AZƏRBAYCANIN CÜDO ÜZRƏ YIĞMA KOMANDASI ERMƏNİSTANA YOLA DÜŞMÜŞDÜR
Bakı, 8 sentyabr (AZƏRTAC). Azərbaycanın cüdo üzrə gənclərdən ibarət yığma komandası sentyabrın 11-dən 13-dək Yerevanda keçiriləcək Avropa birinciliyində iştirak etmək üçün Ermənistan paytaxtına yola düşmüşdür.
Xatırladaq ki, keçən il Avropa birinciliyində ölkəmizin yığma komandası üç bürünc medal qazanmışdır. Bu dəfə həmin heyətdən yalnız bir nəfər - Ramin Qurbanov (81 kq) Universiadanın qalibi kimi Yerevana getmişdir. Bundan əlavə, yaşlı cüdoçular arasında Rotterdamda keçirilmiş Dünya çempionatında beşinci nəticə göstərmiş Elmar Qasımov da (100 kq) yığma komandaya daxil edilmişdir.
Yarışların cədvəlinə müvafiq olaraq, sentyabrın 11-də İlqar Müşkiyev (55 kq), Rasim Əsədullayev (60 kq) və Fəğan Eminoğlu (66 kq) mükafatlar uğrunda mübarizə aparmağa başlayacaqlar. Ertəsi gün Ramin Qurbanov, yarışların son günü isə Elmar Qasımov öz qüvvəsini sınayacaqdır.
Bölmənin digər xəbərləri
