Azərbaycanın Gürcüstandakı səfiri Faiq Quliyev Mtsxeta-Mtianeti bölgəsinin rəhbərləri ilə görüşüb
Tbilisi, 20 sentyabr, AZƏRTAC
Azərbaycanın Gürcüstandakı səfiri Faiq Quliyev ölkənin Mtsxeta-Mtianeti bölgəsinə səfər edib.
Bu barədə AZƏRTAC-a səfirlikdən məlumat verilib.
Bildirilir ki, səfir regionun inzibati mərkəzi olan Mtsxeta şəhərində bölgənin qubernatoru David Nozadze və şəhər meri Dimitri Zurabişvili ilə görüşüb. Görüşdə Gürcüstan ilə Azərbaycan arasında tarixən mehriban qonşuluq, dost və qardaşlıq münasibətlərinin olduğunu vurğulayan qubernator, iki dövlət və xalq arasında müxtəlif sahələrdə qarşılıqlı əlaqələrin yüksək səviyyədə olduğunu bildirib. Onun sözlərinə görə, Gürcüstan ilə Azərbaycanın əsl dostluğu, qarşılıqlı dəstək və hörmətə əsaslanan münasibətləri bütün ölkələr üçün bir nümunədir.
Səfir F.Quliyev Azərbaycan ilə Gürcüstan arasında bütün sahələrdə münasibətlərin uğurla inkişaf etdiyini, Prezident İlham Əliyevin Gürcüstanla münasibətlərə xüsusi önəm verdiyini vurğulayıb. Qeyd edib ki, Azərbaycanın ümummilli lideri Heydər Əliyev tərəfindən əsası qoyulan sıx münasibətlər daha da inkişaf etdirilərək nümunəvi strateji müttəfiqlik səviyyəsinə yüksəlib. Son illər ərzində Azərbaycan ilə Gürcüstan arasında qarşılıqlı səfərlərin intensiv xarakter aldığını qeyd edən diplomat, bunu iki ölkənin münasibətlərinin ən yüksək səviyyədə olmasının göstəricisi kimi qiymətləndirib.
İki ölkənin regionları arasında əməkdaşlığın inkişafı məsələsinə də toxunan səfir deyib: “Son bir ildə Azərbaycan və Gürcüstanın bir neçə şəhəri arasında qardaşlaşma haqqında memorandumlar imzalanıb. Bölgələrarası əməkdaşlıq siyasi, iqtisadi, humanitar sahələrdə qarşılıqlı əlaqələrin daha da güclənməsinə böyük töhfə verir”.
Faiq Quliyev bildirib ki, Azərbaycan dövlətinin başçısı İlham Əliyevin tapşırıq və tövsiyələrinə əsasən, Gürcüstanda yaşayan soydaşlarımızın sosial rifahının daha da yaxşılaşdırılması istiqamətində bir sıra əhəmiyyətli layihələr həyata keçirilib. O, Azərbaycan dövlətinin dəstəyi ilə Gürcüstanda reallaşdırılmış iri sosial və humanitar layihələr barədə ətraflı məlumat verib, səfirliyin soydaşlarımızı narahat edən məsələləri daima diqqət mərkəzində saxladığını bildirib.
Səfir, həmçinin bu yaxınlarda Ermənistan silahlı qüvvələri tərəfindən Azərbaycanla sərhəddə törədilmiş genişmiqyaslı təxribatdan da söz açıb. O, təxribat nəticəsində Azərbaycan Silahlı Qüvvələrinin 79 hərbçisinin şəhid olduğunu diqqətə çatdırıb.
Faiq Quliyev Azərbaycan və Gürcüstanın ərazi bütövlüyü uğrunda həlak olan qəhrəman övladların xatirəsinə dərin ehtiramını ifadə edib.
Azərbaycanın bölgədə sülh və sabitliyin tərəfdarı olduğunu qeyd edən diplomat Gürcüstanın da bu istiqamətdə göstərdiyi səyləri yüksək qiymətləndirib.
Qubernator gürcü və Azərbaycan xalqları arasında möhkəm təməllərə əsaslanan dostluq və qardaşlıq münasibətlərinin daha da güclənməsi üçün səylərini əsirgəməyəcəyini bildirib. O, Azərbaycan Ordusunun şəhid olan hərbi qulluqçularının ailələrinə başsağlığı verib.
David Nozadze bölgədə sülh və əmin-amanlığın bərqərar olacağına ümid etdiyini vurğulayıb.
Mtsxeta meri Dimitri Zurabişvili də öz növbəsində Azərbaycan səfirinə bölgəyə göstərdiyi marağa görə təşəkkürünü bildirib. Mer azərbaycanlıların yaşadığı kəndlərdə həyata keçirilən infrastruktur layihələrdən danışıb, Gürcüstanın tamhüquqlu vətəndaşları olan soydaşlarımızı narahat edən məsələlərin həlli yollarının tapılmasına xüsusi diqqətin yetirildiyini qeyd edib.
Görüşdə Mtsxeta-Mtianeti bölgəsinin Azərbaycanla əlaqələrinin inkişaf perspektivləri ətrafında ətraflı fikir mübadiləsi aparılıb, bir sıra təkliflər irəli sürülüb.
Tərəflər qarşılıqlı təmasların davam etdirilməsi və sıx əməkdaşlığın qurulmasına hazırlıqlarını ifadə ediblər.
Sonda qarşılıqlı xatirə hədiyyələri təqdim olunub. Səfir Faiq Quliyev qubernator və merə Gürcüstan Milli Muzeyinin fondlarında saxlanılan və Qarabağ xanlığına aid olan 300-dən çox artefaktın rəsminin yer aldığı “Qarabağ xanlığı. Tarixi və mədəni kimlik” adlı kitabı hədiyyə edib.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
