Azərbaycanda hərbi təhsil sisteminin müasir dünya tələbləri səviyyəsində qurulmasına ciddi diqqət yetirilir
Müdafiə Nazirliyinin mətbuat xidmətindən AZƏRTAC-a bildiriblər ki, əvvəlcə ümummilli lider Heydər Əliyevin məktəbin həyətində ucaldılmış abidəsi önünə gül dəstələri qoyulub, xatirəsinə hörmət və ehtiram ifadə edilib.
Müdafiə nazirinə ali hərbi təhsil müəssisəsinin baş planı göstərilib, qərargah və digər inzibati binalar, həmçinin məktəbin ərazisində yerləşən infrastruktur haqqında ətraflı məlumat verilib.
Zakir Həsənov məktəbin yeni təmir olunmuş, müasir avadanlıqlar və stendlərlə təchiz edilmiş tədris korpuslarında, müxtəlif kafedralarda və fənn kabinələrində tədrisin maddi-texniki şəraitinə baxış keçirib, o cümlədən yeməkxana, yataqxana və inzibati binalarda olub.
Nazir Azərbaycan Ali Hərbi Təyyarəçilik və Azərbaycan Ali Hərbi Dənizçilik məktəblərində də mövcud şəraitlə maraqlanıb.
Sonra nazirliyin rəhbər heyəti, məktəblərin komandanlığı və müəllim-professor heyətinin iştirakı ilə geniş tərkibdə toplantı keçirilib.
Yeni tədris ilində məktəbin zabit və müəllim heyətinin qarşısında duran əsas vəzifələri diqqətə çatdıran müdafiə naziri Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev tərəfindən ölkəmizdə müasir təhsil sisteminin inkişafına göstərilən yüksək diqqət və qayğını xüsusi vurğulayıb.
Nazir qeyd edib ki, hazırda ölkəmizdə hərbi təhsil sisteminin müasir dünya tələbləri səviyyəsində qurulmasına ciddi diqqət yetirilir.
Eyni zamanda, məktəbdə qısa müddətdə yüksək səviyyədə aparılan təmir-bərpa işlərindən, maddi-texniki bazanın vəziyyətindən məmnun qalan müdafiə naziri bütün bunlarda əməyi olan hər kəsə təşəkkür edib.
Hərbi məktəblərdə təhsillə bağlı fikirlərini bölüşən Zakir Həsənov tədris-maddi bazasının imkanlarından geniş istifadə edilməklə çöl təlim-məşqlərinə xüsusi diqqət yetirilməsinin vacibliyini bildirib. O deyib ki, bizim hərbi məktəbləri bitirən gənc zabitlər elə praktiki hərbi biliklərə yiyələnməlidirlər ki, döyüş zamanı istənilən və zəruri şəraitdə qazandıqları vərdişləri asanlıqla və əminliklə tətbiq etmək bacarığına malik olsunlar.
Sonda müdafiə naziri məktəbin rəhbərliyinə gələcəyin zabit kadrlarının hazırlıq səviyyəsinin gücləndirilməsi, nizam-intizamın və şəxsi heyətin mənəvi-psixoloji hazırlığının artırılması istiqamətində tapşırıq və tövsiyələrini verib.
Bölmənin digər xəbərləri
