Azərbaycan Türk dünyasında strateji əməkdaşlığa mühüm töhfə verir ŞƏRH
Bakı, 29 iyun, AZƏRTAC
Azərbaycan Türk dünyasının əməkdaşlıq prosesinə yalnız iştirakçı ölkə kimi deyil, bu birliyin strateji təşəbbüskarlarından biri kimi mühüm töhfələr verir. Xüsusilə Vətən müharibəsində qazanılan tarixi Qələbədən sonra ölkəmizin Türk dünyasının siyasi, iqtisadi, humanitar və mədəni inteqrasiyasının dərinləşdirilməsi istiqamətində rolu daha da artıb. Bu gün Azərbaycanın təşəbbüsü ilə həyata keçirilən layihələr və irəli sürülən ideyalar türk dövlətləri arasında qarşılıqlı etimadın möhkəmlənməsinə, ortaq strateji baxışın formalaşmasına və uzunmüddətli əməkdaşlıq mexanizmlərinin inkişafına xidmət edir.
Bu sözləri AZƏRTAC-a açıqlamasında beynəlxalq məsələlər üzrə ekspert Əziz Əlibəyli söyləyib.
“Türkoloji Qurultayın keçirilməsi də bu baxımdan xüsusi əhəmiyyət daşıyır. Hesab edirəm ki, belə platformalar təkcə elmi müzakirələr üçün deyil, həm də Türk dünyasının gələcək inkişaf konsepsiyasının müəyyənləşdirilməsi baxımından mühüm rol oynayır. Qurultay türk xalqlarının ortaq tarixi yaddaşının, dil birliyinin, mədəni irsinin və mənəvi dəyərlərinin daha sistemli şəkildə araşdırılmasına, eyni zamanda, türk dilləri əsasında ortaq ideoloji yanaşmaların, strateji baxışların və gələcək fəaliyyət istiqamətlərini müəyyən edən yol xəritəsinin hazırlanmasına mühüm töhfə verə bilər. Bu gün beynəlxalq münasibətlər sistemi sürətlə dəyişir və yeni qlobal nizam formalaşma mərhələsindədir. Bu proses geosiyasi qarşıdurmalar, regional münaqişələr, iqtisadi rəqabət və təhlükəsizlik çağırışları fonunda davam edir. Belə mürəkkəb şəraitdə Türk dünyasının malik olduğu demoqrafik, iqtisadi, enerji, nəqliyyat-logistika və geostrateji potensialın vahid platformada birləşdirilməsi xüsusi əhəmiyyət kəsb edir. Düşünürəm ki, bu potensial düzgün istiqamətləndirildiyi təqdirdə Türk dünyası beynəlxalq münasibətlər sistemində mühüm güc mərkəzlərindən birinə çevrilə bilər. Türk Dövlətləri Təşkilatı artıq regional əməkdaşlıq çərçivəsini aşaraq daha geniş geosiyasi əhəmiyyət kəsb edən təsisat kimi çıxış edir. Bununla belə, təşkilatın institusional imkanlarının genişləndirilməsi, qərarların icra mexanizmlərinin daha çevik və səmərəli qurulması, üzv dövlətlər arasında koordinasiyanın gücləndirilməsi və birgə layihələrin sayının artırılması qarşıda duran əsas vəzifələrdəndir”, - deyə Ə.Əzizbəyli diqqətə çatdırıb.
O hesab edir ki, yeni qlobal nizam tam formalaşmamışdan əvvəl Türk dünyasının vahid siyasi iradə nümayiş etdirməsi, ortaq maraqlar ətrafında daha sıx birləşməsi və mövcud üstünlüklərini vahid strateji yanaşma əsasında əlaqələndirməsi zəruridir. Bu məqsədlə elm, təhsil, rəqəmsal texnologiyalar, iqtisadiyyat, nəqliyyat, enerji, təhlükəsizlik və humanitar sahələrdə çoxşaxəli əməkdaşlıq layihələrinin həyata keçirilməsi, beynəlxalq forumların, elmi platformaların və ortaq təşəbbüslərin sayının artırılması mühüm əhəmiyyət daşıyır. Bütün bunlar Türk dünyasının qlobal proseslərdə vahid orqan kimi çıxış etməsinə, beynəlxalq nüfuzunun daha da möhkəmlənməsinə və gələcək inkişafının dayanıqlı əsaslar üzərində qurulmasına xidmət edəcək.
Bölmənin digər xəbərləri
