AZƏRBAYCANDA XARİCİ İŞ ADAMLARI ÜÇÜN GÖZƏL ŞƏRAİT YARADILMIŞDIR
Bu fikri Dövlət Gömrük Komitəsinin sədri Kəmaləddin Heydərov noyabrın 21-də Azərbaycan Türk Sənayeçi və İş Adamları Beynəlxalq Cəmiyyətinin (TÜSİAB) idarə heyətinin sədri Kamal Yazıçıoğlu başda olmaqla qardaş ölkənin respublikamızda fəaliyyət göstərən iş adamları ilə görüşündə bildirmişdir.
Kamal Yazıçıoğlu Azərbaycan Prezidenti Heydər Əliyevin xarici iş adamlarına göstərdiyi diqqət və qayğını yüksək qiymətləndirərək, ölkəmizdə iqtisadiyyatın sürətlə inkişaf etdiyini, onlar üçün də geniş imkanlar yaradıldığını bildirmiş və demişdir ki, hazırda Azərbaycanda fəaliyyət göstərən 400-dək türk firmasında 30 mindən çox azərbaycanlı çalışır. Son bir il ərzində Türkiyədən Azərbaycana 360-dək iş adamı gəlmişdir.
Ölkəmizdə həyata keçirilən sosial-iqtisadi siyasət nəticəsində əldə olunmuş nailiyyətlərdən, özəl sektorun inkişafından söhbət açan Kəmaləddin Heydərov sahibkarlığın fəaliyyətinə əsassız müdaxilələrin qarşısının alınması üçün dövlətimizin başçısı Heydər Əliyevin imzaladığı sənədlərin, xarici iş adamları ilə keçirdiyi görüşlərin əhəmiyyətini vurğulamışdır. Komitə sədri gömrük broker sisteminin formalaşdırılması, gömrük vergi və rüsumlarının ödənilməsində kart sistemindən istifadə, ticarət əməliyyatlarının gömrük rəsmiləşdirilməsi qaydalarının sadələşdirilməsi və digər məsələlər barəsində fikirlərini açıqlamışdır. O, belə bir məqamı da xatırlatmışdır ki, iş prosesində meydana çıxan bir sıra problemlər həm də xarici iqtisadi fəaliyyət iştirakçılarının qanunvericilik aktlarını bilməməsindən irəli gəlir.
Görüşdə bir sıra məsələlər ətrafında fikir mübadiləsi aparılmış və qərara alınmışdır ki, Türkiyənin iş adamları ilə Dövlət Gömrük Komitəsi arasında əlaqələrin möhkəmləndirilməsi üçün işçi qrupu yaradılsın, ortaya çıxan problemlərin operativ həlli üçün konkret tədbirlər görülsün.
Bölmənin digər xəbərləri
