Bakıda “Azərbaycanın yaşıl xəzinəsi” mövzusunda sərgi açılmışdır
Bakı, 2 may (AZƏRTAC). Mayın 2-də Azərbaycan Milli Elmlər Akademiyasının (AMEA) əsas binasında AMEA-nın Botanika İnstitutunun, Fribourg Təbiət Tarixi Muzeyinin (İsveçrə), Botanika Bağlarının Beynəlxalq Mühafizəsinin (BGCI, Birləşmiş Krallıq) və “NG Tornay Dizayn” şirkətinin (İsveçrə) birgə təşkilatçılığı ilə “Azərbaycanın yaşıl xəzinəsi” mövzusunda sərgi açılmışdır.
AZƏRTAC xəbər verir ki, AMEA-nın prezidenti, akademik Akif Əlizadə iştirakçıları salamlayaraq son illər ölkəmizin beynəlxalq aləmdə artan nüfuzundan söz açmışdır.
Müştərək tədbirlərin təşkili ilə bağlı AMEA-nın ünvanına müxtəlif ölkələrdən çoxsaylı məktublar gəldiyini bildirən akademik vurğulamışdır ki, biz dünya elminə töhfələr verəcək hər bir layihəni dəstəkləməkdə maraqlıyıq.
Tədbirin təşkilini yüksək qiymətləndirən AMEA-nın prezidenti bildirmişdir ki, bu sərgi Azərbaycan təbiətinin füsunkarlığını, bənzərsizliyini bir daha nümayiş etdirəcəkdir.
A.Əlizadə vurğulamışdır ki, hazırda Azərbaycanda
Təbiət Tarixi Muzeyinin yaradılmasına böyük ehtiyac vardır və biz belə bir muzeyin yaradılması istiqamətində işlər görürük.
Tədbirdə çıxış edən İsveçrə Konfederasiyasının Azərbaycandakı səfiri Paskal Obişer ölkəsində meşələrin qorunması istiqamətində görülmüş işlərdən söz açmışdır. Diplomat demişdir ki, İsveçrədə içməli suyun 40 faizi meşələrin payına düşür.
Azərbaycan hökumətinin meşələrin mühafizəsi, qorunması istiqamətində gördüyü işləri yüksək qiymətləndirən səfir vurğulamışdır ki, belə tədbirlər təbiətin öyrənilməsinə öz dəyərli töhfəsini verəcəkdir.
AMEA-nın Botanika İnstitutunun direktoru, professor Validə Əlizadə Prezident İlham Əliyevin tapşırıq və tövsiyələri ilə ölkəmizdə aparılan quruculuq işlərindən, elmin inkişafına yönəldilmiş layihələrdən geniş söz açmışdır.
Botanika İnstitutu tərəfindən həyata keçirilən layihələrdən söz açan natiq vurğulamışdır ki, bu elm mərkəzi son illərdə bir sıra beynəlxalq proqramlara qoşulmuş və yüksək elmi nəticələr əldə etmişdir.
Fribourg Təbiət Tarixi Muzeyinin botanika kolleksiyasının rəhbəri, professor Gregor Kozlovski Azərbaycan təbiətinin bənzərsizliyindən geniş söz açmış və vurğulamışdır ki, bu təbiətdən öyrəniləsi çox şeylər vardır.
Tədbirin təşkilatçılarına minnətdarlığını bildirən qonaq demişdir ki, bu sərgi 3 illik zəhmətin bəhrəsidir.
Sonra tədbir iştirakçıları sərgi ilə yaxından tanış olmuşlar.
Sərgidə Azərbaycanın Hirkan meşələrinin on əsas klassik relikt ağac növünün yayılma əraziləri haqqında məlumat zənginliyi ilə yanaşı, florası, biocoğrafiyası və ekologiyasını əks etdirən xüsusi nümunələr silsiləsi də nümayiş etdirilmişdir.
Tədbirdə İsveçrə, Böyük Britaniya, İtaliya, Yunanıstan, Gürcüstan, Çindən 15-dək nümayəndə heyəti və Avropa dövlətlərinin Azərbaycanda fəaliyyət göstərən bir sıra səfirliklərinin nümayəndələri iştirak etmişlər.
İkitərəfli müqavilə üzrə sərgi üçün İsveçrədən Azərbaycana gətirilmiş bütün avadanlıq və ləvazimatlar AMEA-nın Botanika İnstitutuna hədiyyə edilmişdir. Bu ləvazimatlar bir il müddətində institutda yeni yaradılan Botanika Muzeyində nümayiş olunacaqdır.
Bölmənin digər xəbərləri
