Azərbaycan Turizm İnstitutu regionda peşəkar mərkəz olacaqdır
Bakı, 14 sentyabr (AZƏRTAC). Ölkəmizin əlverişli coğrafi mövqeyi, təbii sərvətləri, iqlim şəraiti onun inkişafını şərtləndirən mühüm amillərdəndir. Ulu Tanrı Azərbaycana füsunkar təbiət, xalqına gözəl mənəviyyat bəxş etmişdir. Azərbaycanın təbiəti, müalicəvi sərvətləri, xalqımızın qonaqpərvərliyi, adət-ənənələrimiz əsrlər boyu əcnəbi səyyahların gündəliklərində əks olunaraq müasir dövrümüzə qədər gəlib çatmışdır.
Bu gün Azərbaycan siyasi sabitliyinə, iqtisadi inkişafına görə dünyanın diqqət mərkəzindədir. Ölkədə keçirilən beynəlxalq tədbirlər, qlobal proseslərə təsir etmək imkanı, onun Qafqaz regionunda mövqeyi dünya dövlətlərinin Azərbaycana marağını artırır və nəticədə əcnəbilərin ölkəmizə axını gündən-günə çoxalır. Birinci dəfə ölkəmizin müxtəlif bölgələrinə işgüzar məqsədlə səfər edən xarici vətəndaşlar növbəti dəfə səfalı yerlərimizi istirahət məkanı kimi seçirlər. Həmçinin təbii müalicə sanatoriyalarımıza da şəfa tapmaq ümidi ilə gələnlərin sayı artmaqdadır. Son vaxtlar paytaxt sakinləri də bölgələrdə istirahətə üstünlük verirlər.
Azərbaycanda genişlənən və inkişaf edən turizm sənayesində peşəkar kadrlara böyük ehtiyac vardır. Bunu nəzərə alan Prezident İlham Əliyev 2006-cı ildə Mədəniyyət və Turizm Nazirliyinin nəzdində Azərbaycan Turizm İnstitutunun (ATİ) yaradılması haqqında Fərman imzalamışdır.
Gənc olmasına baxmayaraq bu institut ölkənin ali məktəbləri arasında, necə deyərlər, öz dəst-xətti ilə seçilə bilmişdir. Geniş beynəlxalq əlaqələri olan ATİ ölkədə yeganə ali məktəbdir ki, ikili diplom proqramını həyata keçirir. Avstriyanın Krems Tətbiqi Elmlər Universiteti (TEU) ilə bağlanmış müqavilə əsasında birinci kursu uğurla bitirən tələbə ingilis dili üzrə 6.0 nəticəni əldə etdikdən sonra proqramın iştirakçısı olur.
ATİ-nin tədris işləri üzrə prorektoru Eldar Aslanov AZƏRTAC-a bildirmişdir ki, bu il 19 tələbə məhz TEU-nun rektoru, professor xanım Eva Vernerin şəxsən iştirakı ilə keçirilmiş dövlət imtahanının nəticələrinə əsasən məzun olmuşdur və onlara iki diplom təqdim edilmişdir. İnstitutun təhsil şəraiti, zəngin kitabxanası, peşəkar müəllim kollektivi gələcəkdə iki diplom alan məzunların sayının artacağı haqqında fikir yürütməyə imkan verir. Yaxın vaxtlarda magistratura təhsili üzrə də TEU ilə müqavilə bağlanması planlaşdırılır.
ATİ Avropa İttifaqının Erasmus Mundus “Xarici Əməkdaşlıq Mübadilə Proqramı”nın ölkəmiz üzrə əlaqələndiricisidir. Proqram çərçivəsində Avropanın 16 universiteti ilə əməkdaşlıq edilir. Hazırda institutun bir neçə əməkdaşı Avropa ölkələrindədir və həmçinin Azərbaycana da tələbələrin gələcəyi gözlənilir. Bu ildən Almaniyanın Yade Universiteti ilə müntəzəm tələbə mübadiləsinin həcmi genişlənmişdir.
Prorektor bildirmişdir ki, yaxın vaxtlarda Elmi Şurada Almaniyanın Bremen İnstitutunun beynəlxalq turizm təhsili sahəsində əməkdaşlığa dair təklifinə baxılacaqdır. Ümumiyyətlə, Azərbaycan Turizm İnstitutu bir sıra universitetlər şəbəkəsinin üzvüdür.
Dünya Turizm Təşkilatına (DTT) assosiativ üzv kimi qəbul edilmiş institut 2016-cı ilədək onun keyfiyyət sertifikatını (TEDQUAL) almaq niyyətindədir. “Biz Azərbaycan Turizm İnstitutunu regional təhsil və treninq mərkəzinə çevirmək niyyətindəyik”, - deyən prorektorun sözlərinə görə, Azərbaycan DTT-nin alt (sub) zonasına daxildir. Sertifikat və regional səlahiyyət instituta Cənubi Qafqaz və Mərkəzi Asiya ölkələrində turizm təhsili və tədqiqatlarına elmi-metodiki rəhbərlik etməyə, bu bölgələrdə DTT-nin bütün tədbirlərinə ev sahibliyinə imkan verəcəkdir.
ATİ-nin başqa bir özəlliyi məzunlarının iş problemlərinin olmamasındadır. Bu gün bazarda yaxşı kadra ehtiyac vardır. Ölkəmizdə fəaliyyət göstərən məşhur “Hilton” və “Kempinski” şəbəkələrindən olan turizm xidmətləri sahələri özlərinə institutun tələbələrindən işçilər seçirlər. Prorektor Eldar Aslanov yalnız hərbi xidmətə görə oğlanlar istisna olmaqla, məzunların hamısının işlə təmin olunduğunu bildirmişdir.
Turizmin inkişafı ölkə rəhbərinin gündəlik nəzarətindədir. Azərbaycan Respublikasının Prezidenti İlham Əliyevin Sərəncamı ilə 2011-ci il “Turizm ili” elan olunmuşdur. Bununla bağlı Prezidentin təsdiq etdiyi Tədbirlər Planında Azərbaycan Turizm İnstitutunun nəzdində Bakı Turizm Peşə Məktəbinin yaradılması nəzərdə tutulmuşdur. Bu, gələcəkdə turizm obyektlərində xidmət heyətinin peşəkar kadrlardan təşkil olunmasına imkan yaradacaqdır. Beləliklə, yaxın gələcəkdə ATİ kadr hazırlığını peşə istiqamətində də aparacaqdır.
Kadr hazırlığını həm də elmi tədqiqatlar istiqamətində aparan ATİ-yə bu il doktorantura üçün 16 yer ayrılmışdır. Hazırda doktoranturaya sənədlərin qəbulu davam edir və oktyabrda imtahanlar başlanacaqdır.
ATİ-də turizm tədqiqatlarına xüsusi yer ayrılmışdır. İnstitutun Tədqiqat və İnkişaf Mərkəzində 20-dən çox elmi əhəmiyyəti olan tədqiqat aparılmışdır. Lənkəran, Zaqatala, Göygöl, Samur-Yalama bölgələri, Altıağac milli parkı və bölgəsi, Şirvan Milli Parkı və Qoruğu ərazilərinin turizm potensialı, Azərbaycanda turizm sektoru haqqında hesabatlar hazırlanmışdır.
İnstitut yeni tədris ilinə tam hazırdır. Bu il ali təhsil ocağına 318 tələbə qəbul olunmuşdur. Onların qəbul imtahanlarında göstəriciləri 500-600 bal arasındadır. Tələbə qəbulunun nəticələrinə görə institut ölkədə 3-cü yerdədir.
Qarşıdan 27 sentyabr - Dünya Turizm Günü gəlir. Bu münasibətlə institutda gənc alimlərin məqalə müsabiqəsi, kitabxanada yeni kitab sərgisinin keçirilməsi kimi daxili tədbirlər nəzərdə tutulmuşdur.
Noyabr ayında xarici ölkələrdən təcrübədən qayıtmış tələbələrin komissiya qarşısında təqdimatları olacaqdır.
Cəmi 6 yaşı olan ATİ-nin kadr hazırlığında, turizm tədqiqatlarında, beynəlxalq əlaqələrində əldə etdiyi nailiyyətlərə əsaslanaraq demək olar ki, bu təhsil müəssisəsi öz missiyasını uğurla yerinə yetirir və yaxın gələcəkdə onun turizm təhsili, tədqiqi və təlimi sahələrində regionda lider və peşəkar mərkəz olmağa şansı böyükdür.
Bölmənin digər xəbərləri
