AzMİU ilə Ankara Universiteti arasında ikili diplomla bağlı əməkdaşlığın əhatəsi genişlənir
Bakı, 8 may, AZƏRTAC
Türkiyənin aparıcı ali təhsil müəssisələrindən biri olan Ankara Universitetinin nümayəndə heyəti Azərbaycan Memarlıq və İnşaat Universitetinin (AzMİU) qonağı olub. Nümayəndə heyətinə Ankara Universitetinin rektoru professor Necdet Ünüvar rəhbərlik edib.
Bu barədə AZƏRTAC-a AzMİU-dan bildirilib. Görüşdə iki qardaş ölkə arasında dərin tarixi və strateji münasibətlərin fonunda elm və təhsil sahəsində əməkdaşlığın perspektivləri geniş şəkildə müzakirə olunub.
Görüş zamanı Ankara Universiteti ilə AzMİU arasında bir müddət əvvəl imzalanmış elektrik və elektronika mühəndisliyi ixtisası üzrə bakalavriat səviyyəsində ikili diplom proqramının hər iki dövlətin tənzimləyici qurumları tərəfindən təsdiqlənməsindən məmnunluq ifadə olunub. Proqramın inzibati və təşkilati məsələləri ətraflı müzakirə edilib.
Bununla yanaşı, görüş çərçivəsində universitetlər arasında daha bir mühüm sənəd – daşınmaz əmlakın inkişafı və idarə edilməsi ixtisası üzrə ikili diplom proqramına dair protokol imzalanıb.
Qeyd olunub ki, bu addım gənclərin təhsil imkanlarının genişləndirilməsilə yanaşı, AzMİU-nun beynəlxalq təhsil mühitinə inteqrasiyasını daha da gücləndirəcək.
Tərəflər, həmçinin elmi-tədqiqat istiqamətində birgə fəaliyyətin genişləndirilməsi, alimlərin beynəlxalq indeksli jurnallarda ortaq məqalələrlə çıxış etməsi, hər iki universitetin elmi nəşrlərindən qarşılıqlı faydalanma, rəqəmsal oyunların inkişafı sahəsində ortaq tədqiqatların aparılması və birgə layihələrin hazırlanması kimi məsələləri müzakirə ediblər.
İmzalanmış yeni protokol AzMİU-nun beynəlxalq əməkdaşlıq strategiyasının növbəti uğurlu addımı kimi qiymətləndirilir. Daşınmaz əmlakın inkişafı və idarə edilməsi ixtisası üzrə ikili diplom proqramı ilə universitetin bu formatda beynəlxalq müqavilələrinin sayı 12-yə çatdı. AzMİU-nun dünyanın müxtəlif ölkələrinin aparıcı ali təhsil müəssisələri ilə imzaladığı bu ikili diplom sazişləri tələbələrin qlobal bilik və bacarıqlarla təchiz olunmasına, müəllimlərin elmi-mübadilə imkanlarının genişlənməsinə və universitetin beynəlxalq təhsil məkanında nüfuzunun daha da artmasına xidmət edir.
Bölmənin digər xəbərləri
