Azərbaycanla Türkiyə arasında münasibətlərin inkişafı regionda təhlükəsizlik baxımından önəmlidir - Açıqlama
Bakı, 15 iyun, AZƏRTAC
Azərbaycan-Türkiyə qardaşlığı sarsılmazdır, Ulu Öndər Heydər Əliyev bu qardaşlığı bir millət, iki dövlət kimi xarakterizə edib. Türkiyə dövlətinin qurucusu qazi Mustafa Kamal Atatürk bu gün dillər əzbəri olan “Azərbaycanın sevinci bizim sevincimiz, kədəri bizim kədərimizdir. Azərbaycan bizim qardaşımızdır” deyib. 44 günlük Vətən müharibəsində Türkiyə Prezidenti Rəcəb Tayyib Ərdoğan ilk vaxtlarından Azərbaycanın yanında olduğunu bəyanat edərək Azərbaycanın haqq işini dəstəklədi. Türkiyə parlamentində bu dəstək barədə qərar qəbul edildi. Bu, çox önəmli məsələ idi. Pandemiya dövrü olmasına baxmayaraq, Türkiyə xalqı şəhərlərdə böyük mitinqlər keçirərək Azərbaycana dəstək nümayiş etdirdi.
Bunu AZƏRTAC-a açıqlamasında “Qardaşlığımız Əbədidir” QHT Koalisiyasının və “Tərxis Olunmuş Hərbçilərin Gəncləri Maarifləndirmə” İctimai Birliyinin sədri Emin Həsənli söyləyib.
O vurğulayıb ki, həmin siyasi-mənəvi dəstək əsasən Azərbaycan üçün çox əhəmiyyətli idi. Azərbaycan öz ordusunun gücünə düşmən tapdağında olan torpaqlarını işğaldan azad etdi. Allah şəhidlərimizə rəhmət eləsin, qazilərimizə cansağlığı versin. Ərazilərimiz işğaldan azad edildikdən sonra həmin ərazilərə xarici dövlət başçıları arasında ilk səfəri qardaş Türkiyə Prezidenti Rəcəb Tayyib Ərdoğan etdi. Şuşa Bəyannaməsinin imzalanması da böyük tarixi hadisə idi. Bu, Türkiyənin Azərbaycana, Azərbaycanın isə Türkiyəyə dəstək verməsi, eləcə də bütün sahələrdə əlaqələrin dərinləşməsi, həm siyasi, həm iqtisadi, xüsusən hərbi əməkdaşlığın yüksələn xətlə inkişaf etdirilməsi baxımından çox önəmlidir. Zəlzələ baş verdiyi zamanı Azərbaycan Türkiyəyə dəstək göstərdi. Prezident İlham Əliyevin tapşırığı ilə Azərbaycan dövləti və xalqı səfərbər olaraq qardaş Türkiyəyə dəstək oldu.
Emin Həsənli xatırladıb ki, Şuşada keçirilməsi nəzərdə tutulan Türk Dövlətləri Təşkilatının Dövlət Başçılarının Zirvə görüşü zəlzələdən sonra Azərbaycan Prezidenti İlham Əliyevin təşəbbüsü ilə Ankarada təşkil olundu. Vaxtilə Türkiyədə terror hadisəsi baş verdiyi zaman Türkiyə Prezidenti Azərbaycana səfər etməli idi. Lakin Azərbaycan Prezidenti Türkiyəyə səfərə getdi. Prezident İlham Əliyev birinci tur zamanı keçirilmiş seçkilərdən sonra Türkiyə Prezidentini təbrik etdi. İkinci turda da böyük qələbə qazanan R.T.Ərdoğan da andiçmə mərasimində dövlətimizin başçısına xüsusi minnətdarlığını bildirərək diqqət göstərdi.
İctimai Birliyin sədri qeyd edib ki, Azərbaycanla Türkiyə prezidentləri arasında qardaşlıq əlaqələri çox yüksək səviyyədədir və qarşılıqlı etimad, inama əsaslanır. Bu münasibətlər iki dövlətin gələcək inkişafı baxımından çox mühüm əhəmiyyət kəsb edir. Azərbaycanın ağır günlərində Türkiyə onun yanında olub, Türkiyənin ağır günlərində isə Azərbaycan ona dəstək göstərib. İki dövlət, həmçinin bütün platformalarda bir-birini dəstəkləyib. Şuşa Bəyannaməsi də bu fəaliyyətin ən yüksək səviyyədə olmasının bariz nümunəsidir. Rəcəb Tayyib Ərdoğanın prezident seçildikdən sonra ilk səfərini Azərbaycana etməsi ölkəmizə olan böyük diqqətin göstəricisidir.
“Türkiyə Prezidentinin ilk səfərini ölkəmizə etməsi, Azərbaycan Prezidentinin ilk səfərini Türkiyəyə etməsi artıq ənənə halını alıb. Bütün sahələrdə, o cümlədən iqtisadi, siyasi, humanitar, hərbi sahədə əməkdaşlığımız ən yüksək səviyyədədir. Türk dövlətləri təşkilatında da bu əlaqələr daha da dərinləşir. Azərbaycanla Türkiyə arasındakı bu münasibətlərin yüksələn xətlə davam edilməsi regionda təhlükəsizlik baxımından önəmlidir. Türkiyə Azərbaycanın, Azərbaycan isə hər zaman Türkiyənin yanındadır. Bu, dünyaya, ümumiyyətlə hər kəsə bir mesajdır”, - deyə E.Həsənli diqqətə çatdırıb.
Bölmənin digər xəbərləri
