“Azərbaycan tarixi – arxeoturizm” layihəsi start götürür
Bakı, 18 iyun (AZƏRTAC). Badamdar Qəsəbə Mədəniyyət evinin nəzdində fəaliyyət göstərən “Gənc turist” klubu iyul ayından etibarən “Azərbaycan tarixi - arxeoturizm” layihəsinin həyata keçirilməsinə başlayacaqdır.
Klubun rəhbəri Cəfər Mənsimi AZƏRTAC-a bildirmişdir ki, layihənin keçiriləcəyi iki ay ərzində gənclər və yeniyetmələr üçün arxeoloji turlar təşkil ediləcəkdir.
Məqsəd gənc nəsli ölkəmizdə aparılan arxeoloji qazıntılarla tanış etmək və bu yolla Vətənimizin tarixini dərindən öyrənməyə kömək etməkdir.
Arxeoloji turizm layihəsinə qatılanlar qruplara bölünərək həftədə bir dəfə bir neçə arxeoloji düşərgəyə baş çəkəcək, oradakı işlərlə tanış olacaq, arxeoloqlarla və tarixçilərlə görüşəcəklər. Turlar zamanı çəkilən fotoşəkillər internetdə yerləşdiriləcək, sosial şəbəkələrdə yayımlanacaqdır.
Layihə ilə bağlı Bakı Şəhəri Mədəniyyət və Turizm İdarəsinə müraciət olunduğunu qeyd edən C.Mənsimi vurğulamışdır ki, müraciətə müsbət cavab verilərsə, layihəyə iyul ayının 1-dən start veriləcək və səkkiz həftə ərzində hər həftənin istirahət günləri Azərbaycanın müxtəlif yerlərinə səfərlər təşkil ediləcəkdir. Bu qəbildən ilk səfərin qədim Ağsu şəhəri ərazisində aparılan irimiqyaslı qazıntı sahəsinə edilməsi nəzərdə tutulmuşdur.
Sonda görülən işləri əks etdirən kitab-kataloq hazırlanacaqdır.
Bölmənin digər xəbərləri
