Baş mühəndis: Bu gün sovet dövründə təbii qaz almayan kəndlər də qazlaşdırılır VİDEO
Lənkəran, 17 fevral, İsmayıl Cəfərli, AZƏRTAC
Ölkəmizdə rayon və kəndlərin qazlaşdırılması layihələri uğurla icra olunur. Bölgələrin “mavi yanacaq”la təminatı ilə yanaşı, qaz kəmərlərinin və avadanlıqların yenidən qurulması istiqamətində də genişmiqyaslı işlər görülür. Beləliklə, qazlaşdırmanın səviyyəsi ölkə üzrə 96 faizə çatdırılıb. Bu isə dünya miqyasında ən yüksək göstəricilərdən biridir.
AZƏRTAC xəbər verir ki, respublikamızın çətin relyefdə yerləşən kənd və qəsəbələrinin qazlaşdırılması istiqamətində aparılan tədbirlər sürətlə davam etdirilir. Ən ucqar ərazilərə qaz xətləri çəkilir, əhalinin “mavi yanacaq”dan istifadəsi üçün lazımi tədbirlər görülür.
164 min abonenti “mavi yanacaq”la təmin edən SOCAR-ın “Azəriqaz” İstehsalat Birliyinin Lənkəran Regional Qaz İstismar İdarəsi də qarşıya qoyulan hədəfə doğru inamla addımlayır. İdarənin ərazisinə 7 xidmət sahəsi daxildir. Bunlar Biləsuvar, Cəlilabad, Masallı, Lənkəran, Astara, Lerik və Yardımlı xidmət sahələridir.
Lənkəran Regional Qaz İstismar İdarəsinin baş mühəndisi İxtiyar Seyfullayev deyir ki, bu rayonlar arasında yaşayış məntəqələrinin qazlaşdırılmasına görə ən böyük göstərici Biləsuvar rayonundadır: “Ən çox qazlaşdırılan ərazi Biləsuvar xidmət sahəsini əhatə edir - 94 faiz. Lənkəran xidmət sahəsi üzrə isə bu göstərici 93 faizdir. Ümumilikdə, Lənkəran Regional Qaz İstismar İdarəsi üzrə abonentlərin 82 faizi “mavi yanacaq”la təmin olunub. Cənab Prezidentin göstərişinə əsasən yaşayış məntəqələrinin qazlaşdırılması işləri sürətlə davam etdirilir”.
İdarə bölgə əhalisini və rayonda fəaliyyət göstərən müəssisə və təşkilatları fasiləsiz təbii qazla təmin etmək üçün yaradılmış şəraitdən səmərəli istifadə edir.
Lənkəran Regional Qaz İstismar İdarəsinin baş mühəndisi ötən il qazlaşdırılan yaşayış məntəqələrindən və yaxın gələcəkdə görüləcək işlərdən də söz açıb: “Ötən il cənub bölgəsinin 5 yaşayış məntəqəsi təbii qazla təmin olunub. Daxili imkanlar hesabına təkcə Lənkəranda 13 min 510 paqonometr boru xətti çəkilib, 15 min 145 paqonometr boru rənglənib. 2 min 817 ədəd sayğac həyət daxilindən küçəyə çıxarılıb, 1527 ünvan isə müraciət əsasında xəttə qoşulub. 2020-ci ildə 46 min 729 abonenti olan Lənkəranda 6 min 810 paqonometr boru xəttinin çəkilməsi nəzərdə tutulur. O cümlədən Xarxatan, Separadi və Digah kəndlərində 48 min 792 paqonometr əsaslı təmir işləri görüləcək”.
İxtiyar Seyfullayev bildirib ki, Sovet İttifaqının tərkibində yaşayanda belə cənub bölgəsinin ucqar kəndlərinə qaz xətləri çəkilməmişdi. Amma bu gün həmin kəndlər də qazlaşdırılır. Bu isə öz növbəsində, cənub bölgəsində meşələrimizin qorunması baxımından da önəmli amildir.
Qeyd edək ki, idarə tərəfindən 17 min 515 abonenti olan Biləsuvarda 6110 paqonometr, 31 min 735 abonenti olan Cəlilabadda 8840 paqonometr, 41 min 774 abonenti olan Masallıda 3720 paqonometr, 2 min 7612 abonenti olan Yardımlıda 302 paqonometr, 17 min 702 abonenti olan Astarada 6615 paqonometr, 4 min 791 abonenti olan Lerikdə isə 64 paqonometr istismar müddəti bitmiş müxtəlif diametrli qaz xətləri yenilənəcək. Ümumilikdə, 2020-ci ildə region üzrə yaşayış məntəqələrində 32 min 461 paqonometr boru xətləri dəyişdiriləcək. Bu isə, əhalinin qaz təminatının daha da yaxşılaşdırılmasında mühüm rol oynayacaq.
Bölmənin digər xəbərləri
