QAN YADDAŞI
AZƏRBAYCANLI TƏLƏBƏLƏRİN PRAQA FORUMU
AZƏRTAC-ın xüsusi müxbiri xəbər verir ki, fevralın 27-28-də Praqada Azər-Çex Cəmiyyətinin təşkilatçılığı, Çexiya Senatının iştirakı və Azərbaycanın Çexiyadakı səfirliyinin dəstəyi ilə Azərbaycanlı tələbələrin Praqa Forumu keçirilmişdir.
Forumun işində Slovakiya, Çexiya, Avstriya, Hollandiya və digər Avropa ölkələrində təhsil alan azərbaycanlı tələbələr iştirak etmişlər.
Çexiya parlamentinin yuxarı Palatası - Senatın iclas salonunda keçirilən forumu Azər-Çex Cəmiyyətinin sədri Elşən Nəzərov açmışdır. Elşən Nəzərov Forumun Senatın binasında keçirilməsinə şərait yaratdığına görə Çexiya parlamentinə təşəkkürünü bildirmiş və ilk dəfə yaradılmış bu imkanın ölkələrimiz arasında əlaqələrin dərin olmasından xəbər verdiyini söyləmişdir. Natiq demişdir ki, Forumun fevralın 27-də keçirilməsinin digər səbəbi öz dəst-xətti ilə çex xalqının 1942-ci ildə Liditse şəhərində alman faşistləri tərəfindən məruz qaldığı soyqırımına oxşar ermənilərin azərbaycanlılara qarşı törətdikləri Xocalı soyqırımının 16-cı ildönümünün həmin vaxta təsadüf etməsidir.
Senatın sədr müavini Yirji Lişka çıxışında ilk dəfə olaraq, Çexiya Senatında bir çox ölkələrdən gəlmiş tələbələrin iştirakı ilə belə böyük bir forum keçirildiyini mühüm hadisə kimi qeyd edərək, tədbirin Azərbaycan və çex dillərində aparılmasından və tələbələrin yüksək hazırlıq səviyyəsindən məmnun qaldığını bildirmişdir. Tələbə və gənclərin gələcəkdə mühüm qərarlar qəbul edəcək şəxslər olduğunu vurğulayan natiq, onlara öz fəaliyyətlərini genişləndirmək üçün hərtərəfli imkanların yaradılmasının vacibliyindən bəhs etmişdir. Senat sədrinin müavini bildirmişdir ki, bu kimi tədbirlər Azərbaycan ilə Çexiya arasında münasibətlərin daha da inkişafına yol açacaqdır.
Azərbaycanın Çexiyadakı səfiri Tahir Tağızadə çıxışında Azərbaycan dövlətinin tələbə və gənclərə göstərdiyi qayğıdan bəhs edərək, 1996 və 1999-cu illərdə ölkədə “Gənclər Forumu”nun keçirilməsindən danışmış, bu yaxınlarda ölkə Prezidenti İlham Əliyevin imzaladığı “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı”nın təsdiq edilməsi haqqında” Sərəncamının gənclərimizə təhsillə bağlı geniş imkanlar açacağına əminlik ifadə etmişdir.
Xarici Ölkələrdə Yaşayan Azərbaycanlılarla İş üzrə Dövlət Komitəsinin Şərqi Avropa ölkələri idarəsinin rəhbəri Sürəddin Hümbətov tədbirdə çıxış edərək, Dövlət Komitəsinin xaricdə yaşayan soydaşlarımıza daim qayğı göstərdiyini, bu sahədə tələbələrin xüsusi çəkiyə malik olduğunu qeyd etmişdir. Sürəddin Hümbətov, həmçinin tələbələri maraqlandıran sualları da cavablandırmışdır.
Çexiyada təhsil alan tələbələrdən Bulu İsmayılova “Çexiya Respublikasında təhsil imkanları”, Həmid Kərimov “Xaricdə təhsillə bağlı Azərbaycan Respublikasının Dövlət Proqramı”, Sənan Nəcəfov “Gənclərin diaspor fəaliyyətində rolu: perspektivlər və problemlər”, Əhməd Həsənov “Tələbə-gənclər şəbəkəsi və onun lobbiçilikdə rolu” mövzularında geniş məruzələrlə çıxış etmişlər.
Sonra müxtəlif ölkələrdən gəlmiş qonaqlar çıxış etmiş, tələbələri maraqlandıran mövzu və problemlər ətrafında diskussiyalar aparılmışdır.
Fevralın 28-də isə lobbiçilik məsələlərinə həsr olunmuş dəyirmi masa keçirilmiş və Forumun işinə yekun vurulmuşdur.
######