İQTİSADİYYAT
Azərbaycan və İsrail auditorları arasında kadr hazırlığı sahəsində təcrübə mübadiləsi müzakirə olunub
![](/files/galleryphoto/2023/2/1200x630/w_1616905331005066434595_1200x630.jpg)
![](/files/galleryphoto/2023/2/1200x630/w_161690533101340773532_1200x630.jpg)
![](/files/galleryphoto/2023/2/1200x630/w_1616905331016257329163_1200x630.jpg)
Bakı, 28 iyul, AZƏRTAC
Azərbaycan Respublikasının Prezidenti İlham Əliyevin proqram xarakterli göstərişlərini rəhbər tutaraq, müstəqil maliyyə nəzarəti sahəsində mütərəqqi dünya təcrübəsini öyrənmək və milli iqtisadiyyatın xüsusiyyətlərini nəzərə almaqla ölkəmizdə tətbiqini genişləndirmək və beynəlxalq təcrübədən daha səmərəli bəhrələnmək məqsədilə iyulun 28-də Auditorlar Palatası ilə İsrailin Sertifikatlaşdırılmış İctimai Mühasiblər İnstitutu arasında Anlaşma Memorandumunun imzalanmasına dair tədbir keçirilib.
AZƏRTAC xəbər verir ki, Auditorlar Palatasının sədri, professor Vahid Novruzov 1931-ci ildə yaradılmış, BMF-nin qurucularından biri olan və 1977-ci ildən həmin beynəlxalq qurumun üzvü olan İsrailin Sertifikatlaşdırılmış İctimai Mühasiblər İnstitutunun peşəkar milli qurum olaraq İsrailin bütün ərazisində mühasibatlıq və audit peşələrinin inkişafında həlledici rol oynadığını deyib. Bildirib ki, Ümummilli Lider Heydər Əliyevin adı ilə bilavasitə bağlı olan müstəqil auditin ölkəmizdə formalaşdırılması və onun normativ hüquqi bazasının yaradılması qısa zaman kəsiyində maliyyə nəzarətinin bu müstəqil növünün uğurlu inkişafına imkan yaradıb. Ölkəmizdə auditor fəaliyyətinin dövlət tənzimlənməsi Auditorlar Palatası tərəfindən həyata keçirilir. Palatanın fəaliyyəti dövründə ölkədə beynəlxalq audit standartlarının tətbiqi reallaşdırılmış, auditor kadrlarının hazırlanması, normativ metodiki bazanın yaradılması, auditorların fəaliyyətinə effektiv nəzarətin qurulması sahəsində xeyli iş görülüb. Palata beynəlxalq və regional peşə qurumlarında, o cümlədən Beynəlxalq Mühasiblər Federasiyası və Avropa Mühasiblər və Auditorlar Federasiyası kimi çox nüfuzlu mötəbər təşkilatlarda 2008-ci ildən ölkəmizi layiqincə təmsil edir.
Vahid Novruzov qeyd edib ki, hər iki qurum arasındakı əməkdaşlıq iqtisadi inkişafın müasir mərhələsində şəffaflığın təmin edilməsində və hesabatlılığın yüksək səviyyədə qurulmasında, kölgə iqtisadiyyatının aradan qaldırılmasında, dövlət və qeyri-dövlət nəzarətinin, o cümlədən müstəqil auditin rolunun getdikcə artırılmasına, bu sahədə mövcud olan problemlərin və qarşıda duran vəzifələrin yerinə yetirilməsinə geniş imkanlar yaradacaq: “Bu sahədə İsrailin böyük nailiyyətlərindən bizim xəbərimiz var və biz ölkə iqtisadiyyatında şəffaflığı artırmaq üçün bu müsbət təcrübədən istifadə etmək və qeyri-dövlət maliyyə nəzarətinin səviyyəsini yüksəltmək, rəqəmsallaşmanı geniş tətbiq etmək istəyirik. Ümidvaram ki, İsrailli həmkarlarımız da auditin innovativ inkişafı, kölgə iqtisadiyyatına qarşı mübarizə və auditdə rəqəmsallaşmanın tətbiqi sahəsində bizim əldə etdiyimiz nəticələrdən bəhrələnə biləcəklər”.
İsrailin Sertifikatlaşdırılmış İctimai Mühasiblər İnstitutunun (ICPAI) prezidenti Çen Şrayber qurumlar arasındakı əməkdaşlığın tərəflərin fəaliyyət göstərdiyi ərazilərdə mühasiblərin, auditorların və digər bu kimi peşə sahiblərinin inkişafında, təşkilatların üzvlərinin peşə səviyyəsinin yüksəldilməsində, tərəflərin mütəxəssisləri arasında işgüzar əlaqələrin yaradılmasında böyük rol oynayacağını vurğulayıb. Eyni zamanda, Çen Şrayber İsrailin Sertifikatlaşdırılmış İctimai Mühasiblər İnstitutunun fəaliyyəti barədə iştirakçılara geniş məlumat verib və qeyd edib ki, Azərbaycan Respublikasının Auditorlar Palatası ilə İsrailin Sertifikatlaşdırılmış İctimai Mühasiblər İnstitutu arasında bundan sonra əlaqələr daha sıx şəkildə olacaq və qurumlarımız arasında istər audit, istərsə də mühasibatlıq sahəsində təcrübə mübadiləsi aparılacaq.
Sonra Azərbaycan Respublikasının Auditorlar Palatası ilə İsrailin Sertifikatlaşdırılmış İctimai Mühasiblər İnstitutu arasında Anlaşma Memorandumu imzalanıb.
Hesablama Palatasının sədri Vüqar Gülməmmədov hər iki qurumun gələcək fəaliyyətlərinə uğurlar arzulayıb və bildirib ki, imzalanacaq bu saziş ölkələrimizin auditorları və mühasibləri üçün uğurlu əməkdaşlığa, birgə fəaliyyətə və bütövlükdə audit peşəsinin inkişafına mühüm töhfə verəcəkdir.
V.Gülməmmədov bildirib ki, maliyyə sahəsində, o cümlədən audit və mühasibat uçotu ilə bağlı kadr potensialının gücləndirilməsi dövlət maliyyəsinin idarəedilməsi üzrə islahatların uğurla reallaşdırılmasına xidmət edir. Hesabat ilində ilk dəfə həyata keçirilən qurum səviyyəsində konsolidə edilmiş maliyyə hesabatlarının auditinin ilkin nəticələri maliyyə uçotu və hesabatlılığının beynəlxalq standartlara uyğun aparılmasında qurumların tabeliyində olan bəzi müəssisələrinin birləşdirilmiş hesabatda nəzərə alınmaması, tabe qurumları tərəfindən uçotun köhnə mühasibat uçotu əsasında aparılması və yalnız birləşdirilmiş hesabatın tərtibi zamanı beynəlxalq standartlara uyğunlaşdırılması, qurumdaxili əməliyyatların konsolidasiyanın aparılması zamanı diqqətə alınmaması, bəzi müəssisələrin debitor borcların göstəricilərinin hesabatlılıqda əks olunmaması kimi bəzi problemlərin olduğunu göstərir. Bu, həm konsolidasiyanın fəlsəfəsinin başa düşülməməsindən, həm də peşəkar potensial boşluqlarının olmasından irəli gəlir. Bu sahədə hüquqi bazanın təkmilləşdirilməsi, təkmil IT infrastrukturun qurulması və IT sistemlərin inteqrasiyası əhəmiyyətlidir.
Tədbirdə Azərbaycan və İsrail auditinin mövcud problemləri, onların həlli yolları, auditor peşəsinin inkişafı və kadr hazırlığı sahəsində təcrübə mübadiləsi və əməkdaşlıq istiqamətləri üzrə ətraflı müzakirələr və geniş fikir mübadiləsi aparılıb.