RƏSMİ XRONİKA
AZƏRBAYCAN VƏ MOLDOVA PREZİDENTLƏRİNİN GENİŞ TƏRKİBDƏ GÖRÜŞÜ
Aprelin 23-də Prezident sarayında Azərbaycan Prezidenti İlham Əliyevin və Moldova Prezidenti Vladimir Voroninin nümayəndə heyətlərinin iştirakı ilə geniş tərkibdə görüşü olmuşdur.
Prezident İLHAM ƏLİYEV qonaqlara müraciətlə dedi:
- Hörmətli Vladimir Nikolayeviç!
Hörmətli qonaqlar!
Sizi Azərbaycanda bir daha salamlamağa ürəkdən şadam. Xoş gəlmisiniz! Biz Sizin səfərinizə çox böyük əhəmiyyət veririk və ümid edirik ki, bu səfərin nəticələri dostluq əlaqələrimizin daha da möhkəmlənməsinə xidmət edəcəkdir.
Ölkələrimiz arasında tərəfdaşlıq münasibətləri yaranmışdır. Biz müxtəlif sahələrdə fəal əməkdaşlıq edirik və fəal siyasi dialoqu iqtisadi sahədə ciddi irəliləyişlərlə dolğunlaşdırmaq istəyirik. Bu gün biz Sizinlə qarşılıqlı əlaqələrimizin perspektivlərini necə təsəvvür etməyimizin ümumi konturlarını müzakirə etdik. Fikrimcə, müvafiq nazirliklərin rəhbərləri bu məqamları indiki səfər çərçivəsində konkretləşdirəcəklər və biz artıq fəal qarşılıqlı iqtisadi əlaqələrin ciddi perspektivlərini müəyyən edəcəyik.
Mən Sizin ilk səfərinizi xatırlayıram. O səfər çox uğurlu oldu və əslində ölkələrimiz arasında yeni münasibətlərin əsasını qoydu. Həmin səfərdən çox vaxt keçmişdir. Mən Sizin ölkənizdə olmuşam, artıq səfirliklər açılmışdır və yetərli, - o cümlədən beynəlxalq qurumlarda, - qarşılıqlı əlaqələr və fəal əməkdaşlıq mövcuddur.
Biz dostumuz kimi Sizə çox hörmət bəsləyirik, Sizi görməyimizə çox şadıq. İnanıram ki, səfər həm faydalı, həm də xoşagələn olacaq, münasibətlərimizin daha da inkişaf etməsinə güclü təkan verəcəkdir.
Bir daha xoş gəlmisiniz.
Moldova Prezidenti VLADİMİR VORONİN təşəkkür edərək dedi:
- İlham Heydər oğlu, bizi yenidən ölkənizə gəlməyə dəvət etdiyiniz üçün sağ olun, bəri başdan özümün və hökumətdən olan səfər yoldaşlarımın təəssüratlarını bildirmək istəyirəm. Biz sanki başqa bir Bakı şəhərinə gəlmişik. Hava limanında “Bakı” adını görməsəydim, inanmazdım ki, mənim 2004-cü ildə olduğum Bakı şəhərinə gəlib çıxmışıq. Bu, tamamilə yeni şəhərdir. Buraya, iqamətgaha gələnə qədər bir küçəni gördüyümüzə baxmayaraq, dövlətinizin paytaxtının necə inkişaf etməsi, yenidən qurulması, modernləşməsi mənə çox güclü təsir bağışlamışdır. Mən sadəcə olaraq, Sizin uğurlarınıza görə sevinirəm və bu nəticəyə görə, Bakıda aparılan bu işlərə görə Sizi təbrik edirəm.
MDB-nin axırıncı sammitində söhbətlərimiz mənim yadımdadır, bu səfərimin həyata keçirilməsi barədə o vaxt razılığa gəldik. Bizim ölkələr arasında yaranmış münasibətlər onları konkret məzmunla - iqtisadi, sosial və başqa sahələrdə layihələrin həyata keçirilməsi ilə dolğunlaşdırmağa imkan verir. Bizim fəaliyyətimiz 50-dən çox ikitərəfli saziş əsasında formalaşır və təşkil olunur. İndi bu sazişlərin bəhrəsini görmək qalır. Düşünürəm ki, bu səfərə mənimlə gəlmiş heyət bu nəticələrə nail olmaq, ticarət-iqtisadi əməkdaşlığın yaxşılaşdırılması, investisiya layihələrinin həyata keçirilməsi yollarını axtarıb tapmaq əzmindədir.
######