Bakı, 8 fevral, Səadət Hakıyeva, AZƏRTAC 

Dövlət xalqın səsi, iradəsi ilə formalaşır. Ən müdrik, ən uzaqgörən insanlar xalqın dəstəyi olmadan uğur qazana bilməzlər. 1990-cı illərin əvvəllərində Azərbaycan xalqı bütün dünyaya göstərdi ki, xalqın dəstəyi olmadan istənilən hakimiyyət məhvə məhkumdur. 1993-cü ildə ümummilli lider Heydər Əliyevin xalqın təkidli tələbi ilə hakimiyyətə qayıdışı məhz həmin o nadir nümunələrdəndir ki, xalq ölkənin çətin vəziyyətində ümidini öz liderinə bağladı. Xalq bu məsələdə öz seçimini etməklə, öz müqəddəratını da həll etdi. Həmin illəri Azərbaycan xalqının tarixində intibah dövrü də adlandırmaq olar. Toplumlar öz etimadnamələrini öndə gedənlərə etibar edirlərsə, uğur özünü çox gözlətmir.

Azərbaycan hakimiyyəti hər zaman xalqın dəstəyini hiss edir və həmin dəstəyə arxalanaraq ölkənin ehtiyat potensialını artırır, respublikamızı dünya səviyyəsində lider ölkələrin sırasına çıxarır. Bu da Prezidentin xalqla vəhdətinin məntiqi nəticəsidir.

Bu sözləri AZƏRTAC-a açıqlamasında politoloq Tofiq Abbasov söyləyib.

Tofiq Abbasov deyib: “Taleyüklü proqramların həyata keçirilməsində, köklü islahatların reallaşmasında söz və vəd üst-üstə düşməlidir. Bu baxımdan Azərbaycanda ümidverici şərait mövcuddur. Dövlətimizin başçısı “Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı”nın icrasının birinci ilinin yekunlarına həsr olunmuş konfransda xüsusi vurğuladı ki, biz adətən verdiyimiz sözə əməl edirik. Dövlətimizin başçısı bu sözləri Davos İqtisadi Forumundakı çıxışında da dedi. Bu, bir daha onu göstərir ki, ölkədə siyasi elita ilə intellektual qüvvələr arasında strateji müttəfiqlik formalaşıb. Düşünürəm ki, bu, Prezident İlham Əliyev və Birinci vitse-prezident Mehriban Əliyevanın insan kapitalına verdiyi önəmin ifadəsidir”.

Ötən ilin uğurlarından danışan politoloq bildirib ki, 2019-cu il ölkəmizin, xalqımızın tarixinə ən uğurlu illərdən biri kimi daxil olub və respublikamızda iqtisadiyyat, sənaye, kənd təsərrüfatı sahələrində müsbət irəliləyişlər baş verib. “Əlbəttə, proqnozlara uyğun olaraq, ilk növbədə, inkişaf meyilləri özünü təsdiqlədi. Qeyri-neft sektorunda, kənd təsərrüfatında, orta və kiçik sahibkarlıqda kifayət qədər yüksəliş, artım qeydə alındı. Prezident İlham Əliyevin yanvarın 13-də 2019-cu ilin yekunlarına həsr olunmuş müşavirədə də qeyd etdiyi kimi, islahatlar baxımından ötən il xüsusilə əlamətdar oldu. Həmin islahatlar nəticəsində məhkəmə sistemi, icraedici orqanlar da daxil olmaqla, bir çox sahələrdə müsbət dəyişikliklər baş verdi, iqtisadi sahədə yeni kompleks qaydalar tətbiq olunmağa başladı. Mən diqqəti xüsusilə institusional dəyişikliklərin quruculuq işlərinə müsbət təsirinə yönəltmək istəyirəm. Əgər ölkədə böyük islahatlar proqramı həyata keçirilirsə, hakimiyyətin ayrı-ayrı qolları, müxtəlif sahələr arasında əlaqələrin formalaşması vacibdir”, - deyə politoloq vurğulayıb.

T.Abbasovun sözlərinə görə, ötən il gömrük və vergi orqanlarının işini xüsusi qeyd etmək lazımdır. Bu orqanlar dövlətimizin başçısının tapşırığı əsasında son dərəcə optimal şəraitdə işlədilər. Nəticədə büdcəyə daxilolmaların həcmi 1 milyard manatdan artıq oldu. Bu, çox vacib göstəricidir. Əgər tədbirlər görülməsəydi, həmin məbləğ dövlətin deyil, kimlərinsə cibinə gedəcək və kölgə iqtisadiyyatına qulluq edən dairələrin əlində cəmləşəcəkdi. Burada söhbət ondan gedir ki, vergidən yayınanlar dövlətin deyil, öz şəxsi mənafelərini güdürlər. Digər tərəfdən, həmin insanlar ölkənin qanunlarına, xalqın, dövlətin maraqlarına zərbə vururlar. Büdcəyə gələn həmin vəsait isə ölkə rəhbərinin Sərəncamı ilə sosial layihələrin həyata keçirilməsinə yönəldildi. Maaşlar, pensiyalar artırıldı, müharibə veteranları, qaçqınlar, məcburi köçkünlər, şəhid ailələrinin, bir sözlə, həssas qrupların müavinətləri və təqaüdləri artırıldı. Bütün bunlar onu göstərir ki, büdcəyə daxilolmaların artması vətəndaşların rifahının artmasına yönəldilir.

Politoloq vurğulayıb ki, Prezident İlham Əliyevin təşəbbüsü ilə həyata keçirilən iki böyük sosial paketdən 4 milyon 200 yüz min insan, demək olar ki, Azərbaycan əhalisinin yarısı faydalandı. Təbii ki, iqtisadiyyat mənfəətlə işləyəndə onun xeyrini həm dövlət, həm də vətəndaşlar görür. Prezidentin konseptual yanaşması nəticəsində islahatlar tədrici formada həyata keçirilir. Digər tərəfdən də bu islahatların gətirdiyi mənfəət, xeyir özünü çox gözlətmir.

“Ölkəmizdə şəffaflığa çox böyük diqqət yetirilir. “ASAN xidmət” layihəsi də həmin şəffaflığın təmin olunmasının yollarından biridir. Burada onlayn sistemdə 140-dan artıq xidmət göstərilir. Vətəndaş məmnunluğunun təmin olunması baxımından bu, çox vacibdir. Şəffaflığa doğru yönələn format ildən-ilə, gündən-günə genişlənir və bu, onu deməyə imkan verir ki, dövlət tərəfindən vətəndaşların məmnunluğu təmin edilir, onların rifah halı yaxşılaşdırılır, təhlükəsizliyi qorunur. Bu, ölkə rəhbərinin həyata keçirdiyi köklü islahatların nəticəsidir.

İslahatların aparılması asan proses deyil, amma ciddi hazırlıq və maarifləndirmə sahəsində ölkəmiz maksimum nəticələr əldə etdi. Düşünürəm ki, bu islahatlar davamlı olacaq. Hər şeyi dövlətdən və onun orqanlarından gözləmək də düzgün deyil. Dövlətimizin başçısı özü bu proseslərə “yaşıl işıq” yandırıbsa, dövlət orqanları bu prosesə qoşulublarsa, əhali, insanlar da baş verən xoşagəlməz hallara göz yummamalı, dövlətə kömək etməlidirlər. Kölgə iqtisadiyyatının qarşısını almaq üçün hamı mübarizə aparmalıdır. Onun qarşısının alınması dövlət proqramından irəli gələn bir çağırışdır”, - deyə T.Abbasov diqqətə çatdırıb.