Azərbaycanlı gənc alim beynəlxalq konfransda Hüseyn Cavidin yaradıcılığından danışıb
Bakı, 3 sentyabr, AZƏRTAC
Ərzurum şəhərində Beynəlxalq Elmlər Akademiyasının təşkilatçılığı ilə Türkiyə Cümhuriyyətinin Zəfər bayramı münasibətilə onlayn qaydada III beynəlxalq sosial elmlər konfransı keçirilib. Beş ölkədən tanınmış alimlərin qatıldığı tədbirdə AMEA-nın Hüseyn Cavidin ev-muzeyinin dissertantı Könül Məhərrəmova iki bölmədə məruzələrlə çıxış edib.
Bu barədə AZƏRTAC-a AMEA-dan məlumat verilib. Bildirilib ki, gənc alimin “Hüseyn Cavid şəxsiyyəti Türkiyə ədəbiyyatşünaslığında” və “Hüseyn Cavid yaradıcılığının dil və üslub xüsusiyyətləri Türkiyə ədəbiyyatşünaslığında” adlı məruzələri iştirakçılar tərəfindən maraqla qarşılanıb.
K.Məhərrəmova qeyd edib ki, türk xalqlarının ədəbiyyatı tarixində öz incə ruhu, zərif qələmi ilə oxucularının qəlbində yaşayan Hüseyn Cavid həyatı və yaradıcılığı boyu hər zaman Turan eşqini bəyan edib. O, Türkiyə ədəbiyyatşünaslarının Hüseyn Cavidin böyük ədəbi şəxsiyyətinə və əbədiyaşar bədii irsinə daim xüsusi maraq göstərdiklərini, təhlil və tədqiqat obyektinə çevirdiklərini vurğulayıb: “Həm Hüseyn Cavid yaradıcılığına, həm türk xalqlarının siyasi və mədəni tarixinə, həm də bu gün Türkiyə-Azərbaycan qardaşlığına nəzər saldıqda görürük ki, türkün yüksəlişi yalnız türkün birliyi ilə mümkündür”.
Onlayn konfransın yekununda Könül Məhərrəmova Beynəlxalq Elmlər Akademiyasının sertifikatına layiq görülüb. Təşkilat komitəsi məruzələrin tam mətninin ayrıca nəşr olunacaq topluya daxil ediləcəyini bildirib.
Qeyd edək ki, K.Məhərrəmovanın elmi rəhbəri Hüseyn Cavidin ev-muzeyinin direktoru, filologiya elmləri doktoru Gülbəniz Babaxanlıdır.
Bölmənin digər xəbərləri
