaratmağa səsləmişdir.

Bu ağır, kədərli gündə yeganə təsəllimiz odur ki, gözəl insan, zəngin təcrübəsini səxavətlə tələbələrinə ərməğan edən müəllim, istedadlı xanəndə olan Məmmədbağır Bağırzadənin əziz xatirəsi, ifa etdiyi nəğmələr, bütövlükdə onun gərəkli fəaliyyəti qədirbilən xalqımız tərəfindən heç zaman unudulmayacaqdır.

Ulu Tanrıdan mərhuma rəhmət diləyirik, onun ailəsinə və yaxınlarına dərin hüznlə başsağlığı veririk.

Allah rəhmət eləsin, qəbri nurla dolsun!

Dərin hörmətlə,

Mehriban Əliyeva