BAKIDA KEÇİRİLƏCƏK GÜLƏŞ ÜZRƏ DÜNYA ÇEMPİONATINA HAZIRLIQ İŞLƏRİNİN SƏVİYYƏSİNİ MÜTƏXƏSSİSLƏR YÜKSƏK QİYMƏTLƏNDİRİRLƏR
Xəbər verdiyimiz kimi, sentyabrın 17-dən 23-dək Bakıda güləş üzrə dünya çempionatı keçiriləcəkdir. Belə irimiqyaslı yarışın ölkəmizdə keçirilməsi dünyanın idman ictimaiyyətinin diqqətini Azərbaycana cəlb edəcəkdir. Medallarla yanaşı, Pekin Olimpiadasına lisenziyalar qazandıracaq dünya çempionatına son hazırlıq işləri necə gedir?
AZƏRTAC-ın müxbirinin bu və digər suallarına Azərbaycan Güləş Federasiyasının prezidenti Fazil Məmmədov cavab verərək demişdir:
-Dövlətimizin başçısı, Milli Olimpiya Komitəsinin prezidenti İlham Əliyevin yüksək diqqəti və qayğısı nəticəsində hazırda ölkəmiz idmanın bütün növləri üzrə sürətli inkişaf dövrünü yaşayır. Bunun nəticəsində, Bakı artıq dünyanın idman mərkəzlərindən birinə çevrilmişdir və hər il bir-neçə mötəbər yarışın ev sahibliyi məhz Azərbaycana həvalə edilir.
Sentyabrın 17-dən 23-dək Bakıda güləş üzrə böyüklər arasında keçiriləcək dünya çempionatı isə ölkəmizə inam və etimadı daha da artıracaqdır. Azərbaycan ilk dəfədir ki, bu miqyasda beynəlxalq idman tədbirinin təşkilatçılığını üzərinə götürmüşdür. Düzdür, indiyə qədər dəfələrlə dünya və Avropa miqyaslı yarışlara ev sahibliyi etmişik. Məsələn, güləş üzrə iki mühüm beynəlxalq turnir - 2002-ci ilin mayında sərbəst güləş üzrə Avropa çempionatı və 2006-cı ildə hərbçilər arasında dünya birinciliyi ölkəmizdə keçirilmişdir. Lakin əhəmiyyətinə, iştirakçıların və olimpiya lisenziyalarının sayına görə Bakıda təşkil olunacaq yunan-Roma, sərbəst və qadın güləşi üzrə dünya çempionatı indiyə qədər paytaxtımızda keçirilən beynəlxalq turnirlərdən fərqlənir.
Çempionatda iştirak etmək üçün indiyədək dünyanın 100-dən çox ölkəsindən rəsmi müraciət daxil olmuşdur. İştirakçıların ümumi sayı 1600 nəfərdən çox olacaqdır.
Dünya çempionatının yüksək səviyyədə keçirilməsi üçün Azərbaycan Güləş Federasiyası ilə yanaşı, Milli Olimpiya Komitəsi, Gənclər və İdman Nazirliyinin də bütün qüvvələri səfərbər edilmişdir. Eyni zamanda, Beynəlxalq Güləş Federasiyası - FİLA-nın nəzarət inspeksiyası ilə müntəzəm əlaqə saxlanılır, ekspertlərin tez-tez Azərbaycana səfərləri təşkil olunur. Beynəlxalq mütəxəssislər hazırlıq işlərinin səviyyəsini yüksək qiymətləndirirlər.
Federasiya prezidenti artıq sentyabrın 3-dən iqlimə uyğunlaşmaq üzrə Bakıda xüsusi proqramlar əsasında təlim-məşq toplanışı keçirmək istəyən bütün ölkələrin idmançıları üçün lazımi şərait yaradıldığını bildirmişdir. Heydər Əliyev adına İdman-Konsert Kospleksinin ən böyük idman zallarından biri bu məqsəd üçün bütün zəruri avadanlıqla təchiz olunmuşdur. Bu zalda hər gün eyni zamanda 100-dən çox idmançı məşq edir.
Yığma komandamızın dünya çempionatında iştirak edəcək heyətinin artıq müəyyənləşdiyini bildirən F.Məmmədov, ölkəmizin birincilikdə, demək olar ki, bütün çəki dərəcələrində təmsil olunacağını bildirmişdir. O qeyd etmişdir ki, komandamız dünya birinciliklərində ilk dəfədir belə geniş heyətlə çıxış edir. Federasiya prezidenti xüsusi vurğulamışdır ki, bu çempionata 46 ölkədən 221 qadın iştirakçı qatılacaq və Azərbaycanın güləş tarixində ilk dəfə olaraq onlardan 6-sı vətənimizi təmsil edəcəkdir. Qadınlar arasında keçirilən dünya birinciliyində 7 çəki dərəcəsindən yalnız 4-ü lisenziya xarakterlidir ki, bizim idmançılarımız da bu çəki dərəcələrinin hər birində qüvvələrini sınayacaqlar. 2008-ci ildə Pekində keçiriləcək Olimpiya Oyunlarına lisenziya xarakterli olan bu çempionata Azərbaycanın idman ictimaiyyətinin ümidləri çox böyükdür.
Zədəlilərə gəldikdə, Federasiya prezidenti bildirmişdir ki, bir müddət əvvəl komandamızda zədəli idmançılar olsa da, onların ölkəmizdə və xarici klinikalarda müalicəsi ən yüksək səviyyədə təşkil edildiyindən, bu gün həm sərbəst, həm də yunan-Roma güləşində yığmamız yarışlara tam hazırdır. Bütün idmançılarımızın mənəvi və psixoloji durumu qənaətbəxşdir. Ona görə də bu çempionatda güləşçilərimizin ölkəmizin idman salnaməsinə qələbə səhifələri yazacaqlarına əminəm.
Bölmənin digər xəbərləri
