SİYASƏT
Azərbaycanın Dayanıqlılıq Həftəsinə dəvət olunması ərəb dövlətlərinin ölkəmizə marağının göstəricisidir
![Azərbaycanın Dayanıqlılıq Həftəsinə dəvət olunması ərəb dövlətlərinin ölkəmizə marağının göstəricisidir](/files/2023/1/1200x630/1673859696815513902_1200x630.jpg)
Bakı, 16 yanvar, AZƏRTAC
Bildiyimiz kimi, Prezident İlham Əliyev yanvarın 15-də Birləşmiş Ərəb Əmirliklərinin paytaxtı (BƏƏ) Əbu-Dabiyə səfər edib. Dövlətimizin başçısı bu səfərə BƏƏ-nin Prezidenti Şeyx Məhəmməd bin Zayed Al Nəhyanın rəsmi dəvəti əsasında Dayanıqlılıq Həftəsinin açılış mərasimində iştirak etmək məqsədilə dəvət olunub.
Bu fikirləri AZƏRTAC-a açıqlamasında politoloq Amid Əliyev söyləyib.
O qeyd edib ki, ümumiyyətlə, son iki il ərzində BƏƏ ilə Azərbaycan arasında həm siyasi, həm də iqtisadi və enerji sahəsində çoxşaxəli əməkdaşlıq platforması formalaşdırılıb. Bunun bir neçə vacib səbəbləri var. Birincisi, rəsmi BƏƏ ərəb ölkələri içərisində Azərbaycanın haqlı və ədalətli mövqeyini dəstəkləyən tək dövlətdir. Bundan əlavə, keçmişdə qalan Qarabağ münaqişəsinə görə BƏƏ Ermənistanla heç bir rəsmi münasibət qurmayıb. Bu gün də Birləşmiş Ərəb Əmirlikləri tərəfindən Azərbaycana qarşı olan müsbət münasibət daha bariz şəkildə müşahidə olunur. Belə ki, ötən ilin dekabrında da BMT Təhlükəsizlik Şurasında Azərbaycana qarşı Ermənistan-Fransa cütlüyü tərəfindən hazırlanan qətnaməyə veto qoyan dövlətlərdən biri məhz BƏƏ oldu.
“BƏƏ azad olunmuş Qarabağ iqtisadi regionuna, xüsusilə də Şərqi Zəngəzur bölgəsinə böyük həcmdə investisiya yatıran ölkələrdən biridir. Bu, xüsusilə də alternativ enerji mənbələrinə dair yeni infrastruktur layihələrinin yaradılmasını özündə ehtiva edir. Səfər çərçivəsində SOCAR ilə “Masdar” şirkəti arasında yeni enerji mənbələrinin yaradılması haqqında müqavilə də bunu sübut edir. BƏƏ Azərbaycanla aparılan enerji diplomatiyasına uyğun ölkəmizin ərəb dünyasına transformasiya olunmasına da xüsusi diqqət ayırır. Dövlətimizin başçısının Dayanıqlılıq Həftəsinə fəxri qonaq qismində dəvət olunması da bunu deməyə əsas verən amillərdəndir. Keçən il Tunisdə keçirilən Ərəb Dövlətləri Liqasına fəxri qonaq kimi Prezident İlham Əliyevin də dəvət olunması da təbii ki, bu prosesə müsbət təsir edib. Bu da Azərbaycanın xarici siyasətində üç əsas istiqamətdən birini təşkil edir. Bunlar Avropaya inteqrasiya, Orta Asiya və Şərq ölkələri ilə münasibətlərin qurulması və nəhayət ərəb dövlətləri ilə həm siyasi, həm də enerji diplomatiyasının tətbiq edilməsi məsələləridir. Bu istiqamətdə də Azərbaycanın həyata keçirdiyi siyasət olduqca uğurlu hesab olunur”, - deyə Amid Əliyev vurğulayıb.
Politoloqun fikirlərinə görə, Qoşulmama Hərəkatı, İslam Əməkdaşlıq Təşkilatı və Ərəb Dövlətləri Liqası ilə münasibətlərin qurulması Azərbaycana ərəb dövlətləri arealına asanlıqla giriş imkanı verir. Bunun üçün isə olduqca vacib incə məqamlar var. Din, mədəniyyət və adət-ənənələrin oxşarlığı da bu regiona nüfuzetməni daha da stimullaşdırır. Əbu-Dabidə keçirilən tədbir isə bir daha Azərbaycanın haqlı və ədalətli mövqeyini dünyaya çatdırmaq üçün vacib platformadır. Bundan əlavə, sülhə əsaslanan postmüharibə siyasətinin vacib elementləri bir daha müsəlman-ərəb dövlətlərinin nəzərinə çatdırılacaq. Dünyada baş vermiş yeni kataklizmlər fonunda yaranmış enerji böhranında Azərbaycanın vacib aktuallığı da məhz bu dövlətlər üçün vacibdir. Qarabağ iqtisadi regionuna investisiya yatırılması və Zəngəzur dəhlizi ilə Avropaya asan çıxışın əldə edilməsi faktı da ərəb dövlətləri və iş mərkəzləri üçün vacib amillərdəndir.
Amid Əliyev əlavə edib ki, bunlarla yanaşı, Ermənistanın ikiüzlü siyasəti və Fransaya qarşı ərəb dünyasında olan mənfi münasibət fonunda da bu iki dövlətin regionda stabilliyin pozulmasına çevrilmiş siyasətlərinin də elementləri bir daha səsləndirilə bilər. Azərbaycanlı ekofəalların başladığı aksiyanın humanitar fonda olması və əsas məqsəd kimi ölkəmizin təbii sərvətlərinin talanması faktının dayandırılması işinin də dünya ictimaiyyətinə çatdırılması üçün bu platforma olduqca vacibdir.
Azərbaycan Prezidentinin Dayanıqlılıq Həftəsinə dəvət olunması ərəb dövlətlərinin ölkəmizə marağının göstəricisidir. Belə ki, Həftə çərçivəsində ərəb dövlətlərinin bir çoxunun Azərbaycanla yeni iqtisadi-siyasi münasibətlər qurmaq, investisiya planları və enerji diplomatiyası istiqamətində yeni layihələrin icrası məqsədilə bir sıra görüşlərin keçirilmə ehtimalı da var. Bu səfər heç şübhəsiz ki, Azərbaycanın beynəlxalq arenada və ərəb dövlətləri arasında siyasi və iqtisadi maraqlarının təmin olunmasına, həmçinin mövqeyimizin məhz bu regionda güclənməsinə xidmət edəcək.