Bayramqabağı bazarlarda balığın qiymətləri ucuzdur VİDEO
Neftçala-Salyan, 28 dekabr, İsmayıl Cəfərli, AZƏRTAC
Hər il qış fəslində balıq bazarında canlanma müşahidə olunur. Bəs görəsən, bayram ərəfəsində balığa tələbat artıb? Qiymətlər alıcıları qane edir? Əməkdaşımız Neftçala və Salyan rayonlarının balıq bazarlarında olub, balıqçılıq təsərrüfatlarının hazırkı vəziyyəti ilə maraqlanıb.
AZƏRTAC xəbər verir ki, Neftçala rayonunda balıqçılıq ənənəvi sahə olsa da, son 10 ildə bunu müşahidə etmək bir qədər çətindir. Çünki həm Xəzər dənizində, həm də Kür çayında demək olar ki, balıq xeyli azalıb. Mütəxəssislər bunun ekoloji dəyişikliklə əlaqəli olduğunu bildirirlər.
İndi Neftçala sakinləri daha çox nohur balıqçılığına üstünlük verirlər. Vidadi Heybətov belə təsərrüfatlardan birinin sahibidir. 30 hektardan çox ərazisi olan nohurda balıq yetişdirən fermer bu işin olduqca çətin başa gəldiyini deyir. Buna səbəb nohurlarda körpə və əmtəəlik balıq istehsalı ilə məşğul olmaq üçün suyun az olmasıdır. Lakin balıqçı fermer bütün bu problemlərə rəğmən balıqçılığın inkişafı üçün yeni layihələr düşünür: “Çalışırıq ki, təsərrüfatımızı genişləndirək, bazarlarımızı balıqla təmin edək. Balıq həmişə ət məhsullarına nisbətən 50 faiz ucuz olmalıdır. Nohurda yetişən balıqların rentabelliyi 55-60 faizdir. Maya dəyəri 50 faizdən də aşağı olur”.
Balıq bazarında qiymətləri öyrənmək üçün Salyan şəhərinin mərkəzindəki bazarların birinə üz tutduq. Burada da əsasən nohur balıqlarının satışına üstünlük verilir. Qiymətlərə gəlincə... Satıcı Mənsurə Hacıyeva bildirir ki, qiymətlər sabitdir: “Ucuzluqdur, alış-veriş var. Balıqlar çox baha deyil. Kütümün kiloqramı 9-10 manatdır. Bobla balığı 5-6 manat, şahmayı balığı isə 6-7 manata satılır”.
Alıcı Abdulla İsmayılov da balığın qiymətinin onları qane etdiyini söyləyir. “Bayrama istədiyim balıqdan aldım. Güman edirəm ki, qiymətlər bayram günlərində də artmaz”, - deyə o əlavə edib.
Bölmənin digər xəbərləri
