Bakı,13 mart, AZƏRTAC 

Azərbaycan Universitetinin professoru Asif Hacıyev Türkiyənin Erciyəs Universiteti rektorluğunun dəvəti ilə Kayseri şəhərində ezamiyyətdə olub.

Azərbaycan Universitetindən AZƏRTAC-a bildiriblər ki, səfərin məqsədi qardaş ölkənin ali məktəbinin müəllim və tələbələri üçün A.Hacıyev tərəfindən “Rus ədəbiyyatında Qurani-Kərim” və “Çağdaş Azərbaycan və rus ədəbiyyatı” mövzularında mühazirələrin keçirilməsi olub.

Əvvəlcə A.Hacıyev Erciyəs Universitetinin prorektoru, professor Karamehmet Yıldız ilə görüşüb. Rus dili və ədəbiyyatı kafedrasının müdiri, professor Sevinc Üçgülün də iştirak etdiyi görüşdə hər iki ölkənin universitetlərinin əməkdaşlıq perspektivləri, birgə layihələrin icra olunması, Azərbaycan və rus ədəbiyyatının Türkiyədə öyrənilməsi və tərcüməsi məsələləri ətrafında müzakirələr aparılıb.

Sonra ilahiyyat və ədəbiyyat fakültələrinin birgə təşkilatçılığı ilə universitetin “15 Temmuz Konqres Mərkəzi”ndə “Rus ədəbiyyatında Qurani-Kərim” mövzusunda konfrans keçirilib. Universitetin rəhbərliyinin, müəllim, doktorant, magistrant və tələbələrin iştirak etdiyi tədbirdə A.Hacıyev məruzə ilə çıxış edib. Məruzədə qədim dövrdən müasir mərhələyədək rus ədəbiyyatında “Qurani-Kərim”ə, İslam dəyərlərinə və müsəlmanlara münasibət, rus və türk xalqlarının mədəni-ədəbi əlaqələri, o cümlədən rus ədiblərinin Azərbaycan xalqına və mədəniyyətinə münasibəti, eləcə də Azərbaycan mədəniyyətinin rus və bir çox digər xalqların mədəniyyətinə təsiri şərh olunub, ədəbi əlaqələrin xalqların və mədəniyyətlərin dialoqunda rolu qeyd edilib.

Konfrans A.Hacıyevin Türkiyədə dərc olunan “Rus ədəbiyyatında Qurani-Kərim” kitabının “İmza günü” ilə başa çatıb.

Səfər çərçivəsində Erciyəs Universitetinin ədəbiyyat fakültəsi rus dili və ədəbiyyatı kafedrası tərəfindən təşkil olunan tədbirdə professor A.Hacıyevin çağdaş Azərbaycan və rus ədəbiyyatı haqqında məruzəsi dinlənilib. Məruzədə postsovet məkanı ədəbiyyatında ortaq və özünəməxsus ədəbi meyillər, iki əsrin qovşağı və müstəqillik dövrü Azərbaycan və rus ədəbi prosesi, bu dövr ədəbi yaradıcılığının məzmun və forma özəllikləri haqqında məlumat verilib, təhlil və müqayisələr aparılıb, tələbələrin sualları cavablandırılıb.

Türk ocaqları Kayseri şöbəsinin dəvəti ilə A.Hacıyev 1926-cı ildən fəaliyyət göstərən bu ictimai qurumun ofisində şəhər ziyalıları, müəllim və tələbələr qarşısında “Müstəqil Azərbaycanda multikulturalizm və ədəbiyyat” mövzusunda çıxış edib. Milli mədəniyyətimizdə və ədəbiyyatımızda zəngin tolerantlıq ənənələrinə toxunan A.Hacıyev multikulturalizm anlayışının ümummilli lider Heydər Əliyevin azərbaycançılıq məfkurəsində və Prezident İlham Əliyevin dövlətçilik siyasətində mühüm yer tutduğunu vurğulayıb. Ölkəmizdə bütün xalqların və din mənsublarının hüquqlarının tam təmin edildiyi, yüksəliş yolunda olan müstəqil Azərbaycanın bir çox ölkələr üçün tolerantlıq, birgəyaşayış və multikulturallıq nümunəsi olduğu faktlarla dinləyicilərə çatdırılıb.