AZƏRTAC-da Ulu Öndər Heydər Əliyevin əziz xatirəsi ehtiramla yad olunub
Bakı, 8 may, AZƏRTAC
Mayın 8-də Azərbaycan Dövlət İnformasiya Agentliyində (AZƏRTAC) Ümummilli Lider Heydər Əliyevin anadan olmasının 103-cü ildönümü ilə əlaqədar tədbir keçirilib.
Əvvəlcə Ulu Öndərin əziz xatirəsi bir dəqiqəlik sükutla yad olunub.
Tədbirdə çıxış edən AZƏRTAC-ın İdarə Heyətinin sədri Vüqar Əliyev bildirib ki, Ulu Öndər müasir müstəqil Azərbaycan dövlətinin qurucusu kimi yalnız siyasi və iqtisadi sahələrdə deyil, həm də milli-mənəvi dəyərlərimizin, ana dilimizin qorunub inkişaf etdirilməsində mühüm rol oynayıb. Onun rəhbərliyi dövründə Azərbaycan dili dövlət dili kimi Konstitusiyada təsbit olunub, ana dilimizin saflığının qorunması, zənginləşdirilməsi və gələcək nəsillərə ötürülməsi istiqamətində ardıcıl siyasət həyata keçirilib. Bu diqqət və qayğı nəticəsində Azərbaycan dili bu gün də dövlətçiliyimizin əsas dayaqlarından biri kimi inkişaf edir.
Ümummilli Liderin həyat yolunun əsl vətənpərvərlik, qətiyyət və uzaqgörənlik nümunəsi olduğunu bildirən İdarə Heyətinin sədri vurğulayıb ki, Ulu Öndər həm sovet dönəmində, həm də müstəqillik illərində Azərbaycan xalqının maraqlarını daim qoruyub, ölkəmizin gələcək inkişafı üçün möhkəm təməl yaradıb. Xüsusilə 1993-cü ildə xalqın təkidli tələbi ilə hakimiyyətə qayıdan Ümummilli Lider Heydər Əliyev Azərbaycanın dövlətçiliyinin qorunmasında və möhkəmləndirilməsində həlledici rol oynayıb, ölkəmizdə siyasi sabitlik bərqərar edilib, iqtisadi islahatlara başlanılıb. Dahi Liderin təşəbbüsü ilə həyata keçirilən neft strategiyası Azərbaycanın sürətli iqtisadi inkişafının əsasını qoyub, ölkəmizi beynəlxalq enerji xəritəsində mühüm mövqeyə çıxarıb. Bununla yanaşı, hüquqi dövlətdə demokratik institutların formalaşdırılması, ordu quruculuğu və milli həmrəyliyin təmin edilməsi istiqamətində atılan addımlar bu gün də öz bəhrəsini verir.
“Ümummilli Liderimizin müəyyənləşdirdiyi strateji kurs bu gün Prezident İlham Əliyev tərəfindən uğurla davam etdirilir. Dövlətimizin başçısının rəhbərliyi ilə ölkəmiz hərtərəfli inkişaf edir, beynəlxalq aləmdə mövqelərini daha da möhkəmləndirir. Xüsusilə şəhərsalma, infrastruktur və dayanıqlı inkişaf sahəsində həyata keçirilən layihələr Azərbaycanın müasir və dinamik dövlət kimi formalaşmasına xidmət edir. Bu baxımdan yaxın günlərdə Bakıda keçiriləcək Ümumdünya Şəhərsalma Forumunun 13-cü Sessiyası (WUF13) mühüm əhəmiyyət kəsb edir”, - deyə Vüqar Əliyev bildirib.
Sonda Ulu Öndərin əziz xatirəsi bir daha dərin ehtiramla yad edilib, görkəmli dövlət xadiminin zəngin irsinin daim yaşayacağına və Azərbaycan xalqını yeni uğurlara aparacağına əminlik ifadə olunub.
Bölmənin digər xəbərləri
