AZPROMO: Müasir şəhər layihələri onları əhatə edən iqtisadiyyatdan ayrı deyil
Bakı, 20 may, AZƏRTAC
AZPROMO Azərbaycanda investisiya imkanlarını təşviq edən beynəlxalq biznes platformalarının təşkili və dəstəklənməsində fəal iştirak edir.
AZƏRTAC xəbər verir ki, bu barədə İxracın və İnvestisiyaların Təşviqi Agentliyinin (AZPROMO) icraçı direktoru Yusif Abdullayev WUF13 çərçivəsində "Azərbaycanda ağıllı və davamlı şəhər layihələrinin təqdim edilməsi" adlı tədbirdə deyib.
Onun sözlərinə görə, müasir şəhər layihələri onları əhatə edən iqtisadiyyatdan ayrı deyil.
“Onlar dəyər zəncirlərini formalaşdırır, ticarət üçün yeni marşrutlar açır, investisiyaları cəlb edir və bizneslərlə icmalar üçün yeni imkanlar yaradır. Lakin bizim yanaşmamız yalnız beynəlxalq platformalarda iştirakla məhdudlaşmır. Ötən il biz növbəti mərhələyə keçərək öz qlobal platformamızı yaratdıq. Sentyabr ayında biz I Azərbaycan Beynəlxalq İnvestisiya Forumunu keçirdik. Azərbaycan Beynəlxalq İnvestisiya Forumunun hər il keçirilməsi planlaşdırılır və artıq bu ilin forumuna hazırlıq işləri davam edir. Fürsətdən istifadə edərək bugünkü sessiyanın bütün iştirakçılarını sentyabr ayında keçiriləcək növbəti forumda iştirak etməyə və Azərbaycanın investisiya, tərəfdaşlıq və uzunmüddətli əməkdaşlıq imkanlarını yaxından araşdırmağa dəvət edirəm”, - deyə Yusif Abdullayev vurğulayıb.
Bölmənin digər xəbərləri
