Azərbaycanın “Qarabağ” muğam qrupunun Ankarada konserti keçirilib
Ankara, 13 may, AZƏRTAC
Ümummilli lider Heydər Əliyevin anadan olmasının 96-cı ildönümü, görkəmli Azərbaycan şairi İmadəddin Nəsiminin 650 və UNESCO üzrə Azərbaycan Respublikasının Milli Komissiyasının yaranmasının 25 illiyi münasibətilə Türkiyənin paytaxtı Ankara şəhərində möhtəşəm muğam konserti keçirilib.
AZƏRTAC xəbər verir ki, Azərbaycanın Türkiyədəki səfirliyi, UNESCO üzrə Azərbaycan və Türkiyə respublikalarının milli komissiyaları tərəfindən birgə təşkil olunan konsertdə ölkəmizin “Qarabağ” muğam qrupu musiqisevərlərin görüşünə gəlib.
Konsertdə muğam qrupunu dirijor Əyyub Quliyevin rəhbərliyi ilə Ankara simli alətlər dərnəyinin kamera orkestri müşayiət edib.
Türkiyə Prezidenti Administrasiyasının Simfonik Orkestrinin konsert salonunda təşkil olunmuş muğam gecəsi Azərbaycan və Türkiyədən rəsmi şəxsləri, səfirləri, millət vəkillərini, Ankara ictimaiyyətinin görkəmli simalarını, o cümlədən bu şəhərdəki soydaşlarımızı bir araya gətirib.
Rəsmi hissədə Azərbaycanın Türkiyədəki səfiri Xəzər İbrahim, Xarici İşlər Nazirliyinin xüsusi tapşırıqlar üzrə səfiri, UNESCO üzrə Azərbaycan Respublikasının Milli Komissiyasının baş katibi Elnur Sultanov və UNESCO üzrə Türkiyə Respublikası Milli Komissiyasının sədri, professor Öcal Oğuz çıxış ediblər.
Azərbaycan muğam qrupunun növbəti dəfə Ankarada geniş konsert proqramı ilə çıxış etməsini yüksək dəyərləndirən səfir Xəzər İbrahim əminliklə bildirib ki, ölkəmizə dair təşkil olunan hər bir mədəniyyət tədbiri xalqlarımız və ölkələrimiz arasında əlaqələrin daha da möhkəmlənməsinə töhfədir. Prezident İlham Əliyevin 2019-cu ili Azərbaycanda “Nəsimi ili” elan etdiyini diqqətə çatdıran səfir bildirib ki, böyük şairin bütün yaradıcılığı kimi, Azərbaycan-Türkiyə qardaşlıq münasibətləri də duyğular üzərində qurulub. Ona görə də Azərbaycanın “Qarabağ” muğam qrupunun ifası hər zaman olduğu kimi, bu dəfə də muğamsevərlərdə xoş hisslər oyadacaq.
Ulu öndər Heydər Əliyevin UNESCO ilə əməkdaşlığa hər zaman xüsusi diqqət ayırdığını qeyd edən baş katib Elnur Sultanov diqqətə çatdırıb ki, Azərbaycan Respublikasının Birinci vitse-prezidenti, Heydər Əliyev Fondunun prezidenti, UNESCO-nun xoşməramlı səfiri Mehriban Əliyeva ötən dövrdə bu əməkdaşlığın dinamik inkişafına böyük töhfələr verib.
Baş katib UNESCO üzrə Azərbaycan Respublikasının Milli Komissiyasının yaranma tarixindən və fəaliyyətindən danışıb. Bildirib ki, Komissiya 1994-cü ildə Prezident Heydər Əliyevin müvafiq Sərəncamı ilə yaradılıb. Həmin Sərəncamla Milli Komissiya Xarici İşlər Nazirliyi yanında fəaliyyətə başlayıb. Bu il Milli Komissiyanın yaradılmasının 25 illiyi qeyd olunur. Böyük şair Nəsiminin yubileyinin yüksək səviyyəsində qeyd olunması Azərbaycan xalqının korifeylərinə göstərilən doğma münasibətin davamıdır.
Çıxışında ümummilli lider Heydər Əliyevin “Bir millət, iki dövlət!” kəlamını xatırladan professor Öcal Oğuz bildirib ki, böyük Azərbaycan şairi İmadəddin Nəsiminin yaradıcılığı bütün türk xalqları üçün milli sərvətdir. Azərbaycanın bütün uğurları, o cümlədən UNESCO ilə əməkdaşlıq sahəsində əldə olunan nailiyyətlər qürurvericidir. Azərbaycanın “Qarabağ” muğam qrupunun ifası bir tərəfdən muğam sədası ilə qəlbimizə rahatlıq verirsə, digər tərəfdən “Qarabağı unutma!” çağırışı edir.
Çıxışlarda anadan olmasının 96-cı ildönümünü qeyd etdiyimiz ümummilli lider Heydər Əliyevin Azərbaycan mədəniyyətinə göstərdiyi diqqət və qayğı, bu məqsədyönlü siyasətin Prezident İlham Əliyev tərəfindən uğurla davam etdirilməsi, Azərbaycanın-UNESCO əməkdaşlıq münasibətlərinin nəticələri, o cümlədən bunun türk dünyasının mədəni inteqrasiyasına təsiri, həmçinin İmadəddin Nəsimi yaradıcılığının dünyada tanıdılması istiqamətində görülən işlərin səmərəsi və s. məsələlər barədə iştirakçılara geniş məlumat verilib.
“Qarabağ” muğam qrupunun rəhbəri, Xalq artisti Mənsum İbrahimovun ifasında “Heydər babaya salam”, “Qara tellər”, “Nə olaydı” xalq mahnıları və təsniflər, o cümlədən Nəsiminin qəzəlləri səsləndirilib. Xalq artisti ecazkar ifası ilə muğamsevərləri riqqətə gətirib. Xanəndəni Əməkdar artistlər Elçin Həşimov (tar) və Elnur Əhmədov (kamança) müşayiət ediblər. Konsertin sonunda xanəndə Mənsum İbrahimovun “Qarabağ şikəstəsi”ni ifa etməsi tamaşaçılar tərəfindən ayaq üstə alqışlarla qarşılanıb.
Sabir Şahtaxtı
AZƏRTAC-ın xüsusi müxbiri
Ankara
Bölmənin digər xəbərləri
