Azərbaycanın xarici siyasətdə qazandığı uğurlar daxili siyasətin hədəflərinə nail olmaq üçün əla fondur
Bakı, 18 iyul, Pərvanə Qarayeva, AZƏRTAC
Azərbaycan Prezidenti İlham Əliyev cümə günü cari ilin birinci yarısında Vətənimizin inkişafının yekunlarına həsr edilmiş müşavirədə geniş nitqlə çıxış edib. Prezident dövlətimizin beynəlxalq arenada rolunun artmasının və fəallığın güclənməsini vurğulayıb. Bu ilin ilk altı ayı həqiqətən yeni uğurlarla əlamətdar olub, bu uğurlar ölkəmizin beynəlxalq nüfuzunu daha da möhkəmləndirib.
AZƏRTAC xəbər verir ki, Qoşulmama Hərəkatı çərçivəsində aparılan işlər bu il Azərbaycanın xarici siyasət fəaliyyətinin əsas istiqamətlərindən biridir. 1961-ci ildə yaradılmış və öz sıralarında 120 dövləti birləşdirən bu təşkilatda Bakının sədrlik müddəti bu yaxınlarda təşkilata üzv dövlətlərin yekdil qərarı ilə 2023-cü ilə qədər uzadılıb. Bu fakt dünya birliyində hər hansı hərbi bloklara qoşulmağı arzu etməyən ölkələr arasında Azərbaycan dövlətinin nüfuzuna dəlalət edir.
Azərbaycanın sədrlik müddətinin uzadılması üzvlərinin sayına görə BMT-dən sonra ikinci beynəlxalq təşkilat olan Qoşulmama Hərəkatında ölkəmizə göstərilən etimadın sübutudur. Bu fakt bizə göstərilən etimadla yanaşı, dövlətimizin üzərinə bu təşkilatın taleyinə görə müəyyən məsuliyyət qoyur. Açıq deyək, Bakı bu vəzifənin öhdəsindən şərəflə gəlir.
Azərbaycan həqiqətən çox fəal sədrlik edir, onun liderliyi üçün ayrılmış müddətdən maksimum səmərə ilə istifadə etməyə çalışır. Qoşulmama Hərəkatının parlament şəbəkəsinin bu yaxınlarda Bakıda keçirilmiş birinci forumu hamımızın yadındadır. Əslində bu şəbəkə həmin forumda yaradılıb. Yeni qurum özünün ilk təsis forumunda bu platformanın böyük potensiala malik olduğunu nümayiş etdirib. Həmin platforma həm də ona görə vacibdir ki, onun vasitəsilə Azərbaycanın milli maraqlarına uyğun olan və beynəlxalq hüququn aliliyini əks etdirən qətnamələr qəbul etmək olar. Ona görə də indi dövlətimizin qarşısında yeni vəzifə durur - yeni köməkçi strukturlar vasitəsilə Hərəkata təzə nəfəs vermək.
Bakı buna nail olur və durmadan yeni ideyalar irəli sürür. Məsələn, Qoşulmama Hərəkatı çərçivəsində onun Gənclər Platforması daha bir yeni qurum olacaq. Prezident həmin platformanın yaradılacağını elan edib. Tezliklə ölkəmizdə gənclər forumu keçiriləcək və həmin forumda Qoşulmama Hərəkatının Gənclər Şəbəkəsi yaradılacaq.
Beləliklə, bu hərəkatda dövlətimizin sədrliyi onun beynəlxalq imicinin möhkəmlənməsini nümayiş etdirir və bizə göstərilən yüksək etimadı əks etdirir. Bu da təsadüfi deyil, çünki Azərbaycan həmişə öz sözünün sahibi olub və yenə belədir.
Qoşulmama Hərəkatında sədrlik çərçivəsində nümayiş etdirilən parlaq uğurlarla yanaşı Vətənimiz özünün xarici siyasi fəaliyyətinin digər istiqamətlərində də alqışlanmağa layiqdir. Bu ilin birinci yarısında İslam Əməkdaşlıq Təşkilatının Baş katibi Hüseyn İbrahim Taha ölkəmizə səfər edib. Ali qonaq Şuşanı və Füzulini ziyarət edib, orada ermənilər tərəfindən dağıdılmış və murdarlanmış məscidləri öz gözü ilə görüb. Erməni vandalizminin və barbarlığının izlərinin bütün dünyaya göstərilməsi bundan sonra da davam edəcək. Dünya özünü “mədəni”, “qurucu”, “sivil” xalq kimi göstərməyə çalışanların əsl üzünü görməlidir.
Türk dövlətlərinin əməkdaşlığı həm Türk Dövlətləri Təşkilatı çərçivəsində, həm də ikitərəfli əsasda genişlənir. Bu istiqamət bizim milli diplomatiyanın prioritet istiqamətidir. Prezident öz çıxışında təkcə bu il ərzində Türkiyə Prezidenti Ərdoğanla üç görüşünü, aprel ayında qırğızıstanlı həmkarı Sadır Japarovun Bakıya səfəri zamanı onunla görüşlərini, özünün Özbəkistana və Türkmənistana səfərlərini, bu iki qardaş dövlətin rəhbərləri Şavkat Mirziyoyev və Sərdar Berdiməhəmmədovla görüşlərini, həmçinin gələn ay Qazaxıstan Prezidenti Kasım-Jomart Tokayevin Azərbaycana səfərinin hazırlanması barədə xatırladıb.
Qonşularımız da kənarda qalmayıb. Türkiyə Prezidenti ilə yuxarıda qeyd edilən üç görüşdən əlavə İlham Əliyevin bütün başqa qonşu ölkələrin - Rusiya, Gürcüstan, İran və Ermənistanın rəhbərləri ilə görüşləri olub, Qazaxıstan Prezidentinin Bakıya səfərindən sonra isə bütün beş Xəzəryanı dövlətin rəhbərləri ilə görüşlərin baş tutması barədə də danışmağa əsas olacaq. Bunlar sadəcə statistika deyil. Bu dinamik xarici siyasətin əsasını təşkil edən ən başlıca elementlər regionda münaqişədən sonrakı dövrdə inkişaf, energetika, nəqliyyat və mədəni əlaqələr məsələləridir.
Yeri gəlmişkən, energetika barədə. Bazar ertəsi Avropa Komissiyasının prezidenti Ursula fon der Lyayenin Bakıya səfəri gözlənilir. Səfər çərçivəsində Avropa İttifaqının energetika sektorunu Azərbaycanla daha sıx bağlayan, sözün həqiqi mənasında tarixi sənəd imzalanacaq. Bundan əlavə, Avropa İttifaqı Şurasının sədri Şarl Mişel ilə telefon söhbətləri öz yerində, onunla Brüsseldə üzbəüz danışıqları da ayrıca qeyd etmək lazımdır. Həmin danışıqlarda regionda münaqişədən sonrakı proseslərə aid məsələlər barədə Aİ ilə Azərbaycan arasında böyük sazişin müzakirəsinin tamamlanması və imzalanmasının yaxınlaşması mövzusuna da toxunulub. Məlumdur ki, həmin sazişin bəndlərinin çox hissəsi artıq razılaşdırılıb, lap cüzi məqamlar qalıb. Çox ehtimal ki, həmin saziş bu il imzalana bilər.
Nəhayət, okeanın o tayındakı tərəfdaşlarımızla davam edən əlaqələri də qeyd etməliyik. Bu il İlham Əliyev Prezident Co Baydendən iki dəfə məktub alıb. Bu fakt da Vaşinqtonun Bakı ilə əməkdaşlığa marağının artmasından xəbər verir.
Beləliklə, inamla demək olar ki, bu yarımillikdə böyük uğurlar qazanılıb. Bütün istiqamətlərdə irəliləyiş müşahidə olunur. Bu, bizim siyasi kursumuzun açıq və şəffaf olmasının, Azərbaycanın verdiyi vədlərə və öz üzərinə götürdüyü öhdəliklərə vicdanla və etibarlı şəkildə əməl etməsinin nəticəsidir. Ona görə də ölkəmiz bütün dünyada hörmət qazanıb. Dünya miqyaslı bütün aktorlarla sabit əlaqələr və münasibətlər sayəsində daxili məsələlərə, ilk növbədə uzunmüddətli erməni işğalından azad edilmiş ərazilərin bərpasına daha artıq diqqət yetirmək üçün əlverişli beynəlxalq şərait yaradılıb.
Bu gün Azərbaycan qarşıya qoyulmuş hədəflərə doğru inamla irəliləyir. Bu hədəflərin çoxuna nail olmuşuq, qalanlara da eyni dərəcədə zəfərlə nail olacağıq.
Bölmənin digər xəbərləri
