Azərbaycan-Türkmənistan münasibətləri regional əməkdaşlığın mühüm dayağına çevrilib - ŞƏRH
Bakı, 28 iyun, AZƏRTAC
Azərbaycan ilə Türkmənistan arasında münasibətlər son illərdə keyfiyyətcə yeni mərhələyə yüksələrək siyasi, iqtisadi, nəqliyyat-logistika, enerji və humanitar sahələrdə strateji tərəfdaşlıq səviyyəsinə çatıb. İki ölkə arasında formalaşmış qarşılıqlı etimad, ortaq tarixi köklər, mədəni yaxınlıq və qardaşlıq münasibətləri əməkdaşlığın davamlı inkişafı üçün möhkəm zəmin yaradır.
Bu sözləri AZƏRTAC-a açıqlamasında Milli Məclisin deputatı Əlibala Məhərrəmzadə söyləyib.
O bildirib ki, Qarabağda aparılan bərpa və yenidənqurma işlərinə Türkmənistanın verdiyi dəstək iki ölkə arasında yüksək etimadın və qarşılıqlı həmrəyliyin bariz nümunəsidir. Füzuli şəhərində məscidin inşası layihəsi təkcə humanitar təşəbbüs deyil, həm də işğaldan azad edilmiş ərazilərin dirçəldilməsinə Türk dünyasının mənəvi dəstəyini əks etdirən mühüm addımdır. Bu yanaşma Azərbaycanın ərazi bütövlüyünə verilən dəstəyin və qardaşlıq münasibətlərinin praktik ifadəsidir.
Mədəni-humanitar əməkdaşlıq da ikitərəfli münasibətlərin əsas istiqamətlərindən biridir. Qarşılıqlı Mədəniyyət Günlərinin keçirilməsi, yaradıcı kollektivlərin mübadiləsi, Bakı və Aşqabad, eləcə də Füzuli və Arkadağ şəhərləri arasında qardaşlaşma münasibətlərinin qurulması xalqlar arasında tarixi və mənəvi bağların daha da möhkəmlənməsinə xidmət edir. Bu istiqamətdə həyata keçirilən layihələr dövlətlərarası əlaqələrin ictimai dayaqlarını gücləndirərək gələcək əməkdaşlıq üçün əlverişli mühit formalaşdırır.
“Azərbaycanın Mərkəzi Asiya ilə əlaqələrinin genişlənməsi və bu istiqamətdə əməkdaşlığın dərinləşməsi regionlararası inteqrasiyanın mühüm tərkib hissəsinə çevrilib. Ortaq tarix, mədəniyyət və iqtisadi maraqlar, eləcə də nəqliyyat-kommunikasiya layihələri Azərbaycanın Mərkəzi Asiya ölkələri ilə münasibətlərinin daha da inkişaf etməsinə geniş imkanlar yaradır.
Nəqliyyat-logistika sahəsində əməkdaşlıq isə Azərbaycan-Türkmənistan tərəfdaşlığının strateji istiqamətlərindən biri kimi çıxış edir. Hər iki ölkə Transxəzər Beynəlxalq Nəqliyyat Marşrutunun inkişafında mühüm rol oynayır və Şərq-Qərb dəhlizinin səmərəli fəaliyyətində əsas tərəfdaşlar sırasındadır. Yükdaşımaların artırılması, tranzit imkanlarının genişləndirilməsi və yeni beynəlxalq yük axınlarının cəlb olunması istiqamətində əməkdaşlığın dərinləşdirilməsi təkcə iki ölkənin deyil, bütövlükdə Avrasiya məkanının iqtisadi və logistik təhlükəsizliyi baxımından strateji əhəmiyyət daşıyır. Bu əməkdaşlıq bir daha göstərir ki, iri regional layihələrin uğuru qarşılıqlı siyasi etimada və koordinasiyaya əsaslanır.
Enerji sahəsində əməkdaşlığın genişləndirilməsi də mühüm perspektivlər vəd edir. Azərbaycanın və Türkmənistanın zəngin enerji ehtiyatları regional və beynəlxalq enerji təhlükəsizliyinin təmin olunmasına, yeni ixrac marşrutlarının inkişafına və qarşılıqlı faydalı layihələrin həyata keçirilməsinə geniş imkanlar yaradır”, - deyə Ə. Məhərrəmzadə vurğulayıb.
Deputat əlavə edib ki, iki ölkə arasında münasibətlərin inkişafı yalnız iqtisadi və siyasi sahələrlə məhdudlaşmır. Qarşılıqlı hörmətə əsaslanan münasibətlər, beynəlxalq platformalarda əməkdaşlıq və regional sabitliyə verilən töhfələr strateji tərəfdaşlığın daha da möhkəmlənməsinə xidmət edir. Bu əməkdaşlığın hüquqi bazasının davamlı şəkildə genişləndirilməsi və yeni sənədlərlə zənginləşdirilməsi gələcək birgə layihələrin uğurla reallaşdırılması üçün etibarlı əsas formalaşdırır.
Azərbaycan ilə Türkmənistan arasında münasibətlər artıq ənənəvi dostluq çərçivəsini aşaraq regional əməkdaşlığın, nəqliyyat-logistika layihələrinin, enerji təhlükəsizliyinin və iqtisadi inteqrasiyanın mühüm dayaqlarından birinə çevrilib. Bu strateji tərəfdaşlıq regionda sabitliyin, qarşılıqlı rifahın və dayanıqlı inkişafın möhkəmlənməsinə əhəmiyyətli töhfə verir.
Eyni zamanda, bu əməkdaşlığın Türk Dövlətləri Təşkilatı çərçivəsində daha da inkişaf etdirilməsi xüsusi önəm daşıyır. Ortaq tarixə, dilə, mədəniyyətə və strateji maraqlara əsaslanan Azərbaycan–Türkmənistan tərəfdaşlığı təşkilat daxilində siyasi həmrəyliyin möhkəmlənməsinə, nəqliyyat və enerji layihələrinin əlaqələndirilməsinə, iqtisadi-ticarət münasibətlərinin genişlənməsinə və humanitar əməkdaşlığın dərinləşməsinə mühüm töhfə verəcək. Bu baxımdan, iki qardaş ölkə arasında inkişaf edən münasibətlər bütövlükdə Türk Dövlətləri Təşkilatının güclənməsinə, Türk dünyasının birliyinin möhkəmlənməsinə və regionda sülh, sabitlik və davamlı inkişafın təmin olunmasına xidmət edən mühüm amillərdən biridir.
Bölmənin digər xəbərləri
