Bakı, 29 sentyabr, AZƏRTAC

Sentyabrın 29-da Bakıda “Müasir çağırışlar: birgəyaşayışın Azərbaycan nümunəsi” mövzusunda konfrans keçirilib.

AZƏRTAC xəbər verir ki, Dini Qurumlarla İş üzrə Dövlət Komitəsi (DQİDK) tərəfindən təşkil olunan konfransda əvvəlcə Azərbaycanın Dövlət Himni səsləndirilib, ölkəmizin ərazi bütövlüyü uğrunda mübarizədə canlarından keçən Vətən övladlarının xatirəsi bir dəqiqəlik sükutla yad edilib.

Konfransda müxtəlif sivilizasiyaların qovuşduğu məkan kimi Azərbaycanı əsrlər boyu milli-mədəni müxtəliflik mühitinin formalaşdığı, ayrı-ayrı millətlərin və konfessiyaların nümayəndələrinin sülh, əmin-amanlıq, qarşılıqlı anlaşma və dialoq şəraitində yaşadıqları diyar kimi tanıtmaq məqsədilə Komitənin tabeliyində Mənəvi Dəyərlərin Təbliği Fondunun sifarişi ilə hazırlanan “Müasir çağırışlar: Dinlərarası birgəyaşayış” mövzusunda qısametrajlı film nümayiş olunub.

Konfransda çıxış edən DQİDK sədrinin müavini Səyavuş Heydərov birgəyaşayışın mənəvi dəyərləri zənginləşdirən bir məsələ olduğunu qeyd edib. Bildirib ki, Azərbaycan reallıqlarında bu cür tendensiya hökm sürür. Azərbaycanda bütün xalqların və dinlərin nümayəndələrinə hörmət göstərilir, həmin şəxslərin hüquqları qorunur. Bu da bizim milli təhlükəsizliyimizin və sabitliyimizin təminatıdır. Günümüzdə ölkədə mövcud olan tolerantlıq və birgəyaşayış mühitinin daha da möhkəmlənməsinə xüsusi həssaslıqla yanaşan Prezident İlham Əliyev bu ənənəni daha da inkişaf etdirərək dövlət siyasətinin prioritet istiqamətlərindən birinə çevirib. O, 44 günlük Vətən müharibəsində bütün dünyanın Azərbaycan xalqının birliyinə bir daha şahid olduğunu vurğulayıb.

Milli Məclisin deputatı Elman Nəsirov çıxışında mövzunun aktuallığına diqqət çəkib. Bildirib ki, bütün dünyaya nümunə olan birgəyaşayış modeli və müxtəlif dinlərin harmonik birliyi ictimai sifarişdir və gələcəyimizin təminatçısıdır. Birgəyaşayış mühitinin dövlət-din konsepsiyasına uyğun möhkəmləndirilməsi istiqamətində Ümummilli Lider Heydər Əliyev tərəfindən həyata keçirilən strategiyanın əhəmiyyətini vurğulayan deputat bu uzaqgörən siyasətin Prezident İlham Əliyev çox mükəmməl şəkildə tərəfindən davam etdirildiyini deyib.

Bakı Beynəlxalq Multikulturalizm Mərkəzinin icraçı direktoru Rəvan Həsənov bildirib ki, Ermənistan regiondakı prosesləri təhrif edərək “etnik təmizləmə” kimi təqdim edir. Amma reallıq odur ki, Azərbaycan Qarabağda yaşayan ermənilərə reinteqrasiya olunmağı təklif edir, bununla da onların ağır sosial problemlərdən qurtulmaları üçün növbəti dəfə imkan yaradır.

Qafqaz Müsəlmanları İdarəsinin (QMİ) sədr müavini Fuad Nurullayev Azərbaycan xalqının tolerantlığının, humanistliyinin növbəti dəfə uğurlu lokal antiterror tədbirləri nəticəsində terroristlərdən təmizlənən Qarabağda erməni əsilli əhali ilə münasibətdə özünü göstərdiyini bildirib.

Rus Pravosloav Kilsəsinin Bakı və Azərbaycan Yeparxiyası şurasının katibi Konstantin Pominov qeyd edib ki, Azərbaycanda heç bir zaman dini münaqişə olmayıb. Azərbaycan Ermənistan istisna olmaqla, bütün ölkələrlə sıx münasibətlərə malikdir. Ermənistanın istisna təşkil etməsi isə normaldır, çünki onlar dostluq etməyi bacarmır, daim qonşu ölkələrlə problemlər yaşayır.

Alban-Udi Xristian dini icmasının sədri Robert Mobili, Azərbaycan Katolik kilsəsinin nümayəndəsi Yozef Marek, Azərbaycan Bəhailəri Mərkəzinin katibi Ramazan Əsgərli, “Azərbaycan Bibliya Cəmiyyəti” Xristian dini icmasının sədri Rasim Xəlilov çıxışlarında Azərbaycanda dini konfessiya nümayəndələrinə göstərilən diqqət və qayğıdan söz açıblar. O cümlədən çıxışlarında Xristian dininin siyasiləşdirilməsinə, Qarabağ ətrafındakı münaqişəyə dini çalar verilməsi cəhdlərinə kəskin şəkildə etiraz ediblər.

Azərbaycan İlahiyyat İnstitutunun rektoru Aqil Şirinov yekun nitqi ilə çıxış edərək tolerantlığın, birgəyaşayış ənənələrinin cəmiyyətdə mövcud olmasıyla yanaşı bu dəyərlərin dövlət tərəfindən dəstəklənməsinin önəmini vurğulayıb.

Sonda Azərbaycan İlahiyyat İnstitutunun kitabxanasına DQİDK tərəfindən ölkəmizdəki tolerantlıq mühitinə dair fotolardan hazırlanmış albom təqdim olunub.

Konfrans müzakirələrlə yekunlaşıb.