BDU və ICESCO-nun Bakı regional ofisinin əməkdaşları arasında onlayn görüş olub
Bakı, 25 sentyabr, AZƏRTAC
Bakı Dövlət Universiteti (BDU) və ICESCO-nun Bakı regional ofisi arasında əməkdaşlıq imkanlarını genişləndirmək məqsədilə onlayn görüş keçirilib. Görüşdə BDU rektorunun katibliyinin rəhbəri Mahir Pirquliyev, ICESCO-nun regional ofisinin meneceri Ələkbər Xıdırov, regional ofisin tərcüməçi və şərhçisi Aytən Eyvazzadə iştirak ediblər.
BDU-dan AZƏRTAC-a bildirilib ki, tərəflər bu ilin sonlarında Bakıda keçirilməsi planlaşdırılan “Tərcümənin rolu” mövzusunda beynəlxalq konfransın təşkilini müzakirə ediblər. Konfransın məqsədi ICESCO-ya üzv ölkələr və Mərkəzi Asiyadan olan mütəxəssisləri bir araya gətirmək, tərcümənin ortaq dəyərlərin təşviqi, mədəniyyətlərarası dialoqa və davamlı inkişafa töhfəsi kimi əhəmiyyətini vurğulamaqdır.
Görüşdə ICESCO-nun əsas təhsil təşəbbüslərindən biri olan “Ərəb dili üzrə Beynəlxalq Dil Tədris Proqramı” da müzakirə olunub. Bu proqram ərəb dili bilməyən üzv dövlətlərin ehtiyaclarına cavab vermək məqsədi daşıyır və BDU-nun iştirakı ilə Azərbaycanda həyata keçiriləcək. Məqsəd təhsil işçiləri və ərəb dili müəllimlərinin potensialını artırmaq, tədris metodlarını və dil bacarıqlarını inkişaf etdirmək, həmçinin müasir pedaqoji, dil və texnoloji standartlara uyğun kurikulumların hazırlanmasına dəstək verməkdir.
Bölmənin digər xəbərləri
