Bakı, 6 fevral, AZƏRTAC

Nizami Gəncəvi adına Milli Azərbaycan Ədəbiyyatı Muzeyinin direktoru akademik Rafael Hüseynovun və Moskva İslam İnstitutunun rektoru professor Damir Muhetdinovun rəhbərliyi ilə bu iki müəssisənin əməkdaşlıq layihəsinə və 2024-cü ildə imzalanmış sazişə əsasən “Mədinə” nəşriyyat evinin “İslamın minarəsi” jurnalının bir neçə nömrəsi Azərbaycan klassiklərinə həsr ediləcək. Artıq jurnalın ilk nömrəsi dahi Azərbaycan şairi Nizami Gəncəviyə həsr edilib və Ədəbiyyat Muzeyində jurnalın təqdimatı keçirilib.

Muzeydən AZƏRTAC-a bildirilib ki, Moskva İslam İnstitutu ilə növbəti əməkdaşlığı Nizami Gəncəvi adına Milli Azərbaycan Ədəbiyyatı Muzeyinin Komparativistika və bədii tərcümə şöbəsinin müdiri professor Şəfəq Əlibəyli gerçəkləşdirib. Şəfəq Əlibəyli “Nizami Gəncəvinin “Xəmsə” əsəri haqqında düşüncələr” mövzusunda tələbə və müəllim auditoriyası qarşısında onlayn məruzə edib.

Şərqşünas alim bildirib ki, Nizami Gəncəvi əbədiyaşar şair və mütəfəkkirlərdəndir. Hər zaman, hər bir nəsil Nizami poeziyasında öz dövrünə, öz ruhuna yaxın olan məqamları izləyə bilir. Nizami “Xəmsə”si öz mövzu rəngarəngliyi ilə yaşından, sənətindən asılı olmayaraq hər kəsi heyran edib. Şairin poeziyasının istər mövzu, istər ədəbi-bədii quruluş, istərsə də dil və üslub baxımından orijinal xüsusiyyətləri ilə fərqləndiyini açıqlayan Şəfəq Əlibəyli dahi şairin yaradıcılığından nümunələr səsləndirib.

Orijinal əsər və tərcümənin xüsusiyyətlərindən bəhs edən alim “Xəmsə”nin tərcüməsindən söz açaraq qeyd edib ki, fars dilini bilməsi ona nəinki Nizami Gəncəvi yaradıcılığını, həmçinin klassik ədəbiyyat nümunələrini orijinaldan mütaliə etmək imkanı yaradıb.

Şəfəq Əlibəyli elmi mühazirəsi əsasında tələbələri maraqlandıran suallara aydınlıq gətirərək cavablandırıb.

Bu mühazirəni, Şəfəq Əlibəyli ilə tələbələr arasında yaranan səmimiyyəti xüsusi dəyərləndirən Bakı Beynəlxalq Multikulturalizm Mərkəzinin Moskva nümayəndəliyinin icraçı direktoru, Azərbaycan İlahiyyat İnstitutunun fəxri doktoru Səfa Kərimov belə mühazirələrin mütəmadi olmasını diləyib. O, belə layihələrin və əməkdaşlığın davamlı olmasının həm Azərbaycan, həm də Rusiya tələbələri arasında qarşılıqlı fikir mübadiləsi aparmaq imkanları yaradacağını qeyd edib.

Daha sonra növbəti layihələrdə, həmçinin beynəlxalq konfranslarda və elmi platformalarda Milli Azərbaycan Ədəbiyyatı Muzeyinin də təmsil olunması təklif edilib.