AZƏRBAYCANIN ƏLİL MƏKTƏBLİLƏRİ PENZADAN QIZIL VƏ GÜMÜŞ MEDALLARLA QAYITMIŞLAR
Bakı, 7 aprel (AZƏRTAC). Martın 23-dən 30-dək Rusiyanın Penza şəhərində əlil məktəblilər arasında XIX ümumrusiya şahmat festivalı keçirilmişdir.
Turnirdə Azərbaycanı Gözdən əlil uşaqlar üçün Respublika internat orta məktəbinin şagirdləri Haqq Nağıyev və Anar Nəbiyev təmsil etmişlər.
Beynəlxalq turnirdə həmyerlilərimiz inamla yarışmışlar. Bütün rəqiblərini məğlub edən Haqq Nağıyev qızıl medala sahib olmuşdur. Anar Nəbiyev isə gümüş medal qazanmışdır.
Bu münasibətlə məktəbdə keçirilən tədbirdə direktor Namidar Hüseynquliyev, Təhsil Nazirliyinin və digər təşkilatların nümayəndələri əlil idmançıların uğurlarını yüksək qiymətləndirmişlər. Çıxış edənlər Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın xüsusi qayğısı və göstərişi ilə məktəbin yenidən qurulmasını və şagird ləvazimatları ilə təmin olunmasını da minnətdarlıq hissi ilə qeyd etmişlər.
Bildirilmişdir ki, şagirdlərin Penza turnirində iştirakı “Qafqaz Media” İctimai Birliyinin maliyyə yardımı hesabına baş tutmuşdur. Tədbirdə qalib şagirdlərə diplomlar və xatirə hədiyyələri təqdim edilmişdir. Qalib şagirdlər yarışla bağlı təəssüratlarını bölüşmüş, qazandıqları qələbədə əlillərə dövlət qayğısının böyük rol oynadığını bildirmişlər.
######
Bölmənin digər xəbərləri
