“Azərbaycan tarixi - arxeoturizm” layihəsi həyata keçiriləcəkdir
Bakı, 21 iyun (AZƏRTAC). Badamdar qəsəbə mədəniyyət evinin nəzdində fəaliyyət göstərən “Gənc turist” klubu iyul ayından başlayaraq “Azərbaycan tarixi - arxeoturizm” layihəsini həyata keçirəcəkdir.
Mədəniyyət evindən AZƏRTAC-a bildirmişlər ki, layihənin reallaşacağı iki ay ərzində gənclər və yeniyetmələr üçün arxeoloji turlar təşkil ediləcəkdir. Məqsəd gənc nəsli ölkəmizdə aparılan arxeoloji qazıntılarla tanış etmək və bu yolla onların Vətənimizin tarixini dərindən öyrənmələrinə kömək göstərməkdir.
Arxeoloji turizm layihəsinə qatılanlar qruplara bölünərək həftədə bir dəfə bir neçə arxeoloji düşərgəyə baş çəkəcək, oradakı işlərlə tanış olacaq, arxeoloqlarla və tarixçilərlə görüşəcəklər. Turlar zamanı çəkilən fotoşəkillər internetdə yerləşdiriləcək, sosial şəbəkələrdə yayımlanacaqdır.
Sonda görülən işləri əks etdirən kitab-kataloqun hazırlanacağı planlaşdırılmışdır.
Bölmənin digər xəbərləri
