“Barselona” klubunun rəhbərliyi üç aparıcı futbolçusu ilə əməkhaqlarının azaldılmasına dair danışıqlar aparır
Bakı, 13 avqust, AZƏRTAC
Üzləşdiyi ağır maliyyə vəziyyətindən çıxış yolu axtaran “Barselona” klubunun rəhbərliyi komandanın aparıcı futbolçularından olan Jerar Pike, Serxio Buskets və Xordi Alba ilə əməkhaqlarının azaldılmasına dair danışıqlar aparır.
AZƏRTAC “Mundo Deportivo” nəşrinə istinadla xəbər verir ki, buna səbəb klubun maliyyə çətinlikləri ilə əlaqədar yeni transferlərini hələ də qeydiyyatdan keçirə bilməməsidir. Bununla yanaşı, klub rəhbərliyi Serxio Roberto ilə yeni müqavilə bağlamaq qərarına gəlib.
Futbolçulardan yalnız Serxio Buskets məsələyə münasibət bildirib. O, əməkhaqqının hələ 2019-cu ildə klub prezidenti Jozep Bartomenin dövründə 12 faiz azaldığını xatırladıb.
J.Pike “Barsa”da yaranmış vəziyyəti dərk etdiyini bildirsə də, X.Albanın mövqeyi hələ də bəlli deyil.
Yaranmış vəziyyətlə əlaqədar klub heyətinə qatmaq istədiyi futbolçuları rəsmən elan edə bilmir. Buna baxmayaraq, klub rəhbərliyi baş məşqçi Ronald Kumanın La Liqanın birinci turu çərçivəsində “Real Sosyedad” ilə oyunda güclü heyətdən yararlana biləcəyinə inanır.
Xatırladaq ki, Kataloniya təmsilçisi bu yay hücumçular Memfis Depay, Serxio Aqüero və müdafiəçi Erik Qarsionu heyətinə qatıb.
Bölmənin digər xəbərləri
