Bakıda Qətərin milli bayramı qeyd edilib
Bakı, 14 dekabr, AZƏRTAC
Qətərin milli bayramı ilə əlaqədar bu ölkənin Azərbaycandakı səfirliyi dekabrın 14-də rəsmi qəbul təşkil edib.
AZƏRTAC xəbər verir ki, rəsmi qəbulda əvvəlcə hər iki ölkənin dövlət himnləri səsləndirilib.
Səfir Yusif bin Həsən əl-Sai tədbirdə çıxış edərək ölkəsinin keçdiyi inkişaf yolundan danışıb.
Ölkələrimiz arasında əlaqələrə toxunan səfir Azərbaycan-Qətər münasibətlərinin bütün sahələrdə yüksələn xətlə inkişaf etdiyini söyləyib. O, bu ilin yanvarında keçirilən Qətər və Azərbaycan hökumətləri arasında birgə iqtisadi, ticari və texniki komissiyanın birinci toplantısının əlaqələrimizin inkişafına töhfə verdiyini vurğulayıb.
Səfir Azərbaycan Prezidenti İlham Əliyevin 2017-ci ilin fevralında Dohaya etdiyi tarixi səfərin iki dost ölkə arasındakı münasibətlərin inkişafına təkan verdiyini söyləyib. Qeyd edib ki, ölkələrimiz arasında müxtəlif sahələrdə əməkdaşlıqla bağlı sənədlər imzalanıb.
Tədbirdə çıxış edən fövqəladə hallar naziri Kəmaləddin Heydərov əlamətdar gün münasibətilə Qətər xalqını Azərbaycan Respublikasının Prezidenti İlham Əliyevin adından təbrik edib. Nazir bildirib ki, Qətər Dövləti müstəqilliyinin ilk illərindən etibarən uğurlu inkişaf yolu keçib, bir çox regional və qlobal problemlərin həllində mühüm rol oynayıb. Bu istiqamətdə, dünya ictimaiyyəti qarşısında ədalətli mövqe nümayiş etdirərək konstruktiv beynəlxalq əməkdaşlığa töhfə verib. Qətər Dövləti, eyni zamanda, öz dinamik inkişafı sayəsində regionun və dünyanın rəqabətə dayanıqlı və ən zəngin iqtisadiyyatlarından birinə çevrilib.
Kəmaləddin Heydərov qeyd edib ki, Azərbaycan Respublikası ilə Qətər Dövləti arasındakı dostluq və əməkdaşlıq münasibətlərinin xoş ənənələri mövcuddur. Xalqlarımızın dini və mədəni bağlılığı səbəbindən beynəlxalq aləmdə mövqelərimizin üst-üstə düşməsi ölkələrimizi bir-birinə yaxınlaşdıran mühüm amillərdən biridir. Bu istiqamətdə, Azərbaycan və Qətər beynəlxalq təşkilatlar çərçivəsində uğurlu əməkdaşlıq edir. Ermənistan-Azərbaycan, Dağlıq Qarabağ münaqişəsinin həllində Qətər Dövlətinin Azərbaycanın haqlı mövqeyini hər zaman dəstəkləməsini yüksək qiymətləndiririk.
Ölkələrimiz arasında ikitərəfli diplomatik əlaqələrin əsası 1994-cü ildə qoyulub. Həyata keçirilən yüksək səviyyəli qarşılıqlı səfərlər bu əlaqələrin möhkəmlənməsinə şərait yaradıb.
2004-cü ildə Azərbaycan Respublikasının Prezidenti İlham Əliyev tərəfindən həyata keçirilən rəsmi səfər və bu səfər çərçivəsində iqtisadiyyat, mədəniyyət, turizm, səhiyyə və idman kimi sahələrdə imzalanmış müvafiq sənədlər ikitərəfli əməkdaşlığın daha da genişlənməsinə təkan verib.
2016-cı ilin mart ayında Qətər Dövlətinin Əmiri Şeyx Təmim bin Həməd Al-Taninin Azərbaycan Respublikasına rəsmi səfəri və səfər zamanı əldə edilmiş razılaşmalar iki ölkə arasındakı əlaqələrin sürətli inkişafı üçün möhkəm zəmin yaradıb. Hər iki dövlətin rəhbərləri səviyyəsində olan səmimi və yüksək etibara söykənən münasibətlər ölkələrimiz arasındakı ikitərəfli əməkdaşlığın yüksək templərlə genişlənməsi üçün əsas yaradıb.
Nazir deyib ki, hazırda Azərbaycan və Qətər arasında müxtəlif sahələrdə, o cümlədən iqtisadi sahədə əməkdaşlıq uğurla davam edir, əlaqələrin inkişafı üçün geniş imkanlar açılır. Ölkələrimiz arasında iqtisadi, texniki, ticarət, kənd təsərrüfatı, turizm və sərmayələrin təşviqi istiqamətlərində bir sıra saziş və anlaşma memorandumları imzalanıb, münasibətlərin inkişafı üçün mühüm addımlar atılıb. 2016-cı ilin aprel ayında hər iki tərəfdən dövlət başçısının müdrik qərarı ilə fəaliyyətə başlamış Azərbaycan Respublikası Hökuməti ilə Qətər Dövləti Hökuməti arasında Birgə İqtisadi, Ticarət və Texniki Komissiya çərçivəsində qısa zamanda görülmüş işlər iki ölkə arasındakı iqtisadi-ticari əlaqələrin uğurlu inkişafına önəmli töhfə verib. Belə ki, ötən ilin müvafiq dövrü ilə müqayisədə cari ildə Qətər və Azərbaycan arasında ticarət əlaqələrinin genişlənməsi müşahidə edilib və ticarət dövriyyəsi 30 dəfəyə yaxın artıb. “Bu inkişafın sevindirici hal olduğunu qeyd etməklə yanaşı, iki ölkə arasında mövcud siyasi-strateji yaxınlıq və gələcək əməkdaşlıq potensialını nəzərə alaraq, əlaqələrimizin növbəti illərdə daha da genişlənəcəyinə ümidvar olduğumu bildirmək istərdim”, - deyə o bildirib.
Nazir qeyd edib ki, Azərbaycan Respublikası və Qətər Dövləti, həmçinin fövqəladə hallarla mübarizə və mülki müdafiənin təşkili sahəsində də əməkdaşlıq edir. Belə ki, Azərbaycan Fövqəladə Hallar Nazirliyi ilə Qətərin müvafiq qurumları arasında sıx əlaqələr qurulub və mütəmadi olaraq qarşılıqlı səfərlər həyata keçirilib. Bu əməkdaşlığın hüquqi əsası olaraq, 2014-cü ildə imzalanmış “Azərbaycan Respublikası Hökuməti və Qətər Dövləti Hökuməti arasında fövqəladə halların idarə edilməsi sahəsində əməkdaşlıq haqqında Saziş” iki ölkənin müvafiq qurumları arasında əlaqələrin daha da möhkəmləndirilməsinə zəmin yaradıb.
Nazir istər ikitərəfli qaydada, istərsə də beynəlxalq təşkilatlar çərçivəsində gələcək əməkdaşlığımızın daha da möhkəmlənəcəyinə əminliyini ifadə edib.
Qəbulda rəsmi şəxslər, Milli Məclisin deputatları, səfirlər, jurnalistlər, ictimaiyyətin nümayəndələri iştirak ediblər.
Bölmənin digər xəbərləri
