Azərbaycanın uğurları haqqında mühazirə Tokiodakı Siyasi Elmlər Kollecinin üzvləri tərəfindən maraqla qarşılanıb
Tokio, 3 noyabr, AZƏRTAC
Ölkəmizin Yaponiyadakı səfiri Gürsel İsmayılzadənin Azərbaycanın müstəqilliyinin bərpa edilməsinin 30-cu və Vətən müharibəsində Qələbənin birinci ildönümlərinə həsr edilmiş mühazirəsi Tokionun Keyo Universitetinin nəzdində fəaliyyət göstərən Siyasi Elmlər Kollecinin üzvləri tərəfindən böyük maraqla qarşılanıb.
AZƏRTAC xəbər verir ki, onlayn formatda keçirilən tədbirdə nüfuzlu beyin mərkəzi kimi tanınan kollecin təsisçisi, Keyo Universitetinin professoru Mitsuya Kaneko, Yaponiyanın nüfuzlu ictimai-siyasi xadimləri, jurnalistlər, elm və biznes dairələrinin nümayəndələri iştirak ediblər.
Mühazirənin əvvəlində 2021-ci ildə Azərbaycanın müstəqilliyinin bərpa edilməsinin 30-cu ildönümünün qeyd olunduğunu xatırladan səfir müstəqilliyin ilk illərinin ağır keçməsindən, ölkə rəhbərliyinin təcrübəsizliyi nəticəsində ərazilərimizin 20 faizinin Ermənistan tərəfindən işğal edilməsindən danışıb. Diqqətə çatdırıb ki, 1993-cü ildə ümummilli lider Heydər Əliyevin Azərbaycan xalqının təkidli tələbi ilə hakimiyyətə qayıtması ölkəmizin dərin böhrandan çıxmasına, inkişaf yoluna qədəm qoymasına və güclü dövlətə çevrilməsinə zəmin yaradıb.
G.İsmayılzadə, həmçinin ölkəmizin hazırkı siyasi, iqtisadi və sosial vəziyyəti, o cümlədən ölkəmizdə aparılan genişmiqyaslı sosial-iqtisadi islahatlar, qeyri-enerji sektorunun inkişafı haqqında məlumat verib. Prezident İlham Əliyev tərəfindən uğurla həyata keçirilən sosial-iqtisadi siyasət nəticəsində Azərbaycanın sürətlə inkişaf edən ölkələrdən birinə çevrildiyini vurğulayıb.
Azərbaycan iqtisadiyyatının Cənubi Qafqaz regionu iqtisadiyyatının 63 faizini təşkil etdiyini qeyd edən səfir ölkəmizin Avropanın enerji təhlükəsizliyinə mühüm töhfələr verdiyini bildirib. Mühazirədə, eyni zamanda Bakı-Tbilisi-Ceyhan neft və Cənub Qaz Dəhlizi kimi nəhəng enerji layihələri ilə bağlı ətraflı danışılıb. Azərbaycanın davamlı və bərpa olunan enerji mənbələrinə böyük sərmayə qoyduğu qeyd edilib. Ölkəmizin iqtisadi potensialı, o cümlədən nəqliyyat infrastrukturu, informasiya texnologiyaları və tranzit imkanları barədə də iştirakçılara geniş məlumat verilib.
Artıq keçmişdə qalmış Ermənistan-Azərbaycan münaqişəsinə toxunan diplomat Ermənistanın ölkəmizə qarşı hərbi təcavüzünün ərazilərimizin 20 faizinin işğalına, 30 mindən çox insanın ölümünə, bir milyondan çox azərbaycanlının qaçqın və məcburi köçkünə çevrilməsinə səbəb olduğunu xatırladıb. Ermənilərin törətdiyi Xocalı soyqırımı haqqında geniş məlumat verib.
Səfir bildirib ki, 1994-cü ildən iki ölkə arasında mövcud olan atəşkəs rejiminə baxmayaraq, 2020-ci il sentyabrın 27-də Ermənistan silahlı qüvvələri atəşkəs rejimini kobud şəkildə pozaraq Azərbaycan Ordusunun cəbhə zonasında yerləşən mövqelərini və dinc əhalini növbəti dəfə atəşə tutub. Ermənistan silahlı qüvvələrinin mülki insanların sıx şəkildə yaşadığı yerləri və obyektləri intensiv şəkildə atəşə tutması nəticəsində mülki əhali və hərbi qulluqçular həlak olub və yaralanıb, evlərə və mülki obyektlərə ciddi ziyan dəyib. Azərbaycan Silahlı Qüvvələri tərəfindən Ermənistanın növbəti hərbi təcavüzünün qarşısını almaq və təmas xətti boyunca sıx şəkildə yaşayan mülki əhalinin təhlükəsizliyini təmin etmək məqsədilə özünümüdafiə hüququ çərçivəsində və beynəlxalq humanitar hüquqa tam riayət etməklə əks-hücum və cavab tədbirləri həyata keçirilib.
G.İsmayılzadə bildirib ki, 2020-ci il noyabrın 8-də Ali Baş Komandan, Prezident İlham Əliyevin rəhbərliyi, sarsıdılmaz iradəsi və hərbçilərimizin igidliyi sayəsində Azərbaycan Vətən müharibəsində böyük Qələbə qazanıb. 44 gün davam edən Vətən müharibəsi nəticəsində Azərbaycan 30 ilə yaxın işğala məruz qalan torpaqlarını azad edib. Eyni zamanda tarixi ədaləti, ərazi bütövlüyünü, bir milyon azərbaycanlının fundamental hüquqlarını bərpa edib. Qeyd olunub ki, erməni işğalçıları ərazilərimizi tərk edərkən buradakı evləri, məktəbləri, meşələri yandırıb, mədəni və dini abidələri məhv ediblər.
Diplomat hazırda Azərbaycan hökumətinin prioritet olaraq azad edilmiş ərazilərin bərpası və inkişafı layihələrini əzmlə həyata keçirdiyini də vurğulayıb. Azərbaycanı Naxçıvan Muxtar Respublikası ilə birləşdirən Zəngəzur dəhlizinin açılması məsələsinə toxunub. Bu dəhlizin yalnız Azərbaycan üçün deyil, həm də region ölkələri üçün iqtisadi üstünlük yaradacağını bildirib. Dəhlizin mövcud marşrutların ayrılmaz hissəsi olacağını və Cənubi Qafqazdan keçən Şimal-Cənub və Şərq-Qərb nəqliyyat dəhlizlərinin mühüm elementinə çevriləcəyini vurğulayıb.
G.İsmayılzadə Prezident İlham Əliyevin Azərbaycanın işğaldan azad olunmuş bütün ərazilərini “yaşıl enerji” zonası elan etməsi və bu ərazilərdə genişmiqyaslı tikinti işlərinin aparılması haqqına da məlumat verib. Azərbaycanın burada ən qabaqcıl və innovativ texnologiyalardan, o cümlədən “ağıllı şəhər” və “ağıllı kənd” konsepsiyalarından istifadə edərək yeni şəhər və kəndlərin tikintisini apardığını bildirib.
Böyük maraqla qarşılanan mühazirə iştirakçıların çoxsaylı suallarının cavablandırılması ilə başa çatıb.
Məlumat üçün qeyd edək ki, kollec Yaponiyanın daxili və xarici siyasəti, beynəlxalq münasibətlər ilə bağlı araşdırmalar aparır, nüfuzlu elm xadimlərinin iştirakı ilə bu mövzularda dəyirmi masalar, seminarlar və mühazirələr təşkil edir.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
